NO.1+錦衣衛

最近遇到幾個第一

去北京，第一次喺一號閘口登機


新年去唱K，竟然係一號房

用贈券金鐘睇戲，又係一號院


細到吖，得39個位咋，明明買第二行，原來前面係輪椅位，又變第一行；呢場全院滿座，恭喜哂！(係呀!真滿架，你見唔到咩？）


睇嘅係宇宙第一嘅甄子丹主演嘅錦衣衛，我仲要係第一次睇甄生嘅戲


大陸投資，香港導演，但套戲都係好大陸，似龍門客棧（七十年代果套）；作為賀歲片，好夠薑，海報入面五個主角，死剩一個，大吉利是，你估下邊個唔駛死？

非常愛用超大頭，大到見到原來徐子珊眉角原來有個暗瘡凹位，甄生條雙眼皮假假地喎，趙薇最慘，又巢又鬆，當年小燕子已經變左月巴燕；
連戲入面佢竟然多次笠住頂帽就可以扮甄子丹就知導演都覺得呢隻燕子好大隻

最好玩角色係徐子珊，首先佢個名叫“脫脫”已經夠玩野，絕招真係一路打一路脫擾亂對方視線，由蒙面脫到露半胸，但點解脫到露半胸就唔脫，劇情係無交待嘅！而甄子丹下下飛鏢都瞄住人地個胸，好離譜呀!

無啦啦中段安排甄子丹同趙薇澡堂沖涼賣肉，係咪攪錯左呢，叫吳尊加徐子珊，我諗先會幫到票房囉

最後想講配角非常強勁。。。

有劉松仁，洪金寶，羅家英，仲有好耐無見嘅午馬同好耐好耐無見嘅陳觀泰，反而比到我驚喜（呢五個又係死剩一個，唉！又估下邊個唔駛死？）

完