Tuesday, December 4, 2012

我認我係怪人磁石啦

點解我附近咁多怪人架?你地附近都有嘅,無講啫,吓哇? 

星期日晚,旺角搭紅van返西環,我坐單人位尾二果個,有對年約三十左右嘅男女坐雙人最後果行。。。

開始留意佢係因為個女嘅突然大聲話:做乜買呢隻呀?我唔用呢隻洗頭水架 

男(仲大聲):有件八婆頂住吖嘛,咪買左呢隻囉。。。 

我望過去,個男嘅攞住一個藥房膠袋袋住枝綠色RExxxxx洗頭水 

隔左一陣,個男嘅打電話(好大聲):喂德X呀,叫幾個餸,一陣嚟攞。。。 

繼續講:一碟鹵水鵝,一個蠔餅,一碟青口。。。咩野話?青口賣哂?

同女人講:青口賣哂喎

女:er....er.....er....er

男:喂,快D,唔好阻人咁耐

女:咁,要蒜子浸豆苗啦

男:要蒜子浸豆苗。。。吓,豆苗賣哂?

女(發爛渣):又賣哂,啱啱開門就買哂 (但其實8:10pm架啦喎)

男:咁要乜呀?

女:呢度淨係推介呢幾樣咋嘛。。。(原來佢用電話上網睇食家comments) 

男:我老婆問你有有乜好食呀?。。。川椒雞球喎

女嘅又無反應喎

男人同電話講(大聲):要住兩樣先啦,轉頭再落,電話係XYZXYZ。。。我姓X,我一陣嚟攞,我揸緊車嚟架啦(吓?)

之後女嘅想要烏頭,男嘅唔食;

男嘅想要沙爹芥蘭炒牛肉,女嘅唔食牛;

男嘅想要豬肚湯,女嘅話叫啦,我食一件啦;

女嘅想要蝦蟹棗,男嘅又唔要

女嘅重提要烏頭,男嘅妥協話一人叫一樣啦,女人嘅又話食唔哂

女(大大聲):一生一世啦,天荒地老啦,再唔嗌天荒地老都無得食啦;事實係呢程車全程20分鐘,仲有5分鐘就到德X架啦

最後結果係上湯浸時蔬(咪就係攪野囉,之前話無豆苗,正路都係問下有乜菜架啦,玩咁耐,玩到兩個上哂火)

男(電話):喂,我加碟上湯浸時蔬。。。

之後,突然傳來大聲打機聲,原來個女嘅唔上網就打機,仲要開大聲打果隻,但又繼續大聲傾計架喎

講到最尾又係問,點解而家D人質素差左咁多嘅?(包括個樣。。。)




10 意見:

新鮮人 said...

其實佢哋"撞聾",
聽唔清楚人家講什麼,
所以咪講嘢大聲,
打機大聲﹐
乜都大聲!

香港人一般都好易燥,
又易上火,
無耐性,
好易有口角,
這些都很常見,
我都好怕人家大庭廣眾咁大聲講嘢,
但係都係辦法,
你開聲話佢咪又係變鬧交,
人家回駡一句"你怕嘈咪唔好出街囉",
到時真係唔會點反應至好呀!

卡臣 said...

哈哈!真係吹脹,叫佢買私家車啦,嘈Q哂

ayclui said...

大叔你咁好記性嘅? 不過我又真係好怕D 人大聲講o野...男女都咁騎LEI, 真係天生一對~

Quincy Luk said...

最憎啲人嘈喧巴閉...

naruto said...

新鮮人:擺明係蠻不講理嘅,真係無謂出聲,實係比人鬧“獲”金

卡臣:我諗佢應該係有車嘅,講得咁順口

ayclui:短暫記憶咪強囉,其他就。。。


quincy:但無計,我地越嚟越變少數,嘈喧巴已經係王道

TY said...

臣臣: 相由心生!

chiseenjai said...

仲有係中獎達人!

PanLa said...

嗚嗚同感。早上坐車呢D人會訓覺所以會好靜,一放工就好嘈,就算塞塞塞塞塞住對耳仔依然會聽到斜對面個師奶講野,仲要超級清楚,佢個仔唔飲湯唔食菜T_T...我真係唔想知...

naruto said...

TY:堅係

chseenjai:係就好啦

panla:你答咀話,唔食菜會便秘架:)

the inner space said...

Overheard 在香港特別常被逼聽到!

Related Posts Plugin for WordPress, Blogger...