米埔＊遊

未去過米埔；知道要攞禁區紙，知道可以觀鳥，以為好多人去，申請會麻煩。。。。

原來早一個星期上網book就已經攪掂，上網比埋錢，約好時間，easy。

世界自然基金會有幾種行程，我揀左最易最平最短時間初入門嘅“米埔自然遊 ”，時間係25/9,2:30pm-5:30pm，可以影三粒鐘～

點去？上水搭76K巴士,米埔站落車，見藍色呢個指示行入去， 20分鐘到達；但沿途已經好多野影，我行左超過半粒鐘


最好帶備望遠鏡同長鏡啦，但我無長鏡，而醉翁之意亦不在影鳥，所以無所謂啦；呢個係導賞團，一行十幾人，帶團都四個，沿路講解，好好呀!佢地仲有一枝超高清望遠鏡，清到嚇死，每次一見到鳥，大家就輪流睇囉，自己個望遠鏡差十皮，真係無乜用。
又因為係導賞團，無得離隊，所以影相要快夾準，無人會等你囉～
一路行已經見到一堆市區見唔到嘅動植物，睇下，我又見到蛇啦!


點解米埔多侯鳥，因為濕地啦，呢度分為魚塘同基圍兩邊，各有各靚架！
另外，有觀鳥屋觀鳥時段，見到池鷺，白鷺，貓頭鷹等等架
綠色間草屋係教育中心，入面有展覽，但重點係，高左一層，睇哂全景，方便影影影!


浮橋，全港最長，左右兩旁有蓮花池，有咸水草，有高過一個人嘅蘆葦，仲有日落，諗番起都興奮；
當日天氣一路都係天天陰，但係到浮橋終於有番D太陽啦!


對住全港最大嘅蓮花池，瞓哂身影，用昆蟲角度去捕捉影像，我見隔離個細路抄我呀，佢又瞓埋嚟影
呢個橋好過濕地公園好多， 一來無欄，二來高度同蓮花好接近，你可以近到掂住棵花嚟影，影出嚟點會唔靚呀～

行完呢段就要行回頭啦，已經夠鐘；我諗搵次唔同季節再嚟～～


聽日預告：25/9去，而家至寫？因為好多好多相，聽日睇下我影左D乜啦。。。。