金鳳餐廳的笑話

今日，去旺角買野前，先去深水埗唧金鳳食個lunch，十幾年無嚟，當食個回憶都好。。。  

好掛住個牛頭鐵板呀，越嚟越少餐廳用呢塊板啦；食物質素一般，但呢樣唔係今日重點  

話說係要搭枱嘅，對面坐左一對約五十男女，衣著光鮮

 （我濃縮佢地嘅對話重點）

男（問侍應）：今日無午餐？
侍應：無午餐，餐睇頭幾版，有扒餐
女（問男）：咁你食乜呀？
男：我想食飯，你都叫個飯啦
女：咁咪無湯飲囉
男：唔好飲囉
女：隔離枱碟沙律好靚喎，乜嚟架呢？
侍應搶答：燒雞沙律
女：有無跟湯架？ 侍應：無跟湯，有麵包
男：咁我要咖喱牛啦（我心諗，攪左咁耐終於有決定，其實我已經cut左至少一半對白架啦）
女：吓，扒又係牛，咖喱又係牛？
男：咩呀，叫飯加沙律嘛，唔食扒架啦
女：咁我咪無湯飲（好堅持個湯囉）
女：咁啦，叫個扒餐再叫沙律，咁咪有湯囉（即係cut你個飯呀）
男（同侍應講）：一個燒雞沙律，一個牛柳餐
侍應：牛柳幾成熟？
女：七成
男：六成：
女：六成咁生
侍應：七成定六成呢？
男：你同我落六成吖（即係唔鬼理妳呀） 
當侍應放刀义嘅時候：邊個食扒？
男：放佢果邊
男（同女講）：成份你食哂
女：玩咩，我點食得哂呀 
我已經笑左出嚟同我朋友講（細聲）：呵呵，要人食哂份扒，但又要嗌六成，呵呵
朋友：你自己問下佢地啦
 ﹣﹣﹣﹣﹣﹣﹣﹣﹣﹣﹣﹣﹣﹣﹣﹣

佢地一路食一路彈。。。
女：個扒咁多彭沙，又多味精
男：個沙律果D係乜雞嚟架？
女：我諗係火雞囉，D菠蘿罐頭架。。。 
﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣
侍應：叫左餐飲未？
男：一陣先叫
（隔左幾分鐘）男：叫奶茶囉
女：而家叫咪凍哂囉
 (隔左一分鐘)女：而家叫啦

 唔唔唔。。。原來隔一分鐘就唔會凍哂

﹣﹣﹣﹣﹣﹣﹣﹣﹣﹣
所以呢，食物質素已經唔重要，我掛住聽，唔記得食左乜

完