naruto

犯駁

2012-01-28T00:01:00.000+08:00

又係香必飄嘅廣告，話廁所唔通風喎（0：05)，但轉頭睇下佢個窗，廁所有咁大個窗都話唔通風？

香港嘅樓真係無幾可有咁大個窗囉，有嘅請舉手

賀年廣告

2012-01-27T00:01:00.003+08:00

初一初二都係坐喺屋企打下牌睇電視，今年電視有乜睇呢？

聽嚟聽去都係“貢C貢屎貢屎le吖，貢C貢屎貢屎le”，唔係就係呢隻“你個籮柚響千遍，聲聲送舊年”，聽到都覺臭呀真係

另外，今年有D另類野喎，以前唔覺有呢類貨品初一賣廣告架

例如有。。。前列通祝你路路暢通
仲有。。。成人紙尿片褲，祝你大富大貴

我一聽就笑到反肚，可能就係咁分哂心，打牌咪輸囉：（

另外，每年都比人鬧嘅特首賀詞廣告，今年好似無人講，等我講。。。

點解班細路畫條龍（39秒），會自動無左四隻腳仔變左條蛇嘅？（40秒）；有乜隱喻呢？唔通係跛腳嘅政府？好驚喎～

暖流版

2012-01-26T00:01:00.001+08:00

今日，天寒交迫，初一初二輸左二十四底無左$1200嘅初三，食乜好呢？

過年前，隔離台意粉問我，達仔想要乜野禮物，我隨口噏話回鍋肉，金寶湯同茄汁豆，點知佢真係搵速遞send嚟。。。

多謝善長意粉嘅回鍋肉，令獨居長者明仔有餐溫飽呀～

無野做，食飽瞓lu

初二

2012-01-25T11:34:00.002+08:00

先講下麻雀大戰，初二再下一城，輸多7底，兩日輸左24底。。。

打麻雀梗係傾廢計啦，老豆話初一時無線個記者妹離譜唔識做人，（大意）問一家準備坐遊輪旅行嘅人：最近有遊輪意外喎，唔擔心咩？仲去嘅？。。。老豆覺得初一有d野應該避忌下。。。

我講起話全盒d食品如角仔係金元寶，咁瓜子係乜呀？媽話yau銀，老豆話：係啦，瓜瓜聲其實可以係。。。
我：又話要避忌下嘅？

下晝，家姐嚟啦；講到我最憎嘅賀年餸。。。蠔屎，我話真係睇你點釋架啫，你話好巿，我就覺得係好屎，食左就好屎啦

我：其實d酒樓過年總係將d菜名改做乜野大吉大利呀，白玉金環呀咁，咁你知唔知發財元碲寓意乜野呢？

姐：唔知

我：財元（裁員）

姐：暈，即係豉椒炒魷條新版

我：咁不如諗夠十樣一圍啦

姐：咁唔小得苦瓜同梅菜啦喎

我：諗到，人到撈下撈下叫撈起；整番碟炒粒粒，即係豆呀瓜呀肉呀全部切成粒，跟住用手食。。。

姐：即係乜呢？

我：用手執嚟食，即係執笠

完

今日初三，咪鬧我呀

初一

2012-01-24T00:01:00.000+08:00

早上，聞到另類氣味，當然知係達仔大左便，新年開始就執金，好意頭呀（唯有呃下自己啦）

晚上，同老豆阿媽打三腳麻雀，完全無招架之力，打八圈，直落輸清櫃桶，再借再輸，破紀錄輸足17底，嗚～

打完牌番屋企，開門，又聞到有異味，一睇，達仔屙爛C，，有D仲要屙左落個格仔桶度，另外大量舖喺沙面，金沙嘅呢個秘密，唔覺意流左落凡間，連我都分享到。。。

醒起噚日餵左新牌子貓糧，可能食唔慣啦，唔寫住啦，又要同達仔“敏”屎啦，bye～

新年啦

2012-01-23T00:01:00.002+08:00

每年嘅年三十晚都好恨食原味出前一丁，因為以前去阿爺屋企食團年飯，又魚又蠔屎發菜乾瑤柱蝦米，結果無野食，我會走去加料煮個出前一丁，變成習慣，今晚即使食左飯，消夜都要隊番個，唔食唔舒服。。。

祝各位龍年身體健康啦，行運行到腳趾尾啦，心想事成啦，萬事勝意啦，笑口常開啦，出入平安啦同埋。。。日日有屎屙，呢個祝福好緊要架～

團年

2012-01-22T00:01:00.002+08:00

我係潮州人，呢間，由細食到大。。。

女部長我識佢時佢係第一份工，我呢。。。小學雞

呢樹，都算係我屋企過年過節嘅飯堂囉。。。百樂潮州海鮮酒樓

睇下噚日食左乜，基本上幾十年都係食呢幾樣野

左／花蟹。。。我唔食
中上／沙爹牛河。。。我至愛，但要走方魚碎（不過部長好醒，唔講都識走架啦）
中中／四寶蔬。。。正
中下／臘味飯。。。噚日賣哂臘鴨喎
右上／杏汁豬肺湯。。。好香好香，十級推介（要預早電話訂）
右中／蝦蟹棗。。。呢種蟹我食到
右下：滷水。。。我清哂碟

一開始先上花蟹，即係我發吽豆嘅時間，部長知我無野食，私人送上一碟佢自己入厨房揀哂D芯嘅咸菜，真係好鬼錫我架啫，呵呵～
睇下我果碟同正常嘅分別～～～

最後，仲有壽包，大家又起哄要我表演正確食法，無計啦，娛下賓啦就～

大家新年快樂啦：）

兔年最後一擊

2012-01-21T00:01:00.001+08:00

兔年，真係抽中左好多獎，年尾都抽多份正野。。。

好野，可以去天際：）

剪髮前的準備。

2012-01-20T00:01:00.002+08:00

大家去髮廊，剪髮前都會瞓低洗下頭；通常大家會合埋眼吖？定係望下週圍或者望住個洗頭仔（妹）呢？

又有無諗過，從洗頭仔（妹）嘅角度，佢又想唔想望住你，或者會望到D乜野呢？

我做過一次洗頭仔，當年公司辦公室喺商場，隔離舖正正係髮廊，因為近近地，就喺隔離剪頭髮，跟住同D髮廊朋友混熟左啦；

熟嘅程度，去到成日過去搗亂，於是有一次走去做洗頭仔；

原來，從上面望落個客度，係見到個鼻哥“洞”架，睇得好清楚架

所以以後我去剪髮，我都會做剪髮前的準備。。。。。撩鼻屎

完

收爐狂擦一餐

2012-01-19T00:01:00.001+08:00

今日，跟完一單難應付嘅食物shooting後，個客話星期五要layout喎，但其實layout之前已做好，放番張相落去，星期五send出去就攪掂，當收爐架啦，呢兩日開下單追下數hea下就算lu

