老豆食大閘蟹

阿爸阿媽每個星期鍾意嚟一次西環搵我食飯，次次都係去權發，老豆鍾意食海鮮，我喺我可以食嘅範疇內盡量應酬下啦。。。 
蒸聖子，鮑魚仔，灼海蝦，椒鹽瀨尿蝦呢四樣係我食到嘅，蒸聖子直頭好味呀～  
入正題。。。 上星期五晚，我同阿媽先到權發，我見到門口有張大閘蟹海報，每隻$38，我話：老豆實叫啦，咁抵食。。。

阿媽：唔會啦，屋企浸左兩隻（酒浸）都未食呀。。。 

老豆到，開口就話：$38一隻咋喎，叫兩隻嚟食囉

 媽：屋企仲有兩隻喎

老豆：果D生，呢D熟，唔同食法

 結果叫左兩隻，仲自己出去揀蟹㖭

蟹到；老豆拆嚟食：哇！好多膏呀／哇！靚到吖／哇！公司果頭四十幾蚊都無咁靚／哇！好耐無食咁靚啦。。。係咁哇～

期間，老闆嚟傾計，我問佢，海報寫住堂食$38，外賣$48，外賣係生定熟架？

老闆：生熟都要＄48，因為當招徠，益街坊；一至五就賣$38咋，星期六日就賣$48

老闆走後，老豆繼續自言自語：好正呀

我：咁鍾意咪下星期一，二搵日再嚟囉

老豆：如果係同一批擺到下星期就無咁靚，如果新一批又唔知有無咁靚。。。 

我：咁你咪比多$10買兩隻生嘅返去聽日食囉，如果真係正成咁，貴$10都抵啦

結果。。。佢叫多兩隻，叫人蒸埋，佢話拎返去食；我以為佢聽日食，原來佢話消夜

我當時一定O哂咀 佢又驚人地話佢拎走貴$10喎，叫我拎定個外賣膠袋，蟹一到就入袋再入老媽個環保袋，好似偷野咁，其實以佢同老闆而家嘅交情，我唔信老闆會收佢$10囉

 ﹣﹣﹣﹣﹣﹣﹣﹣﹣﹣﹣﹣﹣﹣

星期日食左屋企兩隻醉蟹，星期一阿媽又整多四隻佢食；

今晚，即係星期三晚，佢主動又嚟，我話佢食得太多啦，佢未到時把口話叫兩隻食下，趁我未到又叫左四隻，唉～

佢話自己膽固敦偏低，兼飲大量醋，唔怕架喎。完全無佢乎

佢食嘅時候，話：估唔到今年咁快就食左十隻八隻。。。

我糾正：星期五四隻，跟住兩隻醉蟹，星期一四隻，今晚四隻。。。。係十四隻呀老豆

佢竟然。。。“炸”聽唔到