Wednesday, March 7, 2012

東京.伊豆.輕井澤の旅﹣day3 (上)

日日都有D意外,但今日,好多意外囉~

第二日晚,見到K's house嘅職員時,問佢地伊東係咪睇日出嘅好地方,佢答係呀,行出海旁就睇到啦,行5分鐘就到,佢仲即時上網check埋日出時間,係6:15am,於是我地決定6:00am起身

第三日6:00am,面都無洗牙都無刷就仆左出去,天已經光光地,好凍,車頂有霜架,係咪有D捉蟲呢?


海邊原來係一個碼頭,仲有個靚燈塔


但原來太陽唔係喺海面升起,比座山隔左一隔喔;睇唔到咸蛋從海面升上嚟嘅畫面


隔離有個空地,放左幾件好靚嘅雕塑,配上日出嘅天空,好靚呀


因為要搭7:30am嘅踴子號,要走啦,byebye


行番去至發現,旅館旁有棵櫻花樹,仲要盛放中,噚日山長水遠去河津究竟為乜呢?


好啦,意外嚟啦;人就好衰嘅,好有慣性,月台得兩個,噚日1號月台搭車去河津,就老馮行去1號月台,仲影相等車到,其實我影到嘅呢架,咪就係我想上嘅車囉,人地今日由伊東開出,所以泊左喺二號月台;結果,車走左我先如夢初醒,唯有搭下一班車啦,不過變左慢車,前後就嘥左一粒鐘


為左偷番D時間,早餐喺便利店買麵包攪掂,幾好食喎


去河津七淹係要搭巴士架,但上車時,佢派上一張通告,原來因為山泥傾瀉,其中三淹封左,包括有伊豆舞娘地標嘅初景淹,頂,地標都封左,激死呀,但車錢又比左,唯有死死地氣出發啦~
另外,本旅遊書話河津站行去瀑布25分鐘,真係行佢個死人頭呀,肯定佢老點啦,搭車都要咁嘅時間呀


途中經過嘅呢條橋都係名勝嚟架,幾層樓高,轉呀轉,好似玩機動遊戲呀


得我地同一班嬸嬸落車,開頭跟住佢地,但見路牌指行兩分鐘去到步道,有吊橋,決定唔跟自己行啦
好長嘅梯級,落呀落呀落呀,人都無個,得森林景,諗起套高山症之戀


行左約15分鐘,追番班嬸嬸,佢地啱啱參觀完第一淹﹣釜淹
好,問題又嚟啦,本來一條路由上行落去逐個瀑參觀,而家條路封左,點行呢?
嬸嬸沿路上番去,而我前面仲有兩條路,大路封左,明顯係原本要行果條啦,左面有條細路都係向上行喎,但牌都無個,點呢?
我地決定跟嬸嬸,因為驚迷路呀,驚鄭秀文搵唔到我呀。。。又錯啦~



行到山腰喘哂氣至有個地圖,原來條細路係去第二淹架,無力落番去啦,七淹瀉左三淹,仲要自己放棄一淹呀
班嬸嬸又奇喎,做乜唔去第二淹呢?真係一個謎呀~

佢地行得慢,最後都追得番,原來我地係繼續搭番巴士去第五淹呀


真係寫到我都無mood啦,抖抖,聽日繼續

13 意見:

卡臣 said...

我鐘意那座男女石雕

naruto said...

卡臣:
果座石雕會再登場,點解呢你估?

black lab said...

離開伊東嗰程火車,有冇訂車飛?

largeheadboy said...

上咗車至派通告,好明顯有人想呃咗你地上車先喎~

條 tum tum 轉天橋原來喺呢度架~

naruto said...

black lab:無呀,hehe

大頭:唔好話呃啦,賣飛果個老人家嚟,可能唔識講

天橋。。。係呀,你都去 tum下啦

l.minor said...

火車走咗,要唔要再俾錢買過飛?定係用pass?

你買邊本旅遊書?咁老點?反光閃閃果本?

果條旋旋橋會唔會旋到頭暈?

幾個淹行哂要幾耐呢?

naruto said...

l.minor:
今次無專登買書,撕哂D舊書去,因為伊豆都無新野update,其中有閃閃令果本,但真係唔記得邊本錯囉

火車用pass,唔使補錢

橋:追住影,少暈架

淹:我地兩個鐘行完(三個),但相信七個唔會差太遠,因為唔使等車,唔使向上行

TY said...

做乜咁氣餒呀? 不過好無地標睇又真係慘D既!!!

我覺得伊豆地區都好多呢D雕塑.. 幾好!!!

Cat said...

又真係幾多意外喎。大叔平日好似Lucky D,同醒D個喎。

ayclui said...

大叔平日好似Lucky D,同醒D個喎 --> 結論係: 依豆唔啱大叔你囉~

Ellen老師 said...

咁經歷先好玩呀!

陳娃 said...

從車既倒影.. 我睇得出大叔靚仔左 !

naruto said...

TY:
都係講下啫,當時心情其實OK的

Cat:
呢舖真係一D都唔醒

ayclui:
咁。。。輕井澤都係喎

老師:
留番比你啦:)

www:
有眼光

Related Posts Plugin for WordPress, Blogger...