講下我老豆

幾個星期前，當plan一月會去旅行時，單聲比屋企聽啦!阿媽先講原來老豆好想農曆新年去旅行；咁舊年全家去唯獨無我，因為我要去墾丁，撞左期；咁今年梗係做番野啦，係咪？老豆想去泰國，知我熟路，要我帶團喎！

於是，上星期，去左幾間旅行社夾價，剩機票都$3XXX，兼一定要5日，咁我梗要詢問意見啦，曼谷玩5日，真係有乜玩呀？
咁我打比老豆話有兩個日期佢揀，你想年廿九定三十出發呀？同埋通知佢家姐姐夫，細佬弟婦全部去，點知換嚟一句。。。下，細佬都去？咁咪全家搭埋一架機。。。我真係呆到個電話dead哂air，剩係彈番句，乜你唔係想全家去旅行架咩？

﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣
逄星期二係family night，全家會去爸媽屋企食飯，每次都係八點食，我就會七點半左右上到去，通常我都係最早，去到只會得阿媽煮緊飯；而老豆因為逢週二，四，日都要打波，所以會留比佢。
上星期出左街喺理工對出上左巴士返去啦，架巴士有條肥佬鬼咁嘈，咁我咪聽歌囉!條褲又真係闊，電話震都唔知，都我起身落車，聽到電話，對面傳來細佬把聲：阿哥，你喺邊呀？
我：搭巴士喺屋企樓下
細佬：你做乜唔聽電話呀？
我：咩野事呀？
細佬：老豆打比你“好耐”，你都唔覆，以為你暈左，而家飛的去左西環搵你。。。阿媽叫你上嚟先
返到上去，阿媽都癲埋：做乜唔覆電話呀？
我：做乜呀？幾耐呀？
媽：半個鐘啦!
我：你地平時打極搵唔到都唔止半個鐘啦
細佬急call家姐：快D番快D番，阿哥又闖禍!
我：你地咁攪到人精神緊張呀!
細佬打比老豆叫番佢番嚟，哈，無人聽。。。

老豆番嚟話：今日無波打啫，就攪出咁多事啦（你知就好）

﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣
旅行終於落實去“北京”，真係唔凍唔去呀呢舖。。。
噚日，又星期二啦，家姐告知佢訂嘅北京香港賽馬會會所已經confirmed

老豆番，話佢知酒店攪掂，佢轉頭同我講：好凍喎，你去嚟做乜？
家姐：你做乜唔比佢去啫，成家人旅行嘛！
老豆：無人餵魚呀
家姐：比哂錢啦，無得改啦
老豆：下？要錢架咩

全家O咀!
-----------------------------------
後記：北京呀!結冰呀!好多人呀!水立方鳥巢長城都無興趣呀!睇下呢舖太陽之子仲發唔發到功？不過喺中國，我無信心