Thursday, October 1, 2009

案發經過

本來係一件值得高興嘅事。。。

層天水圍樓終於賣出,比兩個月前賣多左13萬㖭,住左11年,蝕左36萬;已經蝕少左。。。

我搵經紀佢又信唔過,佢要佢跟;前日有消息賣得出,但要夜晚簽番張約,經紀夜晚嚟上環攞番,老豆約阿媽同我西環食晚飯兼簽名

5:30pm阿媽上嚟我屋企,我仲做緊野,用手提同個客傾電話期間,阿爸打我手提兩次,我無聽,因為同客傾緊,但即時叫阿媽call番阿爸;阿媽話老豆電話一聽就斷,一係就唔聽;到第三次又打嚟我手提,我要cut左同個客嘅電話接佢嗰個,問佢“做乜唔打比阿媽?“佢一句都無出聲又cut線。。。原來咁就判死罪

到飯店,見佢張約唔係之前嗰間嘅?佢話:叫你簽你就簽啦!

問佢電話係咪有事,做乜一聽就斷,佢話:你講野真係黑人憎,我句“做乜唔打比阿媽?“好刺激佢喎,無禮貌喎!打比我手電,佢聽到長響,覺得我唔聽佢電話喎,我解釋我電話有call waiting架,佢又唔識;跟住話我似足某個佢覺得黑人憎嘅親戚喎,可能有佢地D DNA啦。話我學講野都有排學喎,慢慢學啦,你!

真係頂到飯到食唔到,食完咪早走囉。事後阿媽撐我,咪世界大戰囉!

噚日家庭聚會佢仲要繼續講,問我細佬點解我電話講緊佢都聽到無人聽嘅響聲,細佬同佢講,佢咪信囉!跟住無野好鬧,竟然話我地鍾意講屎講尿,影響佢喎!我夠驚蝦米咯,你又講!

9 意見:

supageti said...

我都撐你呀!

潮州佬係好火啲 ~~~ 呻下舒服啲喇啩,無偈啦,鬼叫佢係你老豆咩 ~~~~ :P

black lab said...

講咗出嚟唔收埋就舒服晒。

俾人 (無理取)鬧 當時梗會唔開心,不過我選擇受咗就算數,事後我會盡量令自己平復番,例如我會諗:我又冇做錯,你鬧我我嬲咪「中計」!?

近來我會仲「變態」d:我會對鬧我嘅人仲好d,等佢哋更受良心責備,唔忍心再鬧我。就算佢哋唔咁諗繼續鬧,我對人好都係幫自己積福。

邪留丸~ said...

尋日我阿媽都係咁樣喇...
佢打嚟一陣,無耐就收線...
到我打俾佢,佢又聽唔到...
已經習慣...= =



唔開心嘅事,講完就算喇~
明天會更好呢~^^

maymay said...

一場誤會啫,層樓賣多13萬咪開心番囉~^^

largeheadboy said...

嘩,咁複雜嘅
一家人一陣就乜事都無架喇!

朱朋 said...

似乎今次至係谷底...

Leo said...

無仇不成父子嘛!

就快中秋喇,祝兄台家好月圓!

瘋膏 said...

深表同情, 但都幾廿年啦, 睇開D。

black lab 的做法好高, 但真係好難做到。

naruto said...

スパゲティ:
自細都知無計,一路知自己位置

black lab:
你呢招。。。我當年被公司調去敵對department,比個女上司玩到飛起,我已經用過呢招,仲成功㖭,但喺屋企,唔想做戲,亦唔想處處計過度過

邪留丸~ :
我知點做架啦!

maymay:
人地唔認一場誤會呢!

largeheadboy:
隔幾年嚟一舖架

朱朋:
自細都知要靠自己,唔靠屋企,都係我原動力嚟嘅

Leo:
多謝先

瘋go:
我行開D,佢又拉你埋D,跟住又鬧义你,唔係第一次架啦

Related Posts Plugin for WordPress, Blogger...