曼谷遊day 2-迷失曼谷

一覺瞓到7:30am，又做例牌野，行出酒店附近影下相，希望清晨嘅陽光可以有唔同嘅感覺。。。但明明見到遠處有陽光，我行果兩條街郤比附近建築物阻擋，黯然無光，失望呀～


每家每戶都有個郵箱，又幾靚喎；行過見到士多門口個籠有一對貓，露出可憐眼神，係今日其中一張喜愛相片


唔知從幾時開始，去曼谷，食自助早餐係重頭戲，平時喺香港唔會食嘅煙肉，喺果邊總係有吸引力要你𡁻一條
泰國蛋一向好食，今次跨張到係覺得食到有史以嚟最好食嘅太陽蛋，蛋黃勁大，一啖啜唔哂，非常creamy有蛋味，結果，我每朝食兩隻
其他食品，每樣都唔差，結果每餐都食到陀住三個月嘅肚dump離開


食完至9:00am，梗係去泳池曬太陽，吸下正能量啦；
泳池玩突破唔用藍色，竟然用橙紅色，真係有D唔慣，“澤谷池”好好好舒服，D水波波衝擊下個肚波波，D腸郁快D，出發行街前又可以。。。舒服哂


上網見到有個新地標crystal design centre，有展覽有傢俱有設計睇，飛的去。。。連司機都唔知喺邊，盪失路，要落兩次車問人至搵到。。。
哇!大到吖，好加拿大mall嘅feel，即係好空曠，好多店，好靚，但。。。無人
去到個展覽場地，袖珍到驚人，5分鐘睇完；其實呢處啱做interior嘅嚟多D，我就麻麻地，只係好過去油麻地


咁一場嚟到，梗要食一餐，揀左呢間起喺水上面嘅viva cafe，雞翼勁炸外皮脆但肉就又嫩又滑，加埋個醬酸味味，狂風掃落葉就清哂
個牛肉沙律其實超好味，但係實在太辣，熱到上頭呀，意粉就一般


問展覽場嘅員工搭的士去邊個bts站最近，竟然係。。。。翟度翟，於是，我地又再次嚟到翟度翟；一場嚟到，到佢隔離個公園行下影下相
最吸引係勁多白鴿，上面果張又係我今日嘅另一至愛


去paragon，點知比D網上資料誤導，落早左一個站，我又攪錯方向，結果行左去central world，諗住又搵另一間餐廳high tea，但結果係搵唔到，放棄；
central world每層嘅牆上面都有唔同嘅畫裝飾，我覺好睇過下晝個展覽喎；其實一向覺得泰國嘅藝術係強過香港多多聲，而家香港D後生仔個個剩係識對住部腦，仲有無人識揸筆畫畫呢？


睇埋隔離siam center嘅牆畫，係咪勁靚呢？


最後喺siam center搵到greyhound cafe，次次嚟都有幫趁，次次都食佢地個complicated salad（左），芫茜＋香草＋粉皮，用生菜包住食，超正；飲品係今冷推介，碎冰香草啤梨汁，好清甜


番酒店，第二日完

旅行習慣

1/旅行前，永遠緊張，驚帶漏呢樣，又驚無帶果樣，個心成日數住，passport，身份証，外幣，visa card，機票，訂酒店嘅收據，义電器，藥，插蘇等。。。。真係未出發，已經鬼咁攰

2/會帶D舊衫去旅行。。。會專登帶D舊tee，舊褲，舊𧙕，舊底底去旅行，著完跟住掉喺酒店，咁個喼就吉哂，有位買新野；幾年前試過有同行朋友話我著得肉酸㖭，激死!
又試過有同房見我日日掉底褲同𧙕，我解釋話果D係鬆哂頭或穿洞嘅
佢問：點解你咁多穿洞鬆頭嘅底嘅？
我好認真答：我好辛苦儲番嚟架。。。。。跟住佢仲週圍唱，比佢地笑到面黃

但今次我又遺棄左三條穿洞鬆頭嘅喺曼谷啦，呵呵～

3/除左爛底，仲會帶果D用剩少少嘅洗頭水，牙膏洗面膏，食剩半盒嘅薄荷糖，總覺得喺果邊用哂掉埋係一件好爽嘅事嚟嘅；所以酒店垃圾筒好多時都比我用到滿瀉

4/又，每次出發前都會買本旅遊書睇下，即使對果個地方幾熟，唔揸住一本又好似唔安心；近年，又會上網摷定一堆料，諗住搵D新奇好玩D嘅地方；但今次，去左書局幾次，拎起本曼谷天書，真係覺得無乜新野喎，要去嘅都去過哂，係第一次出發無帶旅遊書咋～

