塔門。。。尋找香港絕世美景

早上六點就左身，因為要去馬料水碼頭搭8:30am早船，全程70分鐘，就到塔門啦


一上碼頭就見好多人曬呢樣野，佢係塔門名物，去到邊都有人曬或者有人喺海邊採摘；本來深到近黑色，曬一次要再洗水，做左幾次就變左邊咁淺色，沖水飲有益喎，又話係海燕窩喎，岸上有得賣，＄35細細包咋!我無賣，因為怕腥～


行一陣已經口乾，買枝咸檸茶同無冰奶茶解喝先，咸檸茶我推介


島上仲保留到好多瓦頂屋，香港少見，但顯然失修啦


沿路上就去到大草原，因為冬天實在凍太耐，所以唔多草；呢度有人露營，放風箏，夜晚又可以睇星，日頭又可以睇牛，正呀


上到頂，對住海天一色，咩野煩惱都無哂啦；下面有個石灘，落去探險先。。。


個石灘好難行，但有居民採摘紅菜，又見到近海D石有紅菜，於是去影啦，企喺塊乾嘅石上面，點知突然嚟個大浪，我機警地跳上大石，避過濕身，點知落番嚟都係跣親，手臂擦損啦，唉～（就係為左影右下果張一丁點紅菜跣親，所以點都要放呢張出嚟）


行番上草原，往塔門名勝“叠石”出發，沿住條靚步道上到山坡，有幾張靚靚觀景椅比你休息下


嚟到真係要坐下，因為個景係無敵海景嚟架



向下望就係叠石啦，企喺懸崖邊睇架喎


再繼續行去漁人新村，條步道越嚟越靚喎，個感覺似墾丁喎


睇下D水，清到見底架


原本只係需要行一個鐘嘅路程，因為行下影下，不知不覺原來行左五個幾鐘，見榕樹村有間海景茶座，即刻叫野食
老闆推介新鮮菠蘿冰，好掂呀，再加個鮮魷炒麵同炒飯，好味但咸左少少
本來一個客都無，我一坐低，竟然五張枱坐滿客，咩野事呢？
（早兩日篇燕子就係喺度影，佢地搭左巢，想見佢就要早D嚟啦）


搭5:30pm船番馬料水，時間啱啱好，船上係可以睇靚靚日落架