電話總在不適當時候響起

我電話不多，每日其實只會響起幾次，但好多時都係喺不適當時候響起，有時真係覺得討厭。。。

第5位﹣沖涼先打嚟
阿爸阿媽打嚟，撞啱我沖涼嘅機會真係超多，但係我明明無定時間沖涼，咁都可以撞到咁應嘅？
濕datdat夏天衝出去聽又攪到通屋係水，冬天，分分鐘凍死我呀!

第四位﹣踎塔先打嚟
有個客仲邪，上兩個星期跟佢份job嘅時候，有兩日，次次打嚟我都係踎緊塔，係唔係咁唔老黎呢？阻住人happy hour

第三位﹣最論盡先打嚟
你坐巴士電話唔響架，但一埋站起身落車最搖搖晃晃果陣呢，電話就嚟啦，攪到你一仆一淥，呢類通常都係電話廣告，呢個時候無人會聽你sell野，只想打你

第二位﹣講緊另一條線
明明少電話，但永遠講緊時就會有另一條線打嚟，攪到我有好似好忙嘅假像

第一位﹣瞓覺先打嚟
最近連環幾次發生；
你地會幾夜先唔再打電話比朋友呢？因為人要瞓覺架嘛！
我個工作上嘅夥伴﹣記者妹，日頭就唔做野，成日10:00pm後先打嚟講公事，試過夠膽死點幾都仲打嚟。。。
上星期五晚，因為攰兼第二朝會去東平洲，所以11:15pm就瞓，啱啱瞓著，電話又響，因為電話放左喺廳，又凍，梗係唔聽；
響完，個心醒左，又驚可能有乜緊要事，又驚係某朋友D感情出事，又或者係表妹結婚有野問，結果原來只係記者妹問我下晝個mail嘅報價，下晝講佢唔明又唔出聲，真係打得少呀!

預告：係呀，星期五凍冰冰都決定星期六去東平洲影相，聽日出街