夜晚，朋友生日，揀左𠿬西營盤嘅momo食自助餐，對我嚟講好OK架啦，有沙律有牛扒有意粉有湯麵有雪糕有蛋糕，最緊要係無嘈嘅師奶，亦唔會有大聲阿叔囉

朋友嘅爛gag。。。
佢食左啖牛扒，跟住話：雞嚟嘅
我：下？
朋友：塊牛扒好雞
我：O

其實塊扒本身唔差，但唔夠熱囉真係，唉～

另外我亦要投訴，雪糕櫃太凍，雪糕好難“畢”呀，我好辛苦至畢到六球呀

靜靜地，最好傾下旅行料，住邊區好呢？呢間平D，果間就方便D，住唔住溫泉酒店好呢？住幾多晚好呢？終於度好，聽日開始book啦：）

輕鬆小品

2012-01-18T00:01:00.002+08:00

噚日篇怨氣大，今日寫篇輕鬆小品啦。。。。

今日午餐走左去食車仔麵，一個年約30嘅大肥佬走埋嚟搭枱，佢嗌5餸麵呀，哇～

未完嘅。。。

除左碗麵，佢仲嗌左杯凍檸茶呀

碗麵同茶送到，佢打開載砂糖個樽。。。（我心諗：咦！凍飲都加糖？）

佢放兩匙糖落。。。。碗麵度呀

哇！真係估佢唔到呀，唔怪得之咁肥啦

X記糖水舖

2012-01-17T00:01:00.000+08:00

西環因為即將有地鐵，舖租勁升，好多舊式舖頭因為捱唔起貴租要執笠；

報紙前排都有報道話西營盤出名嘅X記甜品因為貴租結業，話係好多大學生嘅回憶，報道好正面，但背後呢？

貓義工知佢地舖頭有隻貓，養左12年，問佢地會點安排，佢地竟然話鎖埋佢喺舖有得佢喎，唔會帶佢走；

貓義工見咁情況，話送佢去貓場搵人養啦，想老闆至少比車費啦，因為要送去荃灣區，佢話只會比$300，隻貓比左義工，比人養定劏左嚟食，佢都唔會理

真係咩野說話嚟架～～隻貓幫你捉老鼠，又逗得客人開心，最後竟然係咁。。。

一隻12歲嘅貓比人遺棄，根本唔會有人會收養囉，真係好陰公。。。

今日因為要還人情債，幫一間貓屋影D靚貓相，原來X記貓就係喺度，佢變到好自閉，唔同其他貓玩，剩係面壁。。。

soyjoy

2012-01-16T00:02:00.003+08:00

當年，去日本旅行時，見到藥房超市貼左好多田中麗奈嘅海報，賣嘅係新產品。。。soyjoy，即買枝當零食，覺得味道一般，之後香港推出都無買過。。。

今日，當我plan緊再去日本時，收到通知中獎，中左12枝soyjoy同兩隻膠碟；今次唔會當零食，會變成我嘅早餐啦：）

廢人廢語

2012-01-15T00:01:00.000+08:00

廢話一則

同朋友行山中途。。。

我：隻膝頭落樓梯又有D酸㖭
朋友：咁要食曾江果隻啦
我：美源髮彩呀？

決定去旅行

2012-01-14T00:01:00.001+08:00

好耐無旅行，終於落實出發；買左東京機票，只需$15XX（未連稅），早機去晚機返；2月18日出發，6日5夜；

多謝大頭，阿粉，老師三位達人嘅資料；日本果位帥哥，我等緊你嘅推介架：）

初plan，會去伊豆，鎌倉，江之島

係咪咁最好呢？仲度緊。。。

麥當勞之所見所聞

2012-01-13T00:01:00.000+08:00

地點：麥當勞
人物：師奶與她的一歲小孩
時間：2012嘅某一個下午

事發經過。。。

師奶到櫃面買野期間，佢手抱嘅小孩攪個飲管箱，終於整跌冚住飲管箱嘅透明阿加力蓋落地，咁，個師奶執起個蓋，唔係比職員清潔，而係就咁將個阿加力蓋放番落個飲管箱。。。

最精彩還在後頭，佢走去隔離個飲管箱攞飲管。。。。我O咀了

咁多人，可以影乜呀？

2012-01-12T00:01:00.003+08:00

繼續清水灣郊野公園；噚日講到，個公園堆滿人同垃圾，但一場嚟到，點都舉下機啦，有乜影呢？

呢個公園其中一大賣點，對正青洲（中），同果洲群島（左）

名就聽得多，睇過實物未？呢個view，幾靚架喎真係

青洲嘅右邊，係哥爾夫球場

呢個公園可以帶狗嚟架，佢有工具比你掃屎，好體貼

年青男女帶埋天葵鼠“金金”出嚟玩，小朋友見到開心到抱嚟影相；其實我都想抱下囉～

人多到嚇死，想避開影唔到人係妄想，決定影埋佢地做構圖一部份，呢張我like

成班人行過嚟，正，影；出嚟效果唔錯，呢張我又like

走嚟走去吖啦，影埋你，呢張我又又like

離開嘅時候，經過停車場，見到呢隻巨貓瞓左覺，借車身樹影做構圖，呢張我又又又like呀

最後呢張，我取名眼睫毛：）

﹣﹣﹣﹣﹣﹣﹣﹣﹣﹣﹣﹣﹣﹣﹣
點去清水灣郊野公園？鑽石山地鐵站搭91號巴士至清水灣大坳門道迴旋處下車，往大坳門路步行二十分鐘

郊野公園之淪陷

2012-01-11T00:01:00.003+08:00

星期日，去左清水灣郊野公園，又名大澳門；

行去時，相距仲有15分鐘路程已聽見喧嘩聲；

去到，見到差不多全部係疑似印度人，無一千都有八百個，男女老幼有個共通點。。。講野好大聲兼大嗌

成個山頭都企滿人，全部放緊風箏

樹上掛滿七彩風箏嘅奇景

雖然遍地垃圾，但佢地又喺度野餐喎;D細路呢，互掉垃圾同石頭

佢地唔知係乜組織，帶備大量風箏，放之不盡，個包裝仲係印度文㖭

四點鐘，佢地陸續離開，奇怪現象出現啦，好多港人走去執人地跌落嚟唔要嘅風箏玩，唉～

通山風箏又唔可以全部賴哂人，當日仲有幾個阿叔玩𠝹風箏，玩到好high㖭

班“旅行團”走後，效野公園變成咁。。。

變成咁。。。

變成咁。。。

變成咁。。。

變成咁。。。

唉～～～～～～～～～～

四台（唔）頒音樂大獎

2012-01-10T00:01:00.002+08:00

今年嘅樂壇頒獎禮話咁快就完左，係時候總結一下各歌手嘅成績，唔係睇邊個最多獎，係計下邊個最少呀～

四個台加埋超過260個獎，剩係新城派豬肉都138個，連”李紫昕“都可以憑《星光下的思念》攞到新城勁爆原創歌曲，裕美都可攞新城勁爆躍進歌手，果個晚晚賣廣告咩野"umbrella"乜又加都攞幾個獎嘅時候，果D都叫有D名嘅，先分得一個半個甚至一個都無唔通真係得罪人多？

（以下歌手全部2011都有出碟，亦無宣佈話自己唔攞獎）

先睇第一個，得一個獎。。。鄧穎芝《Boom Boom》。。。新城勁爆跳舞歌曲；
04年出道架啦，唱左咁多年都咁霉，都真係陰公

第二個，得一個獎。。。鄭融《Kiss Kiss Kiss》。。。新城勁爆跳舞歌曲；
歌其實唱得唔錯，但新聞永遠係臭寸不和比人雪，睇嚟都玩完

第三個，得一個獎。。。 MC Jin 。。新城勁爆人氣歌手；
em，連無線都分唔到豬肉，唔通以後真係要主力拍戲？

第四個，得一個獎。。。張繼聰。。新城勁爆創作歌手；
著足件道士袍大半年，終於換到一個獎，恭喜哂

第五個，得一個獎。。。野仔。。。叱咤樂壇組合（銅獎）
自己友力撐下，分得一個獎，其他台啋你都儍

第六個，得一個獎。。。BOYZ 。。新城勁爆跳唱組合
復出後，連英皇都爭唔到獎，好危～

以下三個單位，出左碟但一個獎都無

JW。。。舊年金曲金獎得主，今年變白果王

鍾嘉欣。。。連無線都唔比獎，有D野喎

JUNO。。。碟名可以改為。。。無獎

ps:如有錯漏，幫手糾正

休息

2012-01-09T00:01:00.001+08:00

掛住睇電視，今日休息，費事比人話我是但

本週廢相

2012-01-08T00:01:00.002+08:00

警鐘胸

噚日答案

2012-01-07T00:01:00.000+08:00

原來有$25架，夠食個下午茶餐，都唔錯喎

唔怪得之咁多人執紙皮啦！

回收舊雜誌

2012-01-06T00:01:00.000+08:00

我一星期睇三本雜誌，每本又一書幾冊，隔個星期就會將D書掉去垃圾房回收箱

最近有朋友上嚟，一見到我堆亂糟糟雜誌，就話：你睇咁多，其實可以拎番去賣喎。。。

我“叮”一聲，決定寫呢篇。。。窮家仔賣雜誌真人實錄

咁啱貓義工架車喺我屋企，縛好D雜誌，行兩個街口嘅回收工場賣紙啦

今日問題嚟啦，相中呢堆雜誌，磅重係30市斤，番嚟查，1市斤係500g,即係15kg,可以賣到幾錢呢？

茶果嶺尋寶﹣下

2012-01-05T00:01:00.001+08:00

繼續茶果嶺尋寶。。。

今次最意外驚喜係佢。。。糯米糍

行去冰室途中，遇見一個阿姐，手捧住一個鐵盤，問我地：食唔食糯米糍呀，$10三個，芝麻花生餡，包好食，我地話唔要啦。。。
見佢沿途問屋入面D居民，又真係買架喎；我地轉軚買左三個；
好軟好好味，唔識形容；剩係記得我咬第一口後，爆左句：哇！好得喎；
好食過酒樓甜品舖架，跟住見佢原來係樓上舖，又好奇乜野係狗仔粥，於是上去問阿姐，佢話係客家人食品，將粉團放落粥度，我有興趣架，但佢話夜D至有；朋友知我有影佢電話號碼張相，誇張到問我攞，想訂貨喎～（雖然我都想再食）

中途遇到呢隻貓，見佢伏喺度唔郁，D毛又亂糟糟，以為佢病，餵少少乾糧比佢，佢又食喎；

餵完走左，影完相返嚟，佢仲喺度，睇下佢做乜？

跟住有個捨荒婆婆走出嚟話：玲玲，你做乜咁為食，出嚟問人攞食呀，D哥哥姐姐都比狗咬死哂啦，你仲出嚟，快D跟我番屋企啦；
原來有人養架，都好～

呢類木屋區特式唔影隨時無，狂影呀

原來議員會派月曆架喎，我區果D又唔見派比我喎

呢三張係今日至愛

原來行下呢類舊舊屋村，仲好玩過行商場；唔信？試下啦：）

ps:早兩星期提過嘅海事處落貨果個碼頭，雖然無保安睇門口，但仍然入得去影相釣魚

再ps:
每件事都有賞味期限。。。觀塘海濱公園，呢個我曾經話係最正影黃昏嘅地方，前要已經越起越高，破壞哂；想影黃昏行過去茶果嶺好過

茶果嶺尋寶﹣上

2012-01-04T00:01:00.004+08:00

早兩星期去過茶果嶺，行錯路，miss左條村，今次去補番。。。原來入面好多正野呀

今日先講榮華冰室；唔知點解呢條村細細，但入面有三四間冰室咁多；而榮華冰室個外形仲保留住同幾十年前一樣呀

入到去，差不多滿座，一個食客師奶話：座低食啦，食唔到幾耐架啦，話要拆啦
朋友：幾時拆呀？
師奶：話左好耐啦，8幾年話拆到而家啦
我O哂咀，心諗：8幾年話拆，拆到而家仲喺度，師奶你真係廢噏

睇下食乜先

嚟呢類冰室，總係要叫個餐蛋麵，比較特別係有蝦子麵你揀，我揀左出前一丁，麵就“淋”左少少，但嚟呢度都唔係為左食架啦

好，開始尋寶，
張實木雕花櫈本身就係一件寶啦
中間張隨地吐痰海報真係同幾十年前嘅一樣架，呢張勁呀～
吊扇同個天花都比較少見

仲有風扇製同個百事雪櫃

左邊嘅林志玲鐵皮風景月曆，以前真係勁興架，果期係邊個紅，就會有個女星退地（較剪剪果隻，退得好核突），套喺巴黎鐵塔呀，大苯鐘等風景唧前面，要幾娘有幾娘；但林志玲咁近代都仲有嘅？？？？？

睇埋貼喺舖頭嘅相，只係認到郭鋒嚟過，其他相片都係舊紀錄啦，鄧麗君張相貼到甩哂色啦

茶果嶺仲有乜睇？聽日繼續

2012第一個黃昏

2012-01-03T00:01:00.004+08:00

做人有時真係唔使太有計劃，有時隨意D反而有收獲。。。

1月1日，本來計劃係可能要幫手捉狗（幫佢搵個家），但義工改期，突然得閒，朋友建議去布袋澳，但其實兩星期前至去過咋喎（雖然仲未寫blog)，為乜呢？最後會揭曉

又係咁啱，果朝重播蘇玉華飲食節目，見佢去布袋澳撞到發哥，背景個碼頭未去過，決定去搵下喺邊。。。

好，行程開始，先去將軍澳寶林站搭16號綠巴（$8)，總站就係布袋澳，但我地今次揀左喺總站前嘅布袋澳村路口落車，行去哥爾夫球場方向，有個牌寫住去天后廟，行落去。。。
見到宋代石刻同一座依山而建嘅巨型天后廟，宏呀～原來果度叫佛堂門天后古廟

