雜事5件

1/又係地產
樓下嘅舖頭執下一間，執下又一間；半年前，本來係情色用品店約滿(即係賣性感底底，X玩具果D)，變左中原；上個月，佢隔離嘅時裝店執埋，變置業18，方圓短短一個街口，無廿間都有18間地產，使唔使呀？


2/重鎚出擊
今期新假期，寄信嘅抽獎都七個，攪到要買郵票同信封，斥巨資呀真係


3/咁努力係有回報嘅，我信多勞多得架；今日又收到信啦，中左"天網逆緣“優先場


4/前幾晚倒垃圾時，一開垃圾房門，堆滿垃圾雜物，分類垃圾桶入面全部係錯配嘅垃圾，攪到我終於將自己嘅膠樽，雜誌拎番入屋。。。
第二日，隔離麻煩鄰居(唔交租賴死唔走，嗌交又爆樽果個呀），大大聲咁用國語“指揮”D搬運工人搬野走
而家諗番擺明垃圾房又係麻煩鄰居嘅傑作，所以唔好話歧視人，我只係歧視佢地嘅行為

送走瘟神，真係一天光哂

5/星期日晚，由荃灣搭小巴番西環；一對母女上車；見佢地細聲講但係個女發哂脾氣（個女大概10歲），以為乜事，原來係佢阿媽專發帶佢去荃灣剪頭髮，但剪得好肉酸喎，見阿媽猛同佢講，頭髮好快長啫，唔使咁唔開心喎，又話，紮起佢咪得囉。。。。
個女發哂爛渣，話：點紮呀？咁樣點紮呀？（做埋紮起頭髮個樣，其實過哂膊，點會紮唔到？）
繼續鬧：我要投訴佢呀
媽：你投訴人，攪到人地無左份工，咁又點呢？你上次西環果個咪仲差。。。。先至試呢個啫
女：我係要投訴佢呀，呢個仲差過上次呀。。。。。繼續鬧鬧鬧

跟住就喊呀喊，喊呀喊

我想講呢。。。佢個樣，唔會因為多兩三寸頭髮就有咩野大分別囉；咁細個就咁意投訴，要攪到人無左份工，真係恐佈；咁細個已經係怨女，大個咪聽做怨婦囉，咁小事就攪到咁，香港D細路真係無救