下晝換左房後，出去酒店外圍行個圈，好佈景
跟住行過對面嘅新濠天地，諗住買水舞間嘅飛，點知得番最貴嘅飛，放棄；但原來仲有個免費show叫龍騰喎，咁梗係唔客氣啦。。。
原來係360度天幕嚟嘅，哇!有水母呀，咪當睇左水母間囉
跟住搭的士去議事亭果邊，搭左＄65喎；去鳯城珠記食水餃麵，加埋油菜，兩個人先係$4X咋，仲平過搭車；未夠飽，再去西灣安記𡁻個牛脷飽，好掂，再加串魚蛋，哇!要串魚蛋啫，企左10分鐘至煮好，仲要唔好食；再隊杯靚茶先罷休，咦！呢檔茶好得喎～
由議事亭邊飲邊行上大三巴，結果行錯路去左小路直接去左炮台，落番嚟再行錯路唔知去左邊，向學生哥問路，佢話我地距離大三巴好遠，佢帶我地去喎（好感動呀），行左15分鐘，又到番議事亭附近，真係行左一個圈，行上D，就到大三巴啦，行左好多寃枉路
夜遊完大三巴，夜媽媽撞野呀，撞乜？咪就係撞奶囉；又食啦，但個薑汁撞奶今次真係失手喎，水稀稀架
窮家仔去旅行嘛，雖然已經11:00pm，搭巴士（$3.4一個)去碼頭轉免費酒店車番歸
12:00pm，去行下酒店商場，點解咁夜先行？日頭太多內地遊客，酒店係可以食煙架，你會見到成班張勇一人食住一枝煙，成間酒店瀰漫住一陣臭煙味；半夜嚟行就好好多啦，但間酒店真係太人工，好假
影完，返房瞓覺
太長氣，仲有一集
.JPG)
17 意見:
夜遊大三巴
好伊沙貝拉呀
夜遊威尼斯商場
好有計喎~~
夜晚大三巴好靚喎... 搵次要去下先!!!
搭的士去議事亭要$65咁貴既?!!!
我都係去過澳門一次，去探險係好好玩!!
會好唔習慣公眾地方好似商場同酒店公共地方可以隨便食煙。
唔好搶鹽﹐最好戒煙。
原來水舞間仲有咁多人睇架~
咁酒店商場係咪開通宵架？
唔知係咪威尼斯人嘅Ventilation有問題, 真係成間酒店都係煙味, 賭場直頭係重災區, 新濠天地倒不覺情況那麼嚴重!
Btw, 去議事亭照計$45-$55, 你可能比人兜路啦!
聽你講完威尼斯人大煙味,真係有d卻步
窮家仔？但你出去的時候係坐的士喎！真係窮家仔就行過新濠天地坐穿梭巴士去議事亭附近再行過去，唔使錢。哈哈
其實呢.... 齋睇相呢，澳門的威尼斯人跟拉屎維加屎的分別唔大，但實際用料及手工就差好遠呢。
卡臣:
即係似杜文澤呀？
TY：
係呀，搭到我想喺條橋已經想落車
馬田亨：
我唔係去探險呀
best actor:
仲有唔好打尖，傾計唔好大聲到似鬧交
largeheadboy：
水舞間星期三休息，可能迫哂去星期四囉
舖頭係關門架
Ocean：
新濠用隻好俗嘅香味冚煙味，都係唔成功，MGM最掂
我開頭都以為係，但之後搭威尼斯人D免費巴，原來佢上車個位要兜一個大圈先去到到過海橋果度，所以貴左，係威尼斯人的士站設計嘅問題(哇!5星喎）
l.minor：
唔使去啦
Karvitz：
之前做野試過由“海”旅門搭去威尼斯人都係$4X，咪諗住豪下囉，$6X就豪唔起架啦
拉屎維加屎。。。呢個詞我like
窮家仔搭 $65 的士？我都未試過（晌澳門）~~~
窮家仔?
咪講笑!
間酒店外表好浮誇,
免費遊就ok,
自己俾錢就唔好了,
行吓無所謂,
用錢住?
留返俾啲大陸豪客啦!
supageti:
咪就係搭到變左窮家仔囉
新鮮人：
呢隻浮誇打正佢地品味
如果去影相攞影, 威尼斯人外觀ok, 不過就好明顯好似怖景搭出嚟咁囉.
水舞澗宜家都係要預定, 即場去真係無咩機會買到飛.
照計都會去下幾間賭場參觀, 係咪下次講啊?
sunsun:
水舞間有貴飛，窮家仔無錢睇啫
賭場真係無去喎，貪臭咩，係有去新濠天地買飛囉，今晚會寫埋去mgm借厠所囉
去到淨係食都正啦:)
Ebenezer：
行下影下食下，咁咪就係正囉
MGM有免費支裝果汁攞, 唔賭都要去攞, 咁先夠窮家仔嘛
Post a Comment