Sunday, May 20, 2012

怪人系列之。。。。怪師奶vs怪師奶

落街食碗麵

落左柯打等麵期間,一個師奶埋嚟搭枱(我認,我係怪師奶磁石)

一埋嚟就咳幾野,心諗:咳唔好坐埋嚟啦

跟住,師奶伙計拎我碗”腸肚麵“嚟。。。

怪師奶望一望,跟住問:有腸呀?

師奶伙計:有呀,想食乜吖?

怪師奶:有大腸呀?

師奶伙計:有呀,你想食乜吖?(咦!重播喎)

跟住沉默

我埋頭食緊我碗麵,望一望,原來師奶伙計走左,而對面嘅怪師奶竟然。。。入左定,雙眼望住筷子筒,無表情,呆哂

師奶伙計又醒呀,你入定佢就走人

隔左兩分鐘,怪師奶醒番大聲話:寫野呀

無人理佢喎,咁師奶伙計(S)又真係忙緊其他野

隔左一陣,頭先個師奶伙計走埋嚟問:食乜呀?

怪師奶好大聲夾無準咁答:腸

師奶伙計:腸乜呀?

怪師奶:腸。。。肚米麵

師奶伙計:腸肚咩野?

怪師奶:腸肚河,都係河粉啦

師奶伙計:飲唔飲野呀?

怪師奶:。。。。

師奶伙計:飲唔飲野呀?

同一時間有人嗌外賣,師奶伙計走去落單,跟住唔再問佢飲唔飲野啦,因為,我都留意到,怪師奶又入左定啦

但食野絕對正常喎,無入定喎
﹣﹣﹣﹣﹣﹣﹣﹣﹣﹣﹣﹣
同朋友講起呢件事,佢話可能係精神有問題果D,但我睇佢外表真係正常喎,就好似樂壇某兩公婆咁,外表睇好正常架,但無新聞果排就會話自己抑鬱咁囉

10 意見:

攞你命三千 said...

可能呢期輸股票輸到痴痴呆呆

卡臣 said...

成篇的重點在最後兩句

naruto said...

三千:
都有呢個可能

卡臣:
果個唔係重點,果個係汚點

新鮮人 said...

我都成日見哩類人,
牛頭唔搭馬嘴,
叫咗伙記埋黎又十問九唔應,
仲要同一個問題要人問幾次,
兼無答案,
不過唔單止係怪師奶,
有唔少怪怕伯都係咁架!

Tat said...

佢見到同枱的靚仔呆咗

naruto said...

新鮮人:我係師奶磁石,少撞見怪叔叔

Tat:又真喎,都係我衰

Tat said...

估到的,師奶當時入晒定,又語無倫次,不過唔知當時你係咪放隻食指係口唇邊咁對住佢咋。

naruto said...

Tat:腳趾

laulong said...

哇,你攝晒啲怪師奶好喇,唔好漏番一兩件出黎!

naruto said...

laulong:
怪師奶我邊有本事攝得哂呀?你估得一兩個咩?

Related Posts Plugin for WordPress, Blogger...