我最喜愛的餐廳﹣2

上一篇已經係六月，證明我其實喜愛餐廳無乜幾間，今日呢間，個個都去過。。。鼎泰豐


之前寫過，因為老豆麵粉廠打工，自細食粉食到識分麵粉好壞同部份品種，而鼎泰豐嘅粉就係佢間廠提供，所以以前黃埔紅墈時期佢會叫我去做無間道試味，有一次佢地轉左第二隻粉，但老豆無通知我；到我食到通知番老豆，話隻粉削左，粗左粒；佢先真係信我條脷咋!

好,入正題。。。
1.香干馬蘭頭，切得好碎，好好味。2,原味水晶肉，點醋食，多多都清哂。3,我至愛嘅小籠包，而家嘅粉同台灣係同一隻，味道拉近左。4.牛汁湯麵，我比滿分，老豆話同佢喺台灣讀大學時食嘅一樣味，佢每次都點，係佢嘅童年味道。5.紅油抄手，醒胃。6，葱蛋炒飯，唔多油，主食之選。7,油豆腐粉絲湯。。。肥佬；黃埔店時期我至愛，用豬肉放湯，加D咸菜粒，麻油，今次銅鑼灣店食，竟然暗藏蝦米味，但表面又點搵都搵唔到，激氣，從此世上又少樣美食；唯有試下自己煮!


銅鑼灣店店面夠大，又多細枱；唔使好似尖咀店搭枱搭枱再搭枱，等侯時間唔長，所以而家個個月嚟

第三間最喜愛的餐廳會趕快寫埋佢