好李碧華嘅故事

噚晚發咗個好真實嘅夢，醒嘅時候仲記得好清楚，仲肯定係彩色嘅....

落樓下見到一間小時候阿公成日帶我去嘅蔗汁舖，我興奮話：原來仲喺度，我話有幾十年無嚟啦；入面有個六七十歲嘅嬸嬸（樣似羅冠蘭）同我對話；

我要蔗汁，佢話$18，我有好多散紙，但我比左張廿蚊，佢找兩蚊。

跟住佢帶我行舊區，經過Ｄ好舊嘅幼稚園，球場；我話Ｄ玻璃窗好靚，仲係玻璃內有鐵線，有Ｄ仲彩色，我仲話Ｄ玻璃似人手做，因塊塊都有Ｄ唔同，下次要帶相機影底佢。。。

跟住去左一個商場，內有畫展，再行有劉德華做緊演唱會，仲有一班著住紅黑衫嘅dancers，嬸嬸話：佢又話開五日，開完五日，今日話比人聽今日係第四日，呃人；我就話劉德華竟然要唱商場騷

途中又遇到一個男友人（唔記得係邊個），我選擇繼續同嬸嬸向前行

行出商場，係條斜路舊街，見到掛場嘅舊信箱，我又話下次要嚟影；我問嬸嬸點稱呼，佢話佢姓郭

面前有一座好有特色嘅建築物，顔色七彩但似舊式貨倉，黃色係主色，上面寫住The Pier，郭嬸嬸準備開門帶我入去。。。


流口水流到醒左，竟然已經10:15am，瞓左十粒鐘；好少發夢咁真實仲記得咁仔細，但郭嬸嬸係邊位？


起身做野，食完晏，對個夢有Ｄ納悶，決定去蔗汁舖舊址睇睇，一來其實同而家住址只隔一條街，二來想知道個夢有乜啟示；蔗汁舖當然唔見，變左
。
。
。
。
。
。
。
。
。
。
。
。
老人院