廟打理得好好呀，原來有內地團專登嚟架喎；最欣賞佢地條巨型龍柱雕刻，同細個去珍寶海鮮舫果條相近，但大好多呀～

廟起喺高台，望出去係無敵大海景呀，仲有個碼頭㖭，但唔係電視果個，呢個更大，個景更靚；即係iphone指南針check下，對正西呀，發達啦～雖然當時3:00pm未夠，決定慢慢影到太陽落山呀

左邊係小沙灘，中間有長梯級，右邊仲有個石灘，可以影下浪

好多人嚟釣魚，但今日好似無乜收獲

magic hour嚟啦，殺呀～兩張都好鍾意呀～

上番廟影多幾張

呢個黃昏景真係唔嚟唔得呀

最後，行番去布袋澳村，為嘅係牛記年糕，特色係混左薑汁，阿婆每日新鮮製造；早兩星期買過，超好味；專登去入貨呀；阿婆話發哥每年到年廿幾就會去幫趁買喎～

1月1日

2012-01-02T00:01:00.000+08:00

今年第一餐係免費嘅，麥當勞請嘅。。。

12:15pm,去到大圍嘅麥記，朋友要巨無覇餐($20)，我要至尊漢堡餐（$28.6)，拆盒食左幾啖再望下，點解無番茄嘅？

拎住個包同個盒去櫃檯問，無人得閒啋我，執位嘅職員見到問我乜事，我話無左番茄嘅，佢話今日番茄未番喎。。。

跟住見到櫃面做緊野嘅女經理口噏噏同個男職員傾計，以為佢會補番比我，點知咬多幾啖都見佢地無反應。。。

我又覺得蝕哂喎，無番茄嘅至尊漢堡同巨無覇真係無分別架喎，仲少左塊包㖭同貴左$8.6。。。

朋友睇唔過眼，走去直接問個經理，佢嘅答覆竟然係退番$28.6比我，免費比我食喎,雖然堅係覺得佢地做野求其，但唔使錢仲想點，食多個雪糕先走呀。。

跟住去影相，影左2012年第一個黃昏，今日開紅盤呀，好大好靚

今日問題：知唔知呢度係邊樹呢？

新年快樂

2012-01-01T00:01:00.003+08:00

又新一年啦，希望大家都健康快樂:D

2011第369篇

2011-12-31T00:01:00.002+08:00

今年超標完成。。。

今日一早，收到餵貓阿姐電話，話有隻貓屍喺佢大廈附近，想我幫手打電話搵食環署執左佢；打左去，話會有人盡快處理。。。

半小時後，一個講唔正廣東話嘅女人打比我話佢會去執，佢身在西環，問我可否帶路，我落去見到佢，無著制服，推住架BB車，車上有個約兩歲嘅B，
我話：你係食環署嘅？
女士：係呀，啱啱放左工，接番個女；要佢地搵人嚟就耐啦，我住呢頭，我去睇啦（佢講野唔正，我估佢係咁講）
佢繼續：如果係私人地方我就唔執架啦，試過有同事比人話偷野呀
去到。。。

塊地分開兩邊（好細塊地架咋），一邊係食環署，一邊原來係私人嘅，隻貓死喺私人果邊，好多烏繩“嬲”住
搵唔到人開門，要我自已見佢門口個公司名打去，原來又分兩間公司，左攪右攪，突然有職員（地盆工人）嚟開鎖,LUCKY（行過幾十次都無人架），女士又兇人叫人執出嚟，佢唔入得去，唔見野賠唔起之類說話，終於我幫口叫佢地戴哂口罩手套鐵剷剷佢入垃圾袋，拎出嚟時真係臭到想嘔。。。

女士一手攞貓屍袋，仲想一手推B車，我話幫手推B車啦，佢話唔使啦，得架啦；我真係戥佢危險囉，有菌兼多車呀果度

佢行到中途，見到幾個師奶同事，佢同我講：你行先啦，我要傾計呀～

拎住條屍都仲要傾？？？？？？

我番屋企由頭洗落腳，真係形住仲聞到，下晝仲要捉狗，最後仲要失敗，而家好謝～

我出年唔要唔要再跟咁多呢D事，真係太攰。。。

哇！好勁呀

2011-12-29T23:51:00.007+08:00

自有排名以嚟，我個blog最叻都係200左右，達仔個blog噚日竟然出現95位，我嚇左一跳

原來寫狗果篇幾日嚟瀏覽人數去到1163，好多人都想救呢隻狗呀，其實救狗行動亦都有進展，但一切等成事先公報啦，我會盡力架啦～

本週廢相

2011-12-29T00:01:00.002+08:00

聖誕得閒行花墟，見到呢個燈箱，認唔認到呢兩個學生妹？

左邊係唐寧，右邊係梁漢文太太Karen，到而家都仲比呢間校服舖用緊張相，又好似曾江美源髮彩咁，簽錯約？

唐寧而家都生埋仔啦，佢隔離呢兩個小朋友都至少廿幾歲啦，睇真D，個𡃁仔咁卡臣嘅？

2011鳴門大事回顧

2011-12-28T00:01:00.001+08:00

1月：
曼谷遇見科莫多龍，驚

2月：set影街貓做2月功課，埋下養達仔嘅伏線

3月：
抽獎抽到免費澳門遊，成世人至叻呢次

日本大地震

4月：
塔門嘅燕子，呢篇係今年高收視代表作嚟架

5月：
抽到W免費自助餐，happy

中左六合彩五獎，仲happy

做左份好滿意嘅功課（貓國旅行）
話時話，欠交功課咁耐都無人出聲嘅：（

6月：
第一篇正式寫達仔（當時仲叫佢黑仔），當時都無諗過會養佢

7月：
今年寫少左快獸，但呢篇我好鍾意

8月：發現達仔病兼貓媽懷孕

9月：
帶達仔去睇醫生

睇林憶蓮演唱會，今年唯一嘅演唱會

10月：
那些年，我們一起追的女孩，哇，破香港紀錄，梗係大事啦，呢篇，係我個blog有屎以嚟最高收視第三位架，幾多人search呀真係～

決定養達仔，從此責任大左

11月：
為三隻貓B搵到家，好安慰（1）（2）

達仔耳仔做手術

正式幫達仔開個新blog。。。我家的達仔，多多捧場

12月：
去石澳，好多遺忘嘅舊記憶攝番出嚟

今年好多擔心達仔同其他貓嘅紀錄，希望出年多D開心事啦：）

麥當勞聽到的笑話

2011-12-27T00:01:00.000+08:00

一個人食麥當勞

隔離坐左一個老伯同一個唔開聲以為係阿叔嘅阿嬸，阿伯可能撞聾，講野比較大聲；

從佢地嘅對話可以知道佢地係唔識嘅

佢地閒話家常，由講天氣，政治到睇報紙。。。而我食完正準備走

阿伯：我呀，以前睇新報成報架

阿嬸：幾好喎，又食得，仲睇到報紙喎，好健康呀你

阿伯：我呢排都有病架，我肛門有事呀。。。。。。

全場dead air,我落樓梯忍唔住笑出聲㖭，hehe～

香港有座比薩斜塔

2011-12-26T00:01:00.003+08:00

最近，360經常故障，抽佢水先。。。

通常見到360吊車都係喺東涌總站附近，換個位置，由呢邊望過去，原來固定鋼纜個塔係斜架，好斜架，好似好危險咁呀;係咪每年斜多2度架？

另外，天寒地冬，呢班友划乜野龍船呢？

ps:噚日無人估中，其實同今日係同一處地方，我影相呢個位，係東涌嘅邊樹呢？

身在何方？

2011-12-25T00:01:00.003+08:00

聖誕，寫篇簡單嘅。。。

我去左邊樹影相呢？

聽日開估

聖誕咭

2011-12-24T00:01:00.000+08:00

快獸祝各位聖誕快樂

東涌的藝術

2011-12-23T00:01:00.002+08:00

上星期六，本來想上東涌婆髻山睇日落，去到先知封山開路，行左條荒蕪嘅奧運徑，見路牌寫住“東涌藝術徑”，好，就去會一會你。。。

行左15分鐘都未到，完全唔覺有藝術嘅時候，見到呢張紙。。。

佢嘅隔離。。。

再隔離。。。好多底褲呀～～哇，好藝術呀

呢張名為”公主都有瞓街的一天“

仲泊滿單車。。。睇棵植物，應該都泊左好耐

上哂鎖鍊？咪得番個軚囉。。。。哇，好藝術呀

馬路唔比曬衫啫，曬下臘肉咸魚又如何呢？哇，好藝術呀

呢張相我幾鍾意，叫做“烏蠅唔（嬲）屎會（嬲）乜“

呢張更like，雖然好腥臭，都比心機影靚佢

行近屋邨，見D師奶推左D超市車出街（只係影左呢張）

呢個阿叔推住架車載住個超齡巨B；哇，好藝術呀

好，到藝術徑啦，吓，得幾舊雕塑喺屋邨就叫藝術徑呀；哇，好藝術呀

呢舊係咪叫做“一褲都係”呢？哇，好藝術呀

噢，真係好藝術呀～

東涌真係一個充滿藝術嘅地方呀

肥係罪嚟架

2011-12-22T00:01:00.002+08:00

呢篇係前日茶果嶺嘅上半部。。。

因為搭錯車，總站上左半山，果度叫茜發道，係一條大斜路，隔離係匯景花園。。。

路牌指住話上面係網球場同遊樂場，一場嚟到上去影下啦

哇！哇！哇！有樹掛，好有風”味“呀，有跡可尋架

點解網球場同公園會起喺山頂架，無車到，個個揸車至嚟到，乜設計嚟架，行到喘氣呀！

睇真D，原來政府白紙黑字寫明話個你知，肥係罪嚟架，唔怪得個設計要你行到喘哂氣先有得比你玩啦；有無人告政府歧視呢？

網球場無乜特別，只係有棵楓樹，變緊紅色，遲一個星期嚟可能會好靚

去遊樂場，係要再上架；為左少D罪孽，我會努力架

到啦到啦，好似去左日本咁呀

最大賣點係棒球場，好大嘅草地呀

好大嘅計分牌呀

睇住佢地打波，唔係講中文架，真係好似睇日劇

跟住就離開公園落山，靠google map帶我地行去茶果嶺

完

又見貓B

2011-12-21T00:01:00.003+08:00

今日下晝，約貓義工食飯兼問佢借籠捉貓媽（又捉，今次一定得）

食完飯，佢話帶我睇D野。。。

行到一條污糟後巷，盡頭處見到佢地。。。

因為對面D舊樓即將清拆，所以估計係有人搬就掉左隻阿媽出嚟，跟住生埋B㖭，附近餐廳發現再通知阿姐，本來有四隻B，一隻已經失左踪

估計三個月大，頭圓圓好可愛，兩隻仔一隻女，食緊乾糧啦

兩隻仔灰黑色，隻女帶啡色（後）

白頸巾＋白襪仔

唔係太驚人

呢隻係阿媽，完全唔驚人，第一次見就已經任摸任玩；今日阿姐用佢嚟比我做捉貓練習㖭

上星期剛做左絕育

居住環境惡劣，有無人想收養佢地呢？

問過阿姐，如有興趣先聯絡我啦(edwinor@netvigator.com)，多謝！

茶果嶺﹣亂行

2011-12-20T00:01:00.003+08:00

星期日，茶果嶺

網上資料，觀塘港鐵站出，巴士總站搭23B綠色小巴；
去到，綠巴無寫number,地下寫住23B,問司機係咪23B，係，但得一個位，結果上下一班，又係無number，無為意，咁就出事，去錯地方。。。

