Saturday, August 11, 2012

快餐店之麻煩師奶

麻煩師奶﹣1

去美心食早餐,去到,得一個收銀姨,條隊無人,有一位姐姐仔同我一樣,企埋一邊睇餐牌牆諗食乜;呢個時候,師奶出場,佢即刻埋去收銀姨度。。。

到我決定食乜時,姐姐仔亦排左喺我前面;但等呀等,再等呀等,果位師奶都未買完喎

原來佢買兩個餐,但收銀姨以為佢買四個餐,所以攪亂哂;點解收銀姨會以為佢買四個餐呢?

從我開始聽佢地對話開始。。。

收銀姨:你話要兩個鮑絲通,鮑絲通係餐嚟喎

師奶:我要兩個餐咋,加三蚊要個鮑絲通呀

收銀姨:加三蚊無鮑絲通架喎,得腿通

師奶:無得揀架啦

收銀姨:你可以揀麥皮

師奶:無架啦(死要chur架喎)

收銀姨:可以粥囉

師奶:咁咪即係無得揀(乜鑼輯嚟架呢?),咁有無米粉呀?(鮑魚絲果陣咪又係通粉,唔見你要轉,想貪人地鮑魚絲咋嘛)

收銀姨:腿米好唔好?

師奶:好

收銀姨:盛惠$XX.XX

師奶遞張$500比人找,當然有得找嘅,不過覺得佢有咁煩得咁煩啫

﹣﹣﹣﹣﹣﹣﹣﹣﹣﹣﹣﹣
到我買完飛,去到攞餐,當然佢仲喺度啦,我地呢D買飛咁快嘅

佢個盤一定有杯水啦(呢D著數師奶點會走雞),跟住佢問比餐嘅哥哥:唔要牛油有乜醬揀呀?

比餐哥哥:(斬釘截鐵)無

見阿師奶面露不悅:無得揀架?

結論:原來師奶真係以為幫趁兩個餐就大哂,乜都有得揀架
﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣
麻煩師奶﹣2

當我坐低食野嘅時候,另一位師奶帶住兩個十零歲左右嘅女坐我隔離檯,留意佢係因為師奶猛嗌凍,但又唔走喎

聽到佢話:我地三個人食兩個餐

到攞餐後,佢(大聲)話:得咁少野食;(吓?又要大食又要三個人食兩個餐?)

食左一半,見到隔離卡坐有位,又轉位lu

5 意見:

卡臣 said...

哈哈!好寫實呀!做劇本都得呀

Tat said...

美心唔知啦,大家樂呢,我幾重手呀,個早餐的多士有跟牛油,我坐低後,重返轉頭問佢多要一碟仔沙律醬,牛油加沙律醬多士,好得架,不過減肥人士真係唔好搞。

TY said...

食Lunch撞見呢D師奶仲炆呀!! 真係阻頭阻勢!!!

the inner space said...

consumerism 嘛!
我蹬啲阿哥阿姐激氣,
買個快餐雖然都是買賣,
就想有食阿一鮑魚嘅氣焰!

naruto said...

卡臣:搵曼娜姐做

Tat:係你先諗到

TY:我覺得係佢地得閒,兼自私怪

The inner space:我早幾日先見有個酒樓阿姐頂唔住鬧番個客

Related Posts Plugin for WordPress, Blogger...