捉貓行動

星期日，約左一位貓義工阿姐幫我手將西環我照顧開果幾隻貓，捉去做絕育手術。。。

諗得好清楚好清楚，佢地一年可以生四胎，每次幾隻，咁生落去真係唔係辦法，而且佢地唔夠食又會過山頭食另外一個餵貓阿姐D貓糧，真係唔係講少，食窮人地呀；兼且閹左會少D病痛，唯有狠起心腸，今次目標係三隻，新貓媽，阿仔同阿女。貓媽因為啱啱生完要餵奶，今次唔捉住。。。

原來捕籠器都幾磅，捉三隻要帶三個，義工阿姐年紀比我大，搬唔到上山落山，所以全部粗重野我嚟。。。

因為同D貓已經建立左信任，捉佢地異常順利，不過出賣左佢地對我嘅信任，聽到佢地對住我(疑似喊聲）嘅貓叫，令我心好酸

帶左佢地去愛護動物協會，要過一晚第二日至做手術，喺果度填哂資料，就同佢地講byebye，同佢地講星期一會接番佢，叫佢地唔好驚

果一刻最担心兩樣野，第一，間中有貓會麻醉後醒唔番， 一命嗚呼；第二，驚阿女已經比隔離山頭隻金仔攪大個肚，如果係早期懷孕，醫生會幫佢做中止懷孕，但傷口會大D。。。

成晚都瞓得唔好。。。

第二日等到5:30pm，通知可以攞貓；去到，拉開塊布見到新貓媽，佢即刻好溫柔向住我叫，阿姐話呢把聲係佢認得我，同我傾計喎，同佢地講帶佢地走啦，番屋企啦，再睇下佢地個報告，有D晴天霹靂，阿女無懷孕，新貓媽反而又有左，所以做左中止懷孕啦，咁就無左幾條生命，唉!另外呢，第一次喺室內見佢地，隻隻可愛左好多，因為佢地個瞳孔放大呀，好似帶左大眼仔咁

搭的士返去天已黑齊，仲要落住大雨，個口咬住電筒，每次攬一隻，慢慢行番落山，上番的士時，全身濕哂，喘哂氣；而家隻手臂同小腿好似唔係我嘅咁，得手指可以打字咋

聽日會再去探佢地，因為驚落雨佢地傷口會發炎；原來做貓義工真係好辛苦架～

圖中係阿仔入左籠，佢好乖呀，驚左一陣就乖乖坐喺度，見我行過就喵兩聲，希望你快D好番，健健康康啦～


喺愛護動物協會見到好多動物義工，加埋睇哂佢地D單張同簡介，另我對呢種捉貓行動，絕育後再放回原居地嘅重要性，因為等於同佢地攞左免死金牌，有左晶片，漁農處捉左都唔可以人道毀滅佢，呢點好緊要～

下次有無人肯幫我手呢？