去左邊，聽日至寫，因為今日呢篇有時限，要寫左先。。。

好，由行到嚟茶果嶺寫起，見到貓呀，出嚟曬太陽呀

呢度又有一隻

左邊係條村，前面出大街，行邊便好呢？揀前行右轉，又行錯路啦；結果行番左邊，終於搵到天后宮

因為不停行錯路，太陽跌緊落嚟，只可以匆匆行個圈（點解咁急，因為對面有好野，請繼續睇落去）

原來呢間天后宮係求子架

有善眾帶埋BB嚟環神呀；睇下果兩舊石，唔係好似啫

好，過對面，亂行之下，竟然搵到個影黃昏靚位，呢度係個落貨碼頭

燈燈燈登，無遮無掩黃昏全海景

同D保安阿姐傾計，佢話下星期政府就收番，唔知仲比唔比入嚟呀，有影趁手啦；之後好似會做海濱長廊喎

絕響，咁梗係要狂影啦。。。

呢張相，影左60張至中呀，係今日至愛

等到著哂燈，影埋夜景至走，好盡慶

今日影嘅相

2011-12-19T00:01:00.000+08:00

今日去左茶果嶺，行錯哂路，但影左幾張滿意相片，一日有幾張真係唔易架啦

1/見到呢朵大紅花，花蕊隊左出嚟，小背光，影第一張就中左，花蕊好似小皇冠

2/黃色花，綠色草蜢，呢張相欠嘅可能係一個醫生

3／呢張我影得好有感覺，蜂蜂，安息啦～

4/見堆野草發哂光，行上斜坡影佢，原來好聖誕樹呀，唉呀，好跣呀～

5/舊式唐樓加天台天線，唔影我諗過幾年無得影架啦～

預告：聽日茶果嶺遊記

香港有個復活節島

2011-12-18T00:01:00.000+08:00

香港有個復活節島？咪又係石澳囉

睇下，真係復活節島上嘅人像嚟架

究竟係咩野人做架呢？佢面向東喎，睇日出喎，唔通係一個時計；唔通係外星人做嘅？真係一個謎呀

同場加影：佢隔離仲有一塊狗頭石，石像唔通係佢主人？

ps:石澳特輯終於都寫完，影一日寫七日，破哂紀錄呀

去石澳，遊人會做乜呢？

2011-12-17T00:01:00.000+08:00

有人游繩攀石，7個勁

有情侶互影肉麻chok相，其中一人頭戴紅絲花加羽毛，3個娘

有人帶齊燈影cosplay，4個驚

有後生仔懸崖邊放膠袋當風箏，6個聊

有鬼佬玩徙手攀石（下面有軟舖），2個叻

有人滑浪，5個勇

有人睇人滑浪，7個廢（廢果個係我）

有人玩單槓，2個強

去石澳就要搭9號巴士，6個9（$6.9）

當然，最多人做嘅係影結婚相

比喻呢段感情經得起風浪呀

呢pair又影。。。。
新娘：經得起風浪啫，咁凍，都要著褸架（設計對白）

新娘：下？單人照呀，除衫先（設計對白）

呢個美指（紅衫果個）擔住指煙嚟做野，好唔專業呀

喂，後面兩位唔好阻住我影加菲啦

呢個“一望無際愛是無涯位”又係必影位

但，無試衫架咩？無件啱身咩？

預告：聽日仲係石澳（好攰）

香港有個海角七號

2011-12-16T00:01:00.003+08:00

上星期六，超凍，但個天超靚，揀左入石澳，筲箕灣巴士總站搭9號巴士直達

好多年無入嚟，原來呢度幾台灣架喎，行去石澳後灘嘅路，仲保留住小鎮風味

好快就行到石灘，見到充滿回憶嘅藍橋啦；其實除左呢度有海角七號feel，呢條橋你坐幾個蛋散上去，都有那些年嘅感覺呀

原來石澳星期六遊人唔算多，但好多人都會喺橋上影下相，影乜？

影浪；真係好大浪；果日係月蝕，有無關係呢？

你以為企果度好安全，以為隔好遠，個浪真係會發神經咁冚過嚟架，欺山莫欺水呀；睇下，呢個浪有幾尺高呢你話

一場嚟到，梗係行埋上山啦，唔高，好易行？原來勁大風，真係吹得你郁，唔係有欄杆，相信呢篇blog唔使寫啦！
行到盡頭可以觀賞一望無際嘅海，仲有個燈塔喺海中心，但果日無帶長鏡，所以只可以離遠影一張啦

從山頂望向藍橋小沙洲果邊，有個奇怪現象。。。
左邊嘅海浪由左邊嚟，右邊嘅又右邊嚟，兩邊都好大浪，究竟吹乜風呢？

另外，個牌叫你唔好攀爬喎，咁我係咁易企高D睇下啦，hehe,有乜睇呢？

哇！兩邊都係懸崖嘅海角呀，靚呀～

黃昏番嚟再睇下浪，依然強勁

未完，寫極都唔完。。。。。預告：遊人嚟石澳，會做乜野呢？

舊記憶

2011-12-15T00:01:00.001+08:00

我又嚟賣感性啦，講下舊事。。。

小時候，每逢放暑假，老豆阿媽都會帶我地入石澳，每次都過夜，我記得有次仲留低我同家姐幾日，點解咁放心，因為表舅婆同幾個表舅父住喺石澳，有人睇住架～

阿公係揸貨車嘅，所以有印象我地係坐密斗車入石澳架，仲要唔係坐車頭，係坐喺後面載貨嘅地方，諗番都幾牙煙喎～

幾個表舅父都係救生員，所以好大部份嘅記憶都係坐喺沙灘砌堡壘，而每次都會有人讚我砌嘅堡壘砌得靚（又係專記埋呢D野），呵呵～

石澳係出名大浪架，所以表舅父係唔比我地單獨落海，尤其係灘嘅右邊，去過嘅都知，右邊你行頭幾步海水只係到你小腿，但突然急斜去到心口架，所以以前石澳係每年都有人浸死架，每年都死一個，好邪架～而其中一次我仲喺沙灘，不過當時太細，唔知發生乜事

表舅婆好錫我架，長大後雖然少見，但有次我跟公司廣告去到石澳取景，撞正佢，佢開心到呢；因為做緊野傾得唔多，隔左一段時間，佢竟然拎左碗湯嚟比我，話日頭太毒，要飲左佢喎，成隊crew同我上司笑到反肚，但好warm囉，但係。。。。果碗係魚湯（表舅婆，咁大整估呀），但我都飲哂佢：）；果次係我最後一次見到佢，之後無耐，佢就走左啦

好，睇下相；睇相簿至知嚟過，我同家姐嘅合照；當年嘅靚仔小朋友

今日已經變左靚仔大叔啦

68%

2011-12-14T00:01:00.001+08:00

今日去左工展行一個圈，正確嚟講係半個圈，太多人唔想行，走佬

見到米雪同三哥個攤位，見到大條banner寫住：68%有效改善夜尿。。。

我一見呢D眼就發光，個腦就計數啦。。。

如果平時屙開”一公升夜尿“（唔係果套日劇呀），而家改善左，只係屙0.32公升，即係都要起身屙，無乜用囉～

個腦記乜架呢？

2011-12-13T00:01:00.000+08:00

都仲係星期六（有排寫），去左石澳，遊遊蕩蕩，行左嚟呢間士多，朋友話要買樽水。。。

朋友：大枝幾多錢？
老闆娘：＄7
朋友：咁細枝呢？
老闆娘：＄5

呢個時候我望下條街，再望下間士多。。。個腦叮一聲諗到D野

我同朋友講：呢度係咪Juno拍戲間士多？
朋友：你問老闆娘囉，我諗佢連邊個Juno都唔識呀？
我：老闆娘，呢度係咪Juno拍過戲呀？
老闆娘：係呀，你認到呀？同個女仔呀
我：咸片女星
朋友：邊個咸片女星呀？
老闆娘：日本妹
我：蒼井空呀
我：呢度係賣飽果度？
老闆娘：你企果個位咪賣飽果度囉，（指住條街）佢（JUNO)咪喺上面跑落嚟囉
﹣﹣﹣﹣﹣﹣﹣﹣﹣﹣﹣
我成日話自己記性差，但有D怪雞無聊野又總係入哂腦，應記唔記；上網search下，套戲叫“復仇者之死”，搵到呢兩張劇照，咁都認到個景，我都覺得神奇。。。

