cafe 8 degrees

雜誌抽獎中左一位免費點心自助餐，海逸酒店嘅八度餐廳，叫埋朋友去，都叫半價吖，一位要$128架嘛～

中午12:00開始，朋友遲到，我12:00前早少少到左，一到12:00，當部長話開始，師奶們真係鬥快跑出去，我望向食物枱，堆滿人

隔離左邊枱嘅太太返嚟，攞左一盆山咁高嘅食物返嚟，至少有廿件點心，但係佢得兩個人咋喎

左邊枱嘅先生就攞左一堆炸物返嚟，四條春卷，四件咸水角，四件蛋tart，幾件班蘭蛋糕，而佢太太攞得幾粒蝦餃燒賣，你以為佢蝕哂？佢攞左好大好大碟XO醬，但係呢枱都係兩個人 

我見朋友未嚟，食物枱又少左人，我都出動啦；發現，點解少人呢？

原來幾張枱一件點心都無，清哂，甜點枱有馬豆糕，都照攞兩件啦，跟住有咸水角出爐，又攞兩件，拎埋位時，明顯比左右枱嘅師奶偷笑 

朋友到，即出去攞，我地每次都係攞到少少咋，直到半小時後，食物供應充足，但見每枱都仲有春卷呀粉果咁，明顯大家飽哂，我可以慢慢揀啦喂～ 

其實大家真係驚蝕底架咋，有兩個半鐘你食，又無海鮮牛扒貴野，搶乜呢？～嗱，唔好賴強國人呀，8成以上係港人，失禮呀

位置係土瓜灣，真係差D嘅？ 

講下食物水準，OK好食架，環境就迫D，侍應服務一流，快手又好禮貌，係衰食客jet。。。。

完

造型

今日假期都要開工，影樓跟影相，半做半玩，睇下我嘅新造型：）

又，喺影樓摷到件得意貓衫，問studio主人邊度買，佢話比左我，於是，達仔都有新造型：）

去個客度開會變左針灸

今日去個客度開會，佢公司定期有個中醫師會上去睇症兼針灸。。。 

開完會，有個約左覆診甩底，於是我即睇 一把脈，醫師個反應係：唉呀～ 

肝就滯，胃就寒，腎就虛，氣就弱，醫生先從胃同肝入手 

寫好藥紙搵人執藥，跟住就針啦； 

之前個醫師都係針五枝左右，全針頭，今次頭，手，腳共九枝，好彩完全唔痛咋，但手有D痺囉

針嘅時間亦比之前耐，關燈叫我放鬆唔比諗野甚至可以瞓陣，我諗有半粒鐘囉 

返屋企仲要煲藥，好攰呢～ 

ps:張相喺關燈後影，以為影到枝針，原來清果枝係燈，矇左枝先係針

倒影

星期日去中文大學，主要係想食佢唧漢堡包，同埋景點“天人合一”。。。 

先講天人合一，見攝影師朋友影嘅結婚相，有個好靚嘅景，知道佢喺中大，今次終於搵到佢啦

趁有pair新人喺度，影返張先  

呢期有病，見水就踎低影倒影  

中途落左場大雨，又多一張倒影  

唔止水有倒影，室內都照倒可也～  

倒開有條路，落完雨，磚牆都得  

有個銀波波，倒埋自己  

最後，最愛呢兩張，大廈鏡牆倒影一片森林

倒影森林 2


倒影相好玩，我要繼續

奇異事件﹣30度下桃樹結冰事件簿

今日去左中文大學，30度，又雨又太陽，見到棵桃樹長滿小桃，但。。。 

點解桃上面有冰嘅？係咪有人惡作劇呢？  

但，好多桃上面都有喎  

樹枝上面都有，但有D係橙色嘅  

呢粒好靚，前要矇矇地有條冰柱添。。。  

我唔敢掂，唔知凍唔凍；乜嚟架呢？使唔使叫F檔案查下呢？

 ps:有無高人知呢？

食左西瓜核頭頂會生西瓜樹。。。。

細個嘅時候，阿媽會嚇D細路，吞左西瓜核頭頂會生棵西瓜樹（大左先知西瓜都唔係樹嚟嘅）

咁飲左雪印呢？  

答案係。。。頭頂生蒲公英

師奶搭小巴

我由西環搭綠色小巴去中環（總站係天星碼頭） 

上車，坐司機後面第一行，車尾傳來不停口嘅師奶傾計，巴啦巴啦巴啦巴啦。。。（點解可以咁多野講架呢？）

小巴去到石塘咀，其中一個巴啦師奶（大聲）：巴士總站有落

司機：邊個巴士總站呢？

巴啦師奶（權威聲）：中環

司機：交易廣場？

巴啦師奶（繼續權威聲）：信德 

真係想妖出聲，信德係上環囉，仲有，距離信德仲有至少六分鐘車程囉，使鬼咁早嗌咩，巴士總站啦喎，咪就係大聲夾無準囉 

妖～
﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣
行左三分鐘，距離信德仲有段距離。。。

另一個師奶（同頭先幾個無關嘅）：信德有落 

真係妖，又一個；

仲係有排先到兼會先到巴士總站先囉 
﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣
到巴士總站，三件巴啦師奶落車；

頭先件師奶再嗌：信德有落 

因信德小巴站近地鐵果邊，架車經信德時，位師奶用驚慌聲嗌：有落呀～ 

小巴司機：未到站呀，前面比你落

妖～
 ﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣ 
落完信德站，又另較年青嘅師奶從後換位坐我隔離問司機，對答如下。。。 

年青嘅師奶：請問中環地鐵站最近邊度落？

小巴司機：中環地鐵站囉，有站呀

年青嘅師奶：你經㗎可？

真係講少句廢話都唔得架囉，有無帶腦出街架呢？鬼唔係咁多野講啦