Thursday, May 31, 2012

一路好走

今日接到朋友電話,見佢吞吞吐吐,第一個反應問:Clara有事呀?



點知真係開口中;我朋友Clara噚日走左;事前無通知朋友,唔知乜野原因走左。。。

識左20年,當年係我好同事嘅女友,佢同男友住天水圍,我地係鄰居;後來,佢地分手,我地反而多左一齊食飯。。。

後來我上廣州工作,最後果年,佢每個月都上嚟搵我食晏,再唔細心都會諗:做乜定期會上嚟呢?直接問佢,得出結果係原來佢有第四期癌症,全身有三個地方都有癌細胞,佢上嚟係睇醫生,因為佢本身讀中醫,有個廣州教授幫佢覆診;佢同香港醫生合作,中西合壁,仲加埋氣功,最後竟然可以成功康復。

我記得佢講過,佢地四兄妹,因為其他三個先後出事,所以醫生叫埋佢check,點知真係有事,係遺傳;

佢家姐同阿哥用西醫治療,最後都係唔得;佢決定行另一條路,中西合壁做白老鼠,因為佢話:我有兩個姪,就算醫唔好都可以比多D數據佢地參考,結果,佢成功左,肝個腫瘤由五蚊銀縮到變細過一毛。。。距離而家都多過五年啦

康復後,佢中醫亦畢業,佢決定轉行,掛牌做中醫,我好多朋友都有去幫趁,因為佢除左醫病,仲用針灸幫人減肥,一話減到肥,即刻成堆舊同事去幫趁,但佢只做女賓

有成一年多無見佢,我又係唔細心,以前過年過節佢總會打嚟傾閒計,今年無,我竟然無發覺。。。

當年,個個朋友話佢似梅艷芳,真係一語成讖。。。

Clara,您喺我心目中係一個非常硬淨嘅強人,希望您一路好走,有緣嘅下世見

今日做唔到野走去睇展覽,見到呢句,入晒肉。。。

係陶淵明嘅詩。。盛年不重來, 一日難再晨; 及時當勉勵, 歲月不待人

16 意見:

卡臣 said...

節哀...

攞你命三千 said...

保重

其實好少好少cancer可以叫做醫好,佢可以延長生命咁耐已經算係咁

best actor said...

Take care. My condolences.

largeheadboy said...

一路好走...

l.minor said...

Take care~

Karvitz said...

祝她一路好走。

Quincy Luk said...

節哀順變...

TY said...

節哀順變..

supageti said...

Clara 既日子係賺左,而佢亦無浪費到 ... RIP ~~~

the inner space said...

命裡有時終須有!

ayclui said...

節哀順變...

人生就係咁,要珍惜每一天, 同埋唔好咁執著...

EITAK said...

r.i.p.

新鮮人 said...

不需長久,
只要精彩,
活得暢意,
無怨無悔!

Cat said...

有時真係要珍惜眼前人。

但係聽你咁講,相信佢已經活得精彩。

馬田亨 said...

RIP,大叔你都要保重!

SKII said...

宿命!RIP.

Related Posts Plugin for WordPress, Blogger...