--------------------
影完相，冷冰冰，行回頭路再經士多，買左枝熱維他奶，舒服哂；

再買埋石澳名物﹣梅菜芯，每包廿蚊，番去蒸豬肉啦喂～

加菲的淪落

2011-12-11T21:35:00.001+08:00

今日去石澳影相。。。我影乜呢？

有兩隻貓喎

meow,望過嚟啦

哇！兩隻金貓呀？前面果隻。。。。“加菲”呀

唔好驚啦，咪走啦，影多張先啦

你咪係加菲？

呢隻都幾似你喎，雖然女樣D，但剪右耳，都係仔嚟喎，你兄弟呀？

咁靚嘅加菲咁都淪落到要做街貓，摷垃圾桶搵食，我又無帶貓糧喺身，陰公～

月蝕

2011-12-11T00:01:00.000+08:00

從來無“現場”睇過月蝕

今晚亦無諗過出街睇（影），咁凍～

但原來騎樓都望到喎，拎埋機出去影，好難影，，影左一陣，流BT，收工～

貓B（家姐）舊相

2011-12-10T00:01:00.001+08:00

見到貓B姊妹花而家精精靈靈，唔使捱凍，有人錫，好戥佢地開心

當初佢地喺山頭，為求幫佢地搵住好人家，帶哂長鏡捕捉半日影佢地D可愛相，咁梗係揀D最cute最靚嚟引人收養啦。。。

睇下家姐，捉到佢果日個樣幾咁cute

呢張呢？哇！樣衰到呢

當初如果我放呢張出嚟，佢嘅命運係咪會改寫呢？

C小姐，你見到呢張相，有無衝動收養家姐呢？

今日廢廢地之硬漢子

2011-12-09T00:01:00.002+08:00

今日午飯後，見到呢條banner，個腦就響起呢首歌。。。憑傲氣，自我寫，我一生的詩。。。。

佢讀書時代個花名一定係。。。。。。“少年警訊”

今日嘅“今日廢廢地”經已播放完畢，下次再會

香港有個六本木山

2011-12-08T00:01:00.001+08:00

星期日，攰攰地，無力行山，搵個近D嘅地方影下相，決定去”立法會綜合大樓“；由演藝學院出發，經分域碼頭行過去

碼頭外有中港美國旗，呢個方向望向灣仔，全玻璃外牆密質質嘅玻璃之城，香港獨有

呢棟就係”立法會綜合大樓“，呢邊睇都幾三不像

入去，遇著幼師示威，職員忙於派旗仔比老師；咦！你派比我呀？乜我似老師咩？早知轉行啦～

唔，睇下點行先。。。

中間棟“凱旋門”，原來除左中間穿"lon"，上面都穿架

小山丘＋草地＋石屎牆＋新型建築物，有D似六本木山呀

來自日本嘅快獸都認同

但向海呢點就香港優勝啦，雖然出面仲填緊海

呢度將會成為新地標，亦係拍拖嘅勝地

完

貓B近況

2011-12-07T00:01:00.001+08:00

跟進下D貓BB

1號同3號因有C小姐收養，過住幸福嘅公主生活，仲為佢地開左個blog，1號改名叫家姐，3號就叫亞妹，佢非常用心，睇得出錫到D貓燶哂，未去過嘅入嚟睇下啦

2號呢，佢老豆F先生係一個非常忙嘅死佬，lur佢一排，終於有相睇；2號改名叫阿B（咦！同佢阿哥同名）

肯跟主人啦

呢個煲呔打扮想點呢？

聽聞非常非常百厭，成日撩大貓玩，次次都演變成打架（輕微果隻），而家大貓怕左佢

但瞓覺佢地又痴住瞓喎，咪幾好感情，呵呵～

為junk food增值

2011-12-06T00:01:00.002+08:00

天寒地冬睇電視頒獎禮，舊年就一丁友都打邊爐，今年蒸下燒賣食

鍾意食魚肉燒賣（嗱，我又食魚啦），熱辣辣加杯茶un un腳睇下邊個攞獎，好hea~

講番主題，咁點增值呢？

1/先買呢類冰凍燒賣，今次買淘大，今期大特價，味道只係一般;粉味太重，有雪味，點好呢？

2/想好食，係要蒸嘅，叮係差好遠架，成舊粉嘅溫度唔平均架，表面又會乾“爭爭”

3/為增加鮮味，當佢海鮮咁處理，加葱花，最緊要係落蒸魚豉油，再加D潮洲辣椒油，perfect～

junk food都可以變美食，杏兒都可以攞視后啦，恭喜～

心甜推介

2011-12-05T00:01:00.000+08:00

上星期五，去左大圍一趟，為嘅係朋友新開甜品店攪嘅試食會呀

呢位朋友我未見過真人架，佢咪係貓B阿Bu嘅主人囉

帶同朋友一齊去，我叫左“芒果配奶凍”；非常好味呀，果肉又多又甜，奶味濃，推介呀～

朋友叫嘅係比較少有嘅”法式紅酒燴梨雪糕“，酒味唔濃，梨清香，雪糕係movenpick，落重本呀

店名係”心甜“，地點係大圍積富街呀～

廢人廢語

2011-12-04T00:01:00.004+08:00

話咁快又撞到一堆廢話人講廢話，今次三單都係來自師奶。。。

1/
時間：星期五晚上
地點：椰林閣
人物：師奶＋部長＋女侍應

師奶：（對住餐牌）呢個咖喱牛腩飯可唔可以唔係咖喱㗎？
部長：唔可以架，你睇緊嘅係咖喱食譜，無得唔要咖喱架；你或者睇後面呢D啦
師奶：咁等陣先嗌

隔左五分鐘：我要咖喱牛腩飯，個咖喱可唔可以另上架？（死唔放過呢個咖喱牛腩飯喎）
女侍應：無架喎，煮好左架喎

我想講：真係唔明D師奶諗乜？成個餐牌無一百都有幾十樣佢揀，佢係都要揀咖喱牛腩飯走咖喱嘅？

2/
時間：星期六上晝
地點：綠巴上
人物：師奶＋阿伯＋司機

綠巴去到大口環，阿伯上車。。。
司機：睇左有無位先好入錢
其他乘客：無位喎（阿伯正想落車）
師奶：我地就落啦
阿伯：你地兩個呀？
師奶：係呀，我就落架啦（但無諗住而家落喎）
司機：未落呀，無位呀

阿伯落番車，綠巴轉個彎，師奶同個男人加另外兩個人都落車；

我想講：真係想幫人就早少少落車啦，唔落又要搭嗲，將D事複雜化，阻住地球轉；又係唔明D師奶D思考纙緝架？

3/
時間：星期六下晝
人物：餵貓阿姐＋我

同區一個我認識嘅餵貓阿姐打電話比我。。。

餵貓阿姐(喊咁聲）：你今日會去XX餵貓嗎？
我：今日唔去喎，我行緊山，咩野事呀？
餵貓阿姐：有隻貓唔見左幾日呀，睇下會唔會走去你邊啫？
我：我邊無新貓喎，你唔見邊隻呀？
餵貓阿姐：“占美”呀，唔知係咪我鬧佢食野唔分比人，佢嬲左我呢？定係又凶多吉少呢？（已經想喊）
我：邊隻叫“占美”呀？未聽過嘅？咩野色架？（有隻叫jimmy咩？）
餵貓阿姐：灰色架，條尾尖尖果隻呀？

原來佢叫”尖尾“至啱，亦醒起佢曾經講過佢另一隻叫“捲尾”嘅貓。。。

我想講：可唔可以唔好咁改名呢？真係一隻二隻都變做裕美D friend

我要吃貓壽司

2011-12-03T00:01:00.001+08:00

網上有人推介呢個網。。。其實講乜架呢？

幾錢件呢？係咪金碟最貴呢？

避風塘的貓頭鷹

2011-12-02T00:01:00.000+08:00

行去銅鑼灣避風塘影黃昏，突然見到船頂有隻貓頭鷹，果頭的鷺就見得多，貓頭鷹都係第一次見呀

見佢唔郁，換長鏡再影

再zoom近D，再影。。。。咦！睇真D，原來係木雕；唉！嘥“菲林”呀

望住個黃昏，有被騙嘅感覺呀

12月banner製作特輯

2011-12-01T00:01:00.000+08:00

星期日，上左寶馬山，為嘅係影張靚靚banner相呀

大家對住鏡頭笑，自然D～

太大風，快快妹仆街鳥

鏡頭之後，原來快獸媽搭上快獸警察

快獸媽連飯煲都掉低呀

真係愛得痴纏呀

呢排成日講達仔，但大家唔好唔記得我地先係呢個blog嘅吉祥物呀：）

都幾廢話架喎

2011-11-30T00:01:00.003+08:00

廢話﹣1

上星期影食物相，我做美指及postcard設計；客人（A）係印刷廠，客人（A）嘅客人（B）係賣冰鮮雞；過程順利，事後客人（A）打電話嚟話客人（B）對其中一碟菜大發雷霆，佢唔肯收貨喎，我問原因呢？佢話。。。。。。。。。。

。。。。。。。。。影到D鳳爪好似雞腳喎

對住呢D客真係好沮喪（D人真係乜都噏得出架）

廢話﹣2
上星期影食物相，我做美指及postcard設計；客人望住電腦問：呢個位可唔可以光D？

攝影師答：呢樣野事後做會易D（跟住佢望一望我）
我答：視后做易D，不過視帝做仲易

攝影師：超！又比你攝到位

攝影師對住我應該幾沮喪，但唔好意思，聽日你又見到我啦

廢話﹣3
落街食晏，食魚蛋粉；中途有兩個著住便利店tee嘅師奶坐低

師奶A：豬手飯
女侍應：你呢？
師奶B：牛牛牛
師奶A：牛牛牛，牛乜呀？
女侍應（醒目）：牛腩，牛筋，牛雜
師奶B：牛筋
女侍應：牛筋咩野呀？
師奶B：都係唔好，要牛雜
女侍應：牛雜咩野呀？
師奶B：凍檸茶
女侍應（有D勞氣）：牛雜咩野呀？粉，麵，米？
師奶B：飯

我相信我係做唔嚟侍應呢份工，會吐血身亡

香港有條英倫大橋

2011-11-29T00:01:00.003+08:00

今次由黃泥涌水塘公園水塘出發，目的地係大潭篤水塘

山上望落淺水灣，原來果個起好廿年都唔開嘅商場外型係隻船

一路行一路影，影到一隻蜜蜂

一塊紅葉

一條天梯

兩朵大頭茶

同埋。。。天天向上天上野

終於到啦，深山嘅英倫橋呀

左捐右捐，最近距離影多張

無太陽，反而有D九寨溝feel

再行，又出現多一條，一D都唔似置身香港呀

聽聞遲D呢度會有多D紅葉，會唔會變成咁呢？

銅鑼灣廣告

2011-11-28T00:01:00.001+08:00

行經銅鑼灣，見到呢個廣告；個女模做乜咁驚青呢？

咁都寫得出，仲出埋街，啋！

$6000

2011-11-27T00:01:00.002+08:00

政府果$6000，原來拎哂嚟醫阿達仔，由第一次由街執佢去醫腸塞，到今次割耳瘤，總數$7000；好彩呢排多job搵返啫～

今日，放低達仔去診所做手術後，好想食生果，尤其係提子，今晚突然知道點解啦。。。。。。。。。。。。。。。。。。。。。

。。。。。。。。救貓一命，勝食七粒葡萄

想睇達仔手術後情況，請睇呢度，謝

達仔明天做手術

2011-11-25T22:00:00.003+08:00

（今日兩台同步）

達仔隻耳仔無起色，仲係流住水，決定睇多一個醫生。。。

問左幾個朋友，決定搵www介紹果個醫生，地址係太子，打電話去約左5:30pm

今日買左貓袋，4:30pm出門口，同達仔講帶佢去睇醫生，呢隻野真係識聽架，即刻走開兼lay埋，幾經辛苦至捉到佢入袋，好彩之後佢無呱呱叫，順利搭到紅van過太子。。。

