Friday, February 10, 2012

南海一號

人物:
舊女同事F(剛從北京番嚟放假)
舊女同事C
舊女同事E(美食專欄作家)
我(靚仔)

舊同事F一個女子上左北京發展,最近番嚟放假,相約食飯,一行四人,其中一個舊同事E身份已從記者妹變左美食家,喺報章寫美食專欄;咁地方當然佢話事啦。。。佢揀左i-square嘅南海一號

佢話未食過,米豬蓮有一粒星,試下喎。。。出事啦~~~

食新派粵菜,環境優美,燈光昏暗果隻,點菜當然交比食家,我地無過問

上左幾碟菜,食緊嘅時候,舊同事E突然話:咦!有鵝肝嘅?我叫九層塔炒牛柳粒喎,九層塔呢?

舊同事F:頭先上菜時,佢聽到上菜waitress話係鵝肝炒牛柳粒

跟住佢想夾,舊同事E阻止,話:唔好食,問清楚先,一陣佢話呢碟野五百蚊咪大劑

叫左waitress(A)嚟問:呢碟係咪九層塔炒牛柳粒呀?

waitress(A):我唔清楚,請等等,跟住叫左waitress(B)嚟

舊同事E:我地叫左碟九層塔炒牛柳粒

waitress(B):呢碟係炒牛柳粒啦

舊同事E:呢碟係九層塔炒牛柳粒?

waitress(B):係呀,你叫左兩碟牛柳粒咩?(撩交嗌喎)

舊同事E:咁九層塔呢?九層塔唔係香料嚟架咩?

waitress(B):九層塔只係一個名。。。。。

我地O哂咀

佢行開時仲要細聲同waitress(A)講:九層塔喎(不屑語氣加面口果隻)

舊女同事F:做乜香港變成咁架?

舊女同事C:如果發生喺茶餐廳就話預左啫,而家米芝蓮一星喎,粒星呃番嚟架?

舊女同事E好嬲,即打比佢餐廳集團嘅公關,講明件事。。。。

幾分鐘後,見到一個男經理同女經理密密傾,跟住女經理走嚟道歉,話佢知個同事語氣差,又話要煮過碟牛柳粒比我地品嚐(我地話唔要,因為真係飽啦);

咁佢話:送個甜品你食吖,我都係話唔要;佢突然好認真咁話:比過機會我地補償啦

從語氣中,我知佢地一定係(hi)鑊啦,我話:好呀,我想食甜品呀。。。。。

坐喺度果個揸筆搵食,唔寫衰你,喺佢個圈子唱幾野都夠你死;

兼食物其實一般,似呃鬼佬菜式,加埋服務咁出色,果粒星點嚟架呢?真係對住維港就加咁多分?

16 意見:

Tee said...

我都食過一次lunch,都ok ge...
不過嗰次啲waiter waitress其實都好新手,問乜都唔係好知。
雖然我冇揸筆朋友,不過我啲friends遇到尼啲情況,一定據理力爭。

卡臣 said...

一粒星....X拿星

邪留丸~ said...

佢請埋啲咁高質數嘅侍應...
好快"摺"得囉~

Cat said...

米豬年係要黎呃外國人(唔一是鬼佬。)快D叫你舊同事寫篇冇九層塔既九層塔牛柳幫佢宣傳啦。

black lab said...

超同意樓上隻貓:「米豬年係要黎呃外國人」
好彩我一向都唔多理食評,我鍾意自己揀。

個 waitress b 份人好賤,雖然只係得一句對白。

放心啦,呢間個名已經臭晒,臭到去東京。我會提醒我d日本朋友去香港玩嘅時候要「留意」呢間架喇。

naruto said...

Tee:
呢個價錢,我expect食物會好D囉,而家其實一般

卡臣:


邪小姐:
做一盤生意真係好難,請著個咁嘅伙計真係聽執

Cat:
佢。。。我估佢唔寫,但見人就講

black lab:
我都唔理食評,橫掂D口味都唔同人嘅,我問阿食家,覺唔覺隻雞腥腥地,落左D乜,佢都食唔出,我就食得出,係瑤柱汁。。。所以信乜鬼食家

waitress b講左幾句野喎

chiseenjai said...

班細既唔生性, 米要大粒野去補獲LOR.

但係衰左先補獲, 有用咩?

唉!

l.minor said...

九層塔炒牛柳粒未食過,呢間野都未去過,其實九層塔係乜呢?真係香料?

咪豬年我只係食過潻好運,又真係幾好食嘅

naruto said...

chiseenjai:
無用,都係列入黑名單

l.minor:
九層塔係香葉,以我所知唔同地方唔同品種有唔同名,羅勒,thailand basil都係呢科

TY said...

其實米豬蓮真係唔係話超級好味, 就算去龍景軒都係咁上下, 不過服務就真係好過你呢間既~~~

naruto said...

TY:
我食野口味“獨特”,無必要幫趁米豬蓮

ah D said...

你朋友係食評家就可以打個電話即刻投訴, 換著係普通人就要帶住一肚氣走, 所以依啲米豬年都係有名無實, 俾粒星佢咃就即係俾佢哋有機會混水摸魚, 呃人錢!

black lab said...

re Naruto: 「一句嘢」我意思係,最尾佢只係同 waitress a 講咗「一句嘢」,就已經反映出佢嘅為人。

攞你命三千 said...

衷心希望侍應B唔係以為將d牛柳粒搭起幾層就叫九層塔

naruto said...

ah D:
係架,所以我唔信呢D野

佢裝修到南海一號呢個名稱都係一隻船,原來係賊船

black lab:
明哂

三千:
佢擺明“灑”我地啦,但邊過到骨架,當人儍架咩?

SKII said...

我一向都唔 buy 米豬蓮... 又或者應該話,我唔識欣賞!

Related Posts Plugin for WordPress, Blogger...