5/平時早餐明明食量唔多，但去台灣曼谷等有自助早餐架呢，就會死唔蝕章兼胃口大開，食量仲大過午餐囉

6/可能食得太多，去厠所次數密到驚人，起身先去一野，食完早餐太飽，要番上房，D新貨迫D舊貨出嚟又一野，分分鐘遊完水仲有貨賣，驚呀～

你地有無呢D習慣呢？

曼谷遊﹣廢話篇

咦！有兩種唔同尿dou㖭，去邊個好呢？好彩我無選擇困難咋，如果唔係真係揀到瀨野都仲揀緊呀
btw,你估我揀左定右呢？


佢就唔同啦，話屙就屙，攪到棧燈變左boston（波C燈）


我最愛雪糕，一見當然唔放過啦


咦！泰國阮經天呀


呵呵呵，好樣衰呀你～


正宗四眼妹

曼谷遊day 1-窮家仔遊曼谷

帶住兩聲咳，有D瀉嘅身體，著住打底褲，羽絨，頸巾，暖手包；5：45am就喺樓下得9度嘅街度食住西北風等機場巴士。。。

11:00am，到曼谷，一出機場嘅感覺係。。。唔係好熱咋喎，當時我仲著住羽絨呢，呵呵～
自從紅衫軍攪事後，三年無嚟啦，呢次感覺係。。。依舊塞車，D街好似仲破爛多左，遊客又真係少過以前喎，係咪因為唔係旺季呢？


今次買嘅係超平package，三日兩夜機票連酒店每人都係$1799，加多一晚酒店同埋D機場稅，兩人同行都係$5502；
酒店揀左Radisson,舊年10月開，貪佢夠新；但曼谷酒店間間個樣都靚架啦，房嘅電視仲可以上網，第一次見自己個blog放到咁大呀～
但service就真係有D甩漏，例如漏左無比牙刷，茶包,tissue用哂又唔記得補番等，下下要開聲；但咁嘅價錢，仲想點。。。


仲送埋welcome drink，餐廳環境又唔錯喎～


離開酒店，出發去翟度翟，翟度翟對面有個果欄加有蓋大排檔叫“oR tor kor,即係”屙多個“，個名咁堅，梗係去會一會佢啦～
食坐碗雜錦湯河，只售30“匹”，加埋杯即拉嘅奶茶同埋泰國油炸鬼，咁就一餐啦!


以前嚟翟度翟，買到一袋二袋，而家人大左，兼係窮家仔啦，幾乎空手而回，最值得推介係椰王雪糕，30“匹”，新鮮椰王肉，仲送一杯椰王水，超抵呀～
但咁樣連環亂倒野落我仲未好番嘅腸胃度，即刻有Dfeel，好彩無嗶嗶嗶咋～


夜晚，本來想喺酒店附近”是旦“搵間似樣嘅泰菜食晚飯，但點知行左三個街口都無，結果，朋友建議食。。。又係大排檔，食左碗麵，又係30“匹”，跟住番酒店食生果，提早瞓覺～



第一日完

番嚟即要開工

番來啦。。。

＊影得最少相嘅一次

＊日日去泳池曬，而家個身直頭識發熱，唔知熱到幾多日呢？

＊頭三日刻意搵D新地方去，結果。。。混吉又有，唔使十分鐘行完又有

＊好彩第四日盲中中去行公園搵到D勁料一舖番嚟

＊人未番已經比個客催稿，今晚分分鐘要通頂

出發前風波

星期五晚仍要做稿做到半夜一點，原因。。。

最近經舊同事接左一間高級火煱店嘅餐牌嚟做，佢星期五(14號）開張，竟然到而家仲不停改野，之前plan去旅行完全無諗過呢份job會未finish囉，開張竟然餐牌都未定實？

星期五晚收到消息話印得，但要改大D；頂，即係好多野要做過哂；到做到一點，攪掂，upload埋上server準備星期六朝叫printer印啦，佢半夜send sms嚟話第一日做完生意後，覺得價錢要加D先有得賺喎，喂！我講到明我走架啦，我唔會理，下星期先啦～bye

﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣
星期六本來要上珠海做野，但D感冒奇奇怪怪，噚日開始又變左瀉，最後都只好甩底；睇多次醫生，攞左藥，喺屋企瞓完又瞓，希望旅行途中正正常常
﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣
上天文台，見到曼谷日日有太陽，不過最高都係得30度，有D失望呢～

紅白歌唱大賽之點解又係白組贏

哇，哇，哇，咪都想食埋咁款喎


我開心左一日呀，白組勝