去到見到醫生，佢話要做手術，手術不大，但要星期六先有期做，明早10:00am再帶佢嚟

另外，呢隻野又肥左，去到4.4kg，達標啦，要開始keep住呢個體重

返嚟沿路佢都好定，番到屋企，放個袋落地，佢郁都唔敢郁呀

拉開拉鍊，佢望住我，連頭都唔敢伸出嚟

隔左一分鐘，終於伸個頭出嚟八下，但個樣驚驚青青

食左少少野，明顯唔開心，又上左我張床瞓覺；唉！睇住你聽日做手術份上，比你瞓一陣啦！

12:00後斷水斷糧，為明天手術做好準備；手術後，就係一隻健康貓貓啦～

泥涌﹣斷橋石灘

2011-11-25T00:01:00.004+08:00

泥涌除左班”黑人箏“，其實環境好靚架，最大賣點就係有條斷橋

非常浪漫，好有愛是無涯feel，呢張相係企喺最高果條影，值得踏前呢一步呀

附近除奇好多人掘蜆，仲有人放狗

呢度真係地靈狗傑呀

又，除左放狗，有一家大細放風箏家庭樂，呢種就健康啦

又又，除左放風箏家庭樂，仲有浪漫到痺嘅小情侶練結他，附近仲要有舊心形石，暈呀～

仲有乜睇，睇下，有串燒麻雀喎

仲可以睇潮漲

附近有條河，好好多魚呀，全部口markmark，原來佢地食貓糧喎

海面向東，所以黃昏太陽落喺屏封樓果便

雖然係大廈景，但係搵下位都影到張靚黃昏相嘅

馬鞍山沿線真係越影越有，正呀～

放下心頭大石

2011-11-23T23:01:00.002+08:00

超開心宣佈。。。兩隻B都有人收養啦：）

上週嘅一篇blog四隻B四個故事出街後，有熱心人send mail話有興趣，聯絡後了解過兼星期六做埋家訪，佢有一隻17歲貓貓，非常愛貓。。。貓B有主人認頭啦：）

星期六，帶同新主人去貓B居住嘅地方，一方面希望佢見下真身，睇下邊隻合眼緣，另一方面諗住睇啱即捉啦

佢嘅決定係兩隻都要，我好開心呀，但原來貓B而家靈活左好多，我失哂手，一隻都捉唔到。。。

我星期一，二都專登去練習試捉，都失敗；決定用貓籠去捉；

星期三，約埋朋友幫手，帶住兩個無自動關門嘅貓籠，最初完全失敗；結果兩隻連環入籠，攪掂

無車搭，一人一籠行番屋企，手斷。。。

番到嚟，拎開D報紙影下相啦，咪睇呢隻一號得得意意，fea我之餘仲大力"dup"地㖭呀，人不可貌相呀

三號驚到無反應

新主人（C小姐）放工上嚟我屋企，將佢地從籠中捉出嚟放入貓袋，三號非常輕易，一號頑強抵抗，終於佢地跟左新主人番屋企啦

寫呢篇嘅時候，C小姐通知我兩隻都係女女，佢知我緊張，為兩隻B開左個新blog，我地日後可透過blog去睇貓B嘅近況：），多謝C小姐

另外都要多謝朋友R今日出手相助；亦多謝Leo，多謝你嘅愛心；多謝貓義工周姑娘，借籠兼教我捉貓常識，至今未失過手，感激：）

最後都交待其他貓，貓B 4號繼續失踪：（，貓媽睇住我捉佢D女，呢個本來係我擔心位，但佢竟然無反應，仲施施然去食野，真係咁信我？
星期四，輪到捉貓媽去絕育，已約好時間，聽日我要自己一個攪掂，希望一切順利

ps:本來今晚講泥涌，順延啦

泥涌放鳶人。欠公德的人

2011-11-23T00:01:00.000+08:00

星期一晚東張西望做專訪，話泥涌有班放鳶人。。。

受訪者話佢地呢種係一種競賽，其實即係𠝹鳶，每人每日會放近百隻，盡快𠝹斷對方就分勝負。。。又話會盡量唔會污染環境，搵人執番斷左線嘅鳶云云，鏡頭仲專登影住一個人執緊紙鳶㖭～

實情係點呢，睇相。。。真係滿天紙鳶架～

沿路入去已經見到附近D樹掛滿紙鳶，附近仲係私人屋苑同老人院，D老人家仲係坐輪椅

行出石灘影相，地下全係紙鳶線，唔小心真係比佢“click"低，樹上面，電線杆變哂樹掛；破壞環境，至少可以告佢地亂掉垃圾啦，又唔見警察做野喎

放風箏本來係一種有益嘅活動，但無啦啦攪破壞變成𠝹鳶，就變成擾民嘅活動，呢D破壞環境嘅活動我覺得應該禁止呀～

預告：聽日，會介紹泥涌美麗嘅一面

好友共聚﹣鳥羽名古屋料理

2011-11-22T00:01:00.001+08:00

工作繁忙，最佳減壓就係同好友飲食吹水，上星期五揀左呢間。。。鳥羽名古屋料理

佢地嘅名物。。。名古屋羽先唐揚，好食好惹味，但略咸，配啤酒卻一流

我最欣賞係呢樣。。。炸腐皮溫泉蛋

賣相係咪一流呢：）

大部份食物都水準以上，炸蠔無得講，我怕腥，無食；但個炒飯，表面平凡，諗住撥走面果D鰹魚乾可以食，結果一食，原來佢用鰹魚湯嚟炒飯，個胃即時翻左一野，呢樣最衰，衰陰濕～

價錢每人三百幾，但開開心心食一餐，值得：）

飛女豹貓

2011-11-21T00:01:00.001+08:00

十月尾開始，豹媽失踪；

咁啱，失踪前，遇見一個阿伯，猛話佢靚，想叫佢朋友收養，我真係以為佢捉走豹媽去養

失踪兩星期，都見唔到阿伯，無得知道真相，突然。。。

豹媽出現番，仲因為附近油緊欄杆，佢心急見我，個頭撞左去欄杆，染左撮綠毛，用水洗都唔甩

睇下，豹媽幾型

廣告時間﹣沖繩島生姜黑蜜

2011-11-20T00:01:00.002+08:00

呢樽薑蜜係我個客嘅皇牌product，正式登陸萬寧，非常好味又有益，暖胃又驅寒，女士尤其合適，快D去買番枝啦：）

180日

2011-11-19T00:01:00.000+08:00

呢兩張相，10月14日影

我認識嘅阿姐照顧嘅其中兩隻

佢地媽媽懷孕時只係一隻半歲嘅貓B，結果一胎四隻，BB一個月未戒奶時媽媽就已經比義工捉左去絕育，好彩佢地都識食貓糧，漸漸長大

四隻都金色，其中兩隻比有心人收養左；呢兩隻就住喺垃圾站；

10月14日，我經過，咁啱見到呢個畫面，即影；我好鍾意呢張相：）

原來義工阿姐15日就捉左後面果隻去絕育，前面果隻捉唔到；佢隔一日番嚟，繼續同佢媽媽哥哥生活。。。

但11月16日收到消息，佢比附近D狗咬死左，只係得半歲，結束佢短短嘅一生

街貓就係咁，食得一餐得一餐；大家見到佢地，對佢地好D啦：（

小便宜﹣11月號

2011-11-18T00:01:00.003+08:00

呢個月，中得好少獎咋。。。
真正中嘅得呢份﹣果jam三樽加薄荷茶包，薄荷茶，我like

今個月生日，citysuper送嘅。。。又係果jam？呢個月我食麵包啦咁

星期四飯局，大頭送嚟桃哈多一包，多謝大頭

意粉送上貓糧比達仔，好野，達仔都有份～

姐夫跑步，跑到去大阪，返嚟，我又有手信啦；跟住呢“堆”都係家姐送嘅
我至愛嘅日本綠茶

型仔袋

知我怕凍，呢張係可以著住嚟做野嘅被

呢個唔係杯，佢係一個人iphone喇叭

四隻B四個故事

2011-11-17T00:01:00.003+08:00

有朋友肯收養二號，而貓B10月尾開始識落地食野，11月我每次去餵佢地時都專登嘗試抱起二號當練習，原來貓碗位置都好緊要，目的要令佢背住我。。。

11月4日星期五
我依舊去探佢地，見到二號依舊好痴阿媽，影左呢張食奶相；心情矛盾，一面驚貓媽會好難過，但最後都係決定狠下心腸令二號女幸福，救得一隻得一隻

二號真係好靚女架

11月7日，約好今日6:00pm後交二號比貓主人，我4:00pm落去，一餵野食，二號就仆出嚟食，機不可失，即抱佢入籠，用報紙冚籠時見佢驚到腳震，我都覺心酸呀

先帶佢番我屋企，佢好乖無嘈，但明顯好驚囉，達仔埋去睇佢時，佢"fea“達仔㖭呀；喂，你地應該識架喎～

貓主嚟啦，佢帶同一個讀過獸醫做過寵物店嘅女子嚟，一抱佢出嚟係咁fea，但經女子兩下手勢，佢即刻乖哂
佢檢查完話二號好健康，証實係女；貓主話佢好靚女，好鍾意呀
睇見新主人抱住佢又咁鍾意佢，我好開心呀～

