澳門威尼斯人包食包住免費兩天遊﹣1

前文提要：參加U-magazine抽獎遊戲，得到澳門威尼斯人酒店雙人套房一晚連船票連一餐早餐或自助午餐連咀香園杏仁餅連曼聯訓練遊戲一次。。。好，去片

一早由尖沙咀出發，諗住搭11:00am船，點知早到兼有10:00am船飛，提早出發

由碼頭搭免費接駁巴士去酒店，如意算盤係先食左佢個自助午餐，點知。。。。

check-in當然太早未有房，連coupon都唔到手，無得食住，咁就搭的士（＄17）去氹仔食朱扒飽，又點知。。。我鍾意嘅朱扒朱仔飽係要2:30pm至有嘅，上午得番餐飽或菠蘿包，仲加價到$20一個（唔包飲品），我要左餐飽，都真係好食嘅，貴D啫


食完就行下影下相啦，話咁快就去左鴻杉記食牛雜，好慢呀澳門嘅節奏，等左好耐，但真係好好食


食飽，行去嘉模前地湖邊果邊，一來天氣唔靚，二來，以前好靚嘅荷花池連葉都謝埋，唯有影下教堂同小花地。。。
咦！菏花池對面果座咪威尼斯人，咁近嘅，行番去都係10分鐘，慳番車錢


check in啦，間酒店太大，真係太大，由大堂行去南翼房搭lift，上到23樓搵55號房，行過一條酒廊，再行過第二條酒廊，第三條至到，由check in到房間，行左15分鐘，痴線～（更痴線係，呢段路呢兩日仲要行好多次）


話哂係五星酒店(有人話六星㖭），梗係有D期望啦，入到房，好大呀，真係分兩層呀，電視都兩部呀，好豪華呀(雖然係舊式嘅豪華），但係。。。。


我睇皆大歡喜，見其中一個電視仲係大牛龜（哇!又話五星嘅）；開下櫃見到有個紙袋，咁巢嘅？好環保喎（哇!又話五星嘅）；無啦啦意大利設計，攝張國畫，又九唔搭八喎；仲有塊鏡，一dart dart架（哇!又話五星嘅）；仲有，間房無wifi，想要呀要比$160架(梗係唔要啦）
朋友沖完涼，話個花酒漏水嚴重兼水慢（哇!又話五星嘅）；拎起個電話想叫酒店搵人整，原來電話都壞Q埋（哇!又話五星嘅）；結果係。。。同我地換房，由55轉去77，即係再行遠D


換房後，間房其實一模一樣，最滿意係個厠所啦，大到可以開枱，馬桶又獨立一間房，見到佢都覺得孤寂呀，孤令令～




寫唔切，聽日繼續