北京雪櫃之旅﹣第一day（年廿九）

出發前已有心理準備，北京會好凍，究竟有幾凍呢？

從未試過全家去旅行，都真係驚會悶，對足我老豆幾日，過唔過到關呢？

第一次帶GF1影相，得枝20mm standard，會唔會太局限呢？

好，心口掛個勇字，出發。。。


到埗已經5:45pm,喺機場見到有酒店職員舉牌嚟迎接，即刻好醒咁用國語同佢講：我是柯先生(呵呵，有人接好過癮啊）

半小時就到酒店，今次住北京香港馬會會所，特式係四合院設計；靚，真係好靚，外表聽日至介紹，今日先講我間房。。。個廁所
好大呀，大過我屋企個廳，花灑仲要係可以由頂打落嚟（佢話叫熱帶雨林），好舒服呀，馬桶隔離會播歌，我當時心諗：“今晚要來一場淘湧的，澎湃的XX”


好，睇下間房，我住呢間係單人房，但係大過我間屋囉!有ipod座播歌，”煲屎“牌呀，勁正呀；張床舒服到一撻落去就瞓著

出發食晚飯，去嘅係位於另一間酒店嘅“京壇”，香港已經book定位，去到一個客都無嘅。。。女部長好寸咁話：”因為明天休息啦，所以很多東西都賣光，特式的很多都未有，一般的就有“，佢仲建議可以落樓下果間食；當時有人話走，老豆又話照食，擾攘一輪，梗係聽老豆話啦，食左以下呢堆，其實係好味嘅


特別推介。。。擔擔麵，好味到不得了，小小麻，小小辣，全家都話勁得


食完，時間尚早，去邊好呢，決定去淘古井，呀唔係，係王府井至啱；哇!行街真係好Q凍呀!

以前條小食街好長格，而家兩分鐘行完，仲要全部差唔多嘅，食左一串冰糖葫蘆


期間老豆已經一枝箭標左入李寧牌運動店；

入面D貨我麻麻，正開聲話我過對面間超市行下，冷不提防老豆竟然講：“哇!凍到頂唔順，返酒店”跟住就同阿媽上左的士。。。

北京的士坐四個人，我地七個人，兼且都唔可能唔理你地啦，我話：咁我都走啦。。。

弟婦同司機講酒店地址，個司機識條街但原來唔識間酒店，語氣又差又大聲；
老豆發脾四用廣東話話：D死老鬼，dou多十蚊佢就識去啦；
我話：”人地識聽架“
阿媽：不如番去家姐度再截過架（oh,乜logic嚟架？要截過架，而家落車截都得啦）

我搵左個停車入口嘅職員（呢個真係好人）問路，請佢敎司機去我地間酒店，終於去到，唉!我感受到未來幾日嘅壓力呀

（事後發覺，個司機九成係扮唔識呃錢嘅，呃多幾多呢，係。。。五蚊；五蚊，就攪到成家火哂；以前廣州工作，同事都有敎唔好搭停喺遊客區嘅的士，真係應驗；唉!北京）

番酒店，沖埋涼，聽住梁詠琪，咁就瞓左


第一日。。。完