二號女，以後要乖啦，聽主人話，要幸福呀

11月16日，問貓主佢近況，話二號同佢屋企另一隻貓仲係唔friend，大家各有各，比D時間啦，問佢攞相，佢比呢兩張，好大師嘅作品呀，樣都睇唔到呀～

講下1號，覺得佢最靚但結果無人要，唯有喺度陪阿媽啦

三號呢，越大個樣越靚，仲有條波波尾，可惜都係無人要，又係陪阿媽啦

四號呢。。。。

最唔怕人，最大胆，但失蹤左五日啦，我都有D打定輸數，希望係有心人抱左去養啦

ps:長氣D寫埋呢次啦，有人有意收養一號同三號請聯絡我；我驚今年冬天太凍。。。

河馬精彩表演賀台慶

2011-11-16T00:01:00.000+08:00

上網睇到，好正呀：）

（精彩片段17秒開始）

萬凰之王

2011-11-15T00:01:00.006+08:00

頭幾集都仲算幾好睇，但就好似將以前金枝慾孽＋宮心計翻炒撈亂咁，基本上估到哂D劇情

第二星期開始就越嚟越犯駁，巧合過巧合；

不過最“銀”耳都係胡杏兒嗌宣萱做妹妹，真係打哂冷震

不如拍套快獸版啦，應該會好睇D

連達仔都悶到瞓左呀

大帽山攪野公園

2011-11-14T00:01:00.000+08:00

星期日，行上大帽山；由大帽山郊野公園出發，沿車路一路向上。。。

三年前嚟過都覺得無特別，今日諗住天氣好D會有野影，點知行就行餐死，相就無影到幾張，又多車喎，上到去人多又變得好嘈，連影相嘅心情都無埋

點解話係“大帽山攪野公園”？睇相，有料架，太嘔心，張相經特別處理

工作後的一人盛宴

2011-11-13T00:01:00.001+08:00

今日，跟一個樂壇女新人嘅唱片拍攝工作，我今次做美指；其中一個主題比較特別，主題係溜冰，但背景想係urban feel，結果幫佢搵景，搵到一個停車場扮溜冰場，效果滿意。。。

前幾日天陰又落雨，攝影師到女新人都擔心，我就好有信心會好天，結果今日又得左，不枉我係太陽之子呀，yeah~

為左呢個job,辛勞左幾日，完成時想搵D好野食獎勵自己，食乜好呢？最想食乜呢？結果想掃街，但西環無街掃，去左”可可店“食碗仔翅同魚蛋；我真係易滿足架jet

新興食家

2011-11-12T00:01:00.000+08:00

話咁快就搬左嚟西環兩年，當初曾經影低一D舊店舖照片，近半年執下一間，執下又一間。。。

諗起仲未食過食評大讚厚和街嘅新興食家，因為實在太多人，好難搵位；終於有日朋友下晝嚟搵我時行過見到有位，即坐低幫趁。。。

食左五樣野，水準之上，但我又覺得無食評講得咁跨張，招牌貨蝦餃我有個客講到好味到專登過海過嚟食，我覺得同權發差唔多咋喎，另外叫左排骨，但好蠢咁又叫埋排骨飯，有飯好食D，因為排骨都幾肥呀～其他一般以上啦

但真係唔好坐囉（你覺得係風味就另計），我都係鍾意權發多D

今日。。。

2011-11-11T00:01:00.001+08:00

今日由早忙到晚，忙乜呢？

一早做稿啦，做完見客啦，跟住上左一間做雜誌嘅公司，做乜？舊年咪參加左一個攝影比賽得季軍嘅，前排佢地打嚟問可唔可以用我D相印做膠folder，非牟利嘅，我話可以，但點解唔用冠亞軍果D呢？佢話覺得我D靚D喎，呵呵呵～

所以今日就上去攞啦，但印出嚟效果一般咋；咁梗係遞埋咭片啦，博有合作機會吖呀，但一開銀包，我張提款咭呢？唔見左呀

冷靜地say goodbye，跟住即去滙豐，好彩無唔見錢，安樂哂；我好少會咁囉，一定係噚日襟完錢無攞咭囉；呢排真係忙到亂哂籠啦！

番屋企，接住要出去睇location，星期六影model用，拎件假皮褸著下，點解地下咁多黑點嘅，原來爛成咁喎，09年代h&m買，雖然過左兩年，但唔係爛成咁呀，我噚日仲無睇著住落街食飯，實比人笑死啦，��呀～

熱檸水走水

2011-11-10T00:01:00.002+08:00

曾經寫過，話而家D食客去快餐店如大家樂等多多要求。。。

以前真係水都無杯，唔知幾時開始，你問佢佢會有杯水比你。。。

咁有人要熱水，話開奶喎；有人嫌水凍要暖水；又有人要凍水比舊冰吖唔該；原來可以要茶架你又知唔知？

前排朋友去食大家樂，前面阿叔買外賣，佢話：熱檸水走水；走甜走奶就聽得多，走水就真係有創意喎；

解釋﹣。。。佢唔想飲野，但怕蝕底，攞幾片檸檬攞隻杯都好

解釋二。。。佢番去自己加水，唔使浸住D檸檬，驚浸得耐有陣澀味

解釋三。。。拎杯水都嫌重

解釋四。。。屋企有類似鑽石健康水之類嘅濾水器，一定要飲屋企D水，出面D水。。。唔飲

做服務性項業真係好攰，對住咁多奇怪要求個腦轉慢D都實比人鬧，加埋D客越嚟越大枝野，堅係超辛苦呀～

我家的女僕

2011-11-09T00:01:00.003+08:00

星期二，帶達仔覆診。。。

首先睇條腸啦，醫生話佢條腸出奇意料地康復得好好，腸入面已經無乾涸嘅宿便，帶去比醫生檢查嘅大便亦正常；體重亦上升至4.1kg，醫生話可以開始減醫生糧（好呀，醫生糧好貴呀），減食糧免太肥（好呀，食少D慳番D呀），理想體重係4.5kg。

從牙仔去估，達仔應該4-5歲，唔算係老貓。。。

醫好條腸，就醫隻耳啦（係呀，佢真係病貓嚟架）；做街貓時已發覺佢隻耳發炎，流血水，當時我用消毒藥水幫佢清潔；到上次睇醫生時，醫生話佢有粒肉瘤，唔影響生命，醫條腸先；但每日佢都抓損個傷口發炎，兼每日都有血滴落地，今日再去醫埋佢。。。

醫生一路用棉花棒清潔，一路解釋（好勁囉，到我幫佢清實比佢走左去）暫時可以做嘅係唔好比佢再抓損，所以佢要戴上大喇叭啦，只要唔再損，個瘤再慢慢處理，因為佢唔贊成做手術，只要個瘤唔再增大，可以暫時不理

醫生話：呢兩星期，你要扮太空貓啦
我話：似女僕多D喎（哎呀，比人知我係宅男㖭）

一番到屋企，開籠，達仔驚啦，想標入梳化底，點知帶左大喇叭，捐唔入，我抱佢番貓屋等佢定番心情先啦，個樣好可憐喔～

但係醫好隻耳，就唔使做病貓啦～

日落大道﹣尖沙咀港威道停車場

2011-11-08T00:01:00.002+08:00

噚日講到，文化中心睇完芭蕾舞，出嚟近黃昏，個天靚爆，行去海旁影下相。。。

行下行下，走到嚟港威道嘅停車場

嚟到時天仲好藍，個停車場好似碼頭咁隊左出個海度，所以個景無遮擋架;右邊係西九，左邊係港島，中間對正個大海峽～

近岸有薄霧

改下白平衡就變成咁

有幾可見到香港個天咁遼闊，仲有熱氣球㖭

人唔算多，只有四五個攝影友

有個小燈塔，拎佢做主體影左一輯相

地下有個去水嘅坑渠洞，趴低影出去，原來可以咁靚架

點去港威道停車場。。。海港城馬可孛羅酒店行出去就到

星期六＊好節目

2011-11-07T00:01:00.005+08:00

有朋友抽到芭蕾舞飛又唔得閒去，結果益左我。。。

2:30pm場，先去文化中心隔離嘅muse醫肚，午餐係半自助餐，即係你揀個主菜，出面餐枱有麵包沙律餐湯生果甜品糖水飲品任食任飲果隻

$7x-$9X一個，結果，樣樣都唔差喎，埋單兩個人$160，超抵～

期間有兩個笑話。。。

1/入餐廳時，帶位小姐由門口無乜人坐，帶到中間個廳（唔多人），再行入大廳，大廳的確開揚，好靚，但人多又嘈，佢慢慢帶到一張雙人枱時，隔離係10個少女，正係成個廳噪音嘅源頭，其中一個正口笑到“mark"大個口，見到佢有爛牙；我用口型同朋友講話好嘈喎，帶位小姐非常醒目，即刻話；不如坐出面D位吖，服務態度一流呀：）

2/但噪音呢樣野呢，一個師奶都KO你；食到一半時，隔離肥師奶同阿婆已經食完，肥師奶開始發功，佢好權威話：咪就係砍划樹木囉，破壞環境，曼谷先至水浸呀。。。。佢地靠旅遊，而家死哂啦，益哂新加坡啦，益哂新加坡啦（跳線喎，我已經笑左一野），益哂星馬泰啦（下？益番泰國？）我忍唔到，真係笑出聲呀

