大食客

搬番出市區，街去多左，野都食多Ｄ。。。

1/鍾意食綿花冰，見到（茶軒）有得食，下午茶時段仲買一送一，試下啦；麻麻啫，我鍾意嗰隻要有煉奶＋好多豆，呢隻乜都無，得果汁味；
香港邊度有我鍾意嗰隻食？


2/去北角買夜冷工作椅，行到攰，食(明記)，涼粉冰消暑，正！
有一對樣衰情侶買外賣,老闆客氣提佢，咁食會撞，個女嘅寸到話：叫你整你就整啦；老闆事後呻好心著雷劈，佢話如果唔講，食到疴又嚟告佢，提你你又寸成咁，佢決定以後唔做呢兩個人生意；
喺現場真係好好睇呀！


3/好多年無幫趁銅鑼灣嘅(ＢＥＥ)，日式咖喱都好難唔好食，水準一般啦！但點解侍應全部係賓賓嘅？



4/自細鍾意(南亞)，鍾意豉油牛扒，亦鍾意pancake，而家銅鑼灣間舖勝在夠闊絡，無咁嘈呀！
當日有兩公婆坐喺附近，個Ｃ９個樣愁到呢，以為有乜事，跟住阿女嚟，父女傾計兼叫野食，個Ｃ９都無搭咀，剩係擺出一副拜山樣，直至第二個阿女嚟，阿爸先講原來阿媽等食飯等到胃痛啦！車，一早嚟左，唔識嗌住野食先咩，駛乜成餐飯唔出聲兼擺出一副愁容呀！攪到我食野分哂心！
人胃痛佢胃痛，食到連阿女嗰碟都食埋！


5/番嚟西環，樓下有間權發，三個禮拜食左七次，勝在夠鑊氣，菜芯炒牛肉一流，西檸雞好香檸檬汁又惹味，仲有我平時少食嘅椒鹽瀨尿蝦，送啤一流


6/祥香園食得最係多蛋撻,原來雞批都好得，但今日推介嘅到食物罪惡之首嘅西多士，好肥嘅牛油加糖漿，好味好甜，甜到入心。。。。。但真係好罪惡




食飽等Ｘ