Friday, May 18, 2012

舊相﹣台灣打工的日子

呢張相係一個長長故事,先講上半部。。。


呢份工,一半時間喺香港,一半時間喺高雄,做嘅係一個展覽館嘅展覽工程,只係做左三個月,但印象難忘

番香港時,要著西裝打呔架,去高雄執定一套見人嘅,其餘都係靚少少嘅tee牛仔褲,點知到機場見其他同事個個由西裝骨骨變就好爛鬼笪笪果隻喎

去到高雄至知,原來個館係未起好嘅,入口係地盆,出入要戴安全帽,又因為地盆很大,所以後期學識揸大膽電單車於地盆範圍行走,呢D都係屋企人唔知嘅

講番張相,點解件衫濕哂?高雄好熱架,日日都34度架啦,兼展覽館係無冷氣架,著靚都無用啦,日日焗桑拿,果期真係肥唔起架

一入去,地盆一樓浸哂水,聽聞前一星期要著水鞋澗水,我第一日到埗時雖然都浸,但踏木板唔駛澗水,但好多好多蚊

但第一日開工即出意外,我諗我死都記得,同事剩係帶我路去到我工作嘅“科學館”,即係上左三樓,經過“兒童館”,但係佢每個館好似會展D展覽咁大,轉左又轉右其實唔認得路,跟住我就喺會場度尺,做左無一粒鐘,突然。。。

停電

黑到乜都睇唔到,好彩我有個蚊型隨身電筒,用蚊型隨身電筒搵我個背包,入面有公司派嘅大電筒,鎮定,嗌救命先,用齊廣東英文加國語都無人理我,當時亦無電話,唯有玩迷宮遊戲,見過呢隻蟻就直行,見到sir滑梯,咦!呢舊無見過,再照,見到個小丑,嚇到叫左出嚟;
成地垃圾,又驚踏錯腳,仆親就死得

玩左20分鐘左右,終於見到光,原來好叻咁行番去樓梯口,跟住行番office(地盆對面),見到所有同事都齊人,問佢地無諗過我唔識路架,竟然原來真係無人諗過兼無人發覺我未番去,我當時即刻知我有幾好人緣啦

﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣
下集:點解會番呢份工

14 意見:

卡臣 said...

好勁呀你,去外地打工
我頂籠過海返工咋

Cat said...

印象中台灣人好熱情好客個喎,
係咪唔覺意得罪咗人唔知?

black lab said...

今日咁有雅興寫咁多字嘅?

不過我想回應一個比較 minor 嘅 point 喎,唔好意思。文中提到「日日焗桑拿...肥唔起」,我認為唔係喇,你唔見好多肥人都係郁吓都周身汗咩?而佢哋都係繼續肥喎!實情係,肥係因為脂肪,而汗係體液 (+新陳代謝物),兩者無關嘅,脂肪唔會轉化為體液然後排出體外。

我都唔知你喺台灣做過嘢添!拱你 sik 唔 sik 講國語?

naruto said...

卡臣:
叻就唔使走嚟走去啦:)

Cat:
台灣同事只係見奇一面,我就去左工地,佢地真係好熱情,肯幫人

得罪就無,但香港我番工時同佢地唔熟,又係新人,又唔知我乜料,係咁上下啦

black lab:
噚日趕完job有個空檔,呢篇想寫好耐,咪寫左先囉

除左流汗,同體力勞動有關嘅,要你日日喺會展行一個圈(樓梯果隻),仲要琴高琴低,我諗都肥唔起啦

naruto said...

black lab:
漏左講,我仲喺大陸做過野㖭,但國語係屎嘅

TY said...

大叔果時個樣咁後生, 都真係應該襯後生去下外地做野既... 不過其實三個月好快過呀!!!

欣宜 said...

咪就係無方向感,唔認路囉!

chiseenjai said...

你心口有個"心形"! XD

l.minor said...

正喎~出trip做野咁勁

但睇張相好似無十年都有八載,當年高雄咪好鄉間?

反而想問下,果度係咪高雄駁二?

naruto said...

TY:
三個月。。。公司改組呀,我成team比人裁走咋

欣宜:
就係有方向感先出到去呀

chiseenjai:
好大㖭

l.minor:
我份份工都出trip架以前

當時係97

唔係駁二,我都唔記得佢叫乜名

攞你命三千 said...

好羨慕

naruto said...

三千:
羡慕乜呀?

Beat in the box said...

下集呢?

naruto said...

Beat:原來爛尾都唔記得,我會寫返,比D時間:)

Related Posts Plugin for WordPress, Blogger...