Thursday, November 10, 2011

熱檸水走水

曾經寫過,話而家D食客去快餐店如大家樂等多多要求。。。

以前真係水都無杯,唔知幾時開始,你問佢佢會有杯水比你。。。

咁有人要熱水,話開奶喎;有人嫌水凍要暖水;又有人要凍水比舊冰吖唔該;原來可以要茶架你又知唔知?

前排朋友去食大家樂,前面阿叔買外賣,佢話:熱檸水走水;走甜走奶就聽得多,走水就真係有創意喎;

解釋﹣。。。佢唔想飲野,但怕蝕底,攞幾片檸檬攞隻杯都好

解釋二。。。佢番去自己加水,唔使浸住D檸檬,驚浸得耐有陣澀味

解釋三。。。拎杯水都嫌重

解釋四。。。屋企有類似鑽石健康水之類嘅濾水器,一定要飲屋企D水,出面D水。。。唔飲

做服務性項業真係好攰,對住咁多奇怪要求個腦轉慢D都實比人鬧,加埋D客越嚟越大枝野,堅係超辛苦呀~

18 意見:

!? said...

啲紙杯浸得耐會放pea變形,阿叔有歷練

Leo said...

走檸吖唔該!

阿伯要嘅其實係檸片杯。

卡臣 said...

走水...指「走水貨」,阿伯跟員工的暗語

Kenneth6433 said...

真係時代不同了,想當年仲係小朋友,同阿媽去大家樂,問佢攞杯水,佢淨係比滾水,阿媽問可唔可以比凍水或者比少少冰,因為比小朋友飲,但員工話公司規定只可比滾水,阿媽話可能佢驚有客自備檸檬變凍檸水

naruto said...

!?:
拎過海咩?點會去到變形呀?

Leo:
咩野係檸片杯?

卡臣:
有道理,真係可能係暗語

Kenneth6433:
咁自備檸檬都可以變熱檸水喎。。。試下先,呵呵

舞了 said...

今日中港碼頭大廈food court午飯:
"阿姐, 杯咖啡好濃啊, 唔該加d奶丫"
阿姐望吓, 冇乜表示.
"真係好濃啊!"
"有冇加糖呀? 自己加多d糖啦."
"我係要奶呀."
"濃? 唔濃, 係咁架喇."
"唔係. 太濃喇, 真係飲唔到."
"飲唔到? 咖啡係咁架喎. 咁都飲唔到, 就唔好飲咖啡啦."
"我而家係要加d奶啫, 你加俾我就得喇, 唔駛講咁多嘢."

新鮮人 said...

檸茶走水真係幾有創意,
不過都唔算特別麻煩,
做服務性行業,
以客為先,
咁嘅要求可以接受啦!

l.minor said...

可能佢想飲檸樂,又唔想俾多d錢,所以叫熱檸水走水,自己拎咗罐可樂黎。

naruto said...

舞了:
咁呢個寸D

新鮮人:
可接受,仲慳番D水㖭

l.minor:
你好聰明呀

Ebenezer said...

個阿伯係唔係一路叫緊熱檸水走水果時,一路扭緊屎忽花?

naruto said...

Ebenezer said...
熱檸水走"水果",即係檸檬都無埋

ps:點解要扭屎忽花?

Him Cheng said...

同紅豆冰走紅豆差唔多啦。

supageti said...

我去開果間 100 分, 你買熱飲攞多杯冰都得呀 ~~~

naruto said...

HIM:
即係凍奶水

阿粉:
佢怕左你啦

舞了 said...

今日喺大x活食叉飯, 可能喺最低工資下, 樓面人手都少埋, 要燒味亞叔幫埋手. 佢幫完手又去番砧板幫斬氼燒, 我見佢冇戴番手套就切, 佢遞碗飯過來, 我問阿姐乜你哋唔用手套切嘢架咩? 阿姐先至叫阿叔換番.

而家街市d老/燒味檔都用手套切嘢啦, 做咩大x活咁落後架. 管理差d喎

naruto said...

舞了:
我成日覺得佢地攞飲筒攞你啜果個位好唔衛生

Leo said...

檸檬片加隻杯咪檸片杯囉!

naruto said...

Leo:
唉~~

Related Posts Plugin for WordPress, Blogger...