芭蕾舞係“此時此刻”，開場前10分鐘都係得咁多人咋（第一張相），死未，我呢D就送飛啦，我後面有約廿個老人家都係免費飛，我諗舞者見到台下得咁少人真係好無奈。

完場，天氣靚到不得了，決定去海港城海旁繼續影

行到去停車場，個天靚爆，影左一粒鐘，靚相聽日繼續。。。

安樂蝸

2011-11-06T00:01:00.000+08:00

夜晚天氣轉涼，驚達仔冷親，行下寵物店買張貓床；知道貓鍾意捐窿，想搵個有蓋嘅；其中一間有張個形幾好，但個花好師奶呀，仲要$260㖭～

上網睇，見到有張啱心水，黑灰豹紋架，仲只需$88，點知打去又無貨：（

西環勝在多寵物店，落街再搵，終於見到呢張迷彩嘅，＄88，手工就差D，個係我相信達仔會鍾意囉～
一放底，佢自動波入去瞓，真係好鬼醒架啫～

你睇佢幾舒服，真開心

少女的離譜／阿伯的離譜

2011-11-05T00:01:00.002+08:00

少女的離譜

離開海下，除左的士，唯一交通工具係半小時一班嘅小巴，四名少女排喺我前面，已經等左兩班車都上唔到，佢地排第三四五六位，前前後後都有人等得唔耐煩call的士。。。

其中一個少女（1)話：不如我地都call啦
另一個少女(2)：咁有小巴嚟點算呀？
少女（1)：咁咪搭小巴囉，唔認call左咪得囉。。。。

呢D就係我地嘅下一代啦～

﹣﹣﹣﹣﹣﹣﹣﹣﹣﹣﹣﹣﹣﹣﹣﹣
阿伯的離譜

搭小巴入海下時，明明坐滿16人，最後上多一個阿伯坐喺司機旁地下，原來同司機相識，係同事嚟；
沿路同司機傾傾傾，途經一個碼頭時。。。

坐地阿伯：哇！前果排呢度幾多大魚呀，大大條生魚呀，好易釣又多
司機：係咩？
坐地阿伯：係呀，有班人嚟放生呀，作福呀；班魚餓過乜，唔識釣嘅都釣到呀，而家無哂啦

咪就係人地作福，你就作孽囉；呢D就係我地嘅上一代，唉～

海下遊﹣純影集

2011-11-04T00:01:00.001+08:00

話海下無野影，都可以出篇純影集喎

當風箏遇上風

一閃一閃小星星

紅葉落索的時候

斜陽無限，無奈只一息間燦爛

現已冬寒早已落葉

斜陽別讓我分心，好嗎

每晚夢裡亦會經，曾倚偎的街角

完

海下遊﹣蜢與牛

2011-11-03T00:01:00.002+08:00

上集講過，海下去灣仔沿路無乜野影，出現次數最多係呢兩位。。。

一。蜢
營地附近，細心D睇，成條路都係，既然係咁，專心影好佢啦～

唔大隻唔影，呢隻足手掌大，靜靜同佢影寫真

呢隻呢，企正背光擺哂舖屎，無理由唔影囉

好少高炒影草蜢，嚟一野

淫蟲系列又多一張啦：）

二。牛

通處都係牛，佢地掛住食，可以慢慢影

住喺度，環境真優美架，草地又大，實有野食先啦；睇下下面呢隻牛，個肚咁大，有左BB？有BB嘅牛好惡，唔好攪佢。。。
但行近睇，公嚟架，佢係食到有大肚腩咋
兩旁種哂相思樹，如果兩旁開哂花咪好靚，春天係咪要再嚟呢？

呢兩張想講，原來牛鍾意玩踩背架，隻細嘅負責踩隻大嘅，有相為証架：）

牛多自然有牛屎，呢舊無論形態色澤大小都係上品，小心唔好踩到破壞佢，留比其他人欣賞

海下遊

2011-11-02T00:01:00.001+08:00

星期六，今次揀左去海下；

西貢出發，搭7號小巴（半小時一班），搭到總站就係啦

因為事前無搜集資料，去到亂咁行，見可以行去“灣仔”，咁就去灣仔啦；沿路會見到圖中呢座“海下灣海洋生物中心”,但鎖左，參觀係要預約嘅～

有名勝睇呀，呢個係過百年嘅石灰窰，雖然我諗大家想睇綾瀨瑤多D

半小時嘅路程竟然。。。無野睇。右面係山，只可以影下野花，右面係海，但沿路都有樹屏封咁遮哂成個景；
終於行到灣仔，灣仔竟然係。。。。營地？好多人呀，五十個營都有呀，全部親子樂咁呀，街市咁呀

營地有大草地，好多牛呀，影左一陣牛，走人（想睇牛，聽日啦）

師奶搭遮行山團已經係潮流嚟架啦，每星期都見到；如果發明一把唔使擔又高貴大方美麗嘅遮，係咪一條財路呢？

見路牌指住去碼頭，行去睇，原來碼頭旁又係營地，又係好多人喎；繼續鬧仔嘅鬧仔，瘟仔嘅瘟仔

行回頭路出番去，行近海下起點時，見到海面圍哂波，圍住嘅係受保護嘅珊瑚喎

行落沙灘行下，相信係我去過最“大”嘅沙灘呀

之後惡夢嚟啦，半小時一班小巴，前面有廿幾人，終於餵蚊餵左一粒鐘

仲有，海下大部份位置都收唔到電話，2G都無，call的請到士多或電話亭

你的名字我的姓氏

2011-11-01T00:01:00.000+08:00

最後決定，以後佢叫達仔；跟我姓，全名柯達

達仔鍾意坐梳化或者窗旁，所以廳嘅窗已經裝左格仔網，就算開左窗，達仔都安全啦

每日佢嘅happy hour就係我睇電視時間，一邊睇一邊幫佢按摩，R肚腩；達仔，你睇你幾樣衰～
見唔見佢個腩呀？好大呀，可能做過街貓，一見野就食哂，食唔夠就問你再攞，攪到有肚腩啦～
食得多自然屙得多，早兩日揭開貓廁，竟然有條長達七寸嘅屎，同人有得揮囉！

達仔以後會經常喺呢個blog出現（日日寫邊有咁多野寫吖，梗係搵佢攝下位啦，呵呵），希望大家喜歡達仔啦：）

萬聖節精選﹣湯寶珍新動向

2011-10-31T00:01:00.001+08:00

自從“紅葉瀛風”之後，chok聲珍消失左喎，好失落呀，究竟去左邊呢？

上星期去馬鞍山，終於見到你啦～可惜我唔係呢區吖，無得投你一票呀！

咦！佢真係好鍾意紅色喎～

萬聖節精選﹣魔鬼山有個巴士站

2011-10-30T00:01:00.000+08:00

早前再戰魔鬼山，沿另一邊路上，行左40分鐘，差唔多到頂之際，見到。。。

沿途行山徑，點解會有個巴士站嘅？真係好驚囉～起嚟遮陰嘅？但又凳都唔比張喎

個頂有哂logo架，仲有個巴士號碼牌㖭，唔通係夜晚先接載往返兩地嘅“直通”巴士？

萬聖節精選﹣馬鞍山有兩個disco ball

2011-10-29T00:01:00.000+08:00

上星期，行上馬鞍山郊野公園，原來個公園喺山腰，條路又長又斜。。。

行行下，山旁竟然有兩個大波波，呢兩個咪係disco 閃閃波嚟，點解會放喺山呢？唔通呢樹開過party？
呢個近村口，隔離係巴士站。。。

呢個喺草叢，日曬雨淋都無人理

直徑近四尺架，其實掛佢喺戶外搵燈射下佢咪好型，戶外的士高呀

預告：臨近萬聖節，遇到怪事一單怪過一單。。。

慳D啦。。。baby

2011-10-28T00:01:00.001+08:00

強烈推介Kiehl's個app,兩個星期就送一次贈品，需然要去佢門市攞，但佢多多分行，登記個電話就攞到；呢排有無人覺得我滑溜左呢？

唔止得咁少，有D用左咋～

繼續6:30pm行惠康，今次執到一包船襪，拎上手睇下，哇！$9.9有三對呀，每對著兩三次跟手旅行掉埋都抵啦下話～

滴露沐浴露，平極藥房都要$27一樽（650ml),呢包補充裝（550ml)都係藥房買，全英文，馬來西亞公司但大陸做，你估幾錢？

$12咋，你話個樽幾貴吖，入番落舊樽就用得，較環保又慳錢，一舉兩得呀真係

你地有乜慳錢招，分享下好喎～

車禍現場。。。

2011-10-27T00:10:00.001+08:00

一早要開工，8:45AM搭巴士,行左兩個街口，仲見到電車站好多人爭住上車，有個師奶又上又唔上又想搭巴士標過馬路，個心仲諗緊咁樣真係遲早車親呀。。。

再行半個街口，巴士準備埋站，我見有架電車停響度，無人架喎，有個男人面向天半個身瞓左入車底，我仲估佢整車呀，巴士慢慢行正佢面前，見佢暈左，個頭流左兩行血，塊面污糟哂，隔離個女司機個樣好焦急咁，我先知佢撞車呀

奇怪係，電車上無哂人，但無人幫手或圍觀；而佢瞓果個位，即係比車轆過呀？好驚呀；隔左一陣，警察就到啦

而巴士亦離站啦，啱啱上車嘅兩個男人見到撞車，走左去樓上車尾，跟住打比人，對答如下。。。

男：巴士站撞車喎，你見唔見到呀？邊個嚟架？下？阿德嚟架，死囉，梗係追車啦，佢有無事呀？。。。慘囉慘囉（但佢地無諗住落車幫手喎）

收線後佢打番公司。。。

男：喂，門口撞車呀，阿德比電車撞呀，你出去睇下啦；佢今日梗係番唔到啦，仲番到工咩？（公司只係關心有無人番工咋，人情冷暖）

可能嚇一嚇，今日心不在焉，佢個流血樣直頭印左喺腦入面，清楚到畫番出嚟都得，好彩。。。

歸家後上網search呢單新聞，話佢奇跡受輕傷，都安樂D

工作紀錄﹣影靚女呀今次

2011-10-26T00:01:00.003+08:00

多得隔離台阿fun介紹，第二次正式影人像啦；今次係國際小姐澳門代表winnie sin,個性活潑又上鏡，呢次合作非常順利

其中呢張大家幾滿意之餘，直頭出埋雜誌稿啦；係我第一張有錢收嘅人像相，yeah~

另外呢張我都幾鍾意：）

見佢勤力又有潛質，拉埋我攝影師朋友同佢公司嘅化粧師落水，再影一輯；大師出馬兼winnie減肥後狀態大勇，效果再好D

幫佢砌左張咭派比大會有關人士，出嚟效果滿意：）

嚟緊都傾緊D影相job，希望成事，做多瓣，好貪心：）

最後，麻煩大家，Winnie正在成都參選國際小姐，投票正式開始，澳門小姐暫時排第四，方便嘅過去幫手投幾野，每一分鐘已可投一次，得閒就投幾野啦，thanks:)

緣

2011-10-25T00:01:00.007+08:00

咁多人關心黑仔，先送上佢“幫趁”新貓廁嘅靚相一張，都真係叻喎，唔使教，識自己入去攪掂，聰明

好，繼續講”黑仔“；有D位好奇怪，我記得當佢睇完第一次醫生之後疑似又出事時，我同佢講：喂，我無錢成日帶你睇醫生架，你亂食野你死梗，你想唔想跟我番屋企吖。。。呢一刻，佢竟然咬我，雖然無損，但都痛果隻囉，佢從來無咬過我，我理解為佢唔想跟我番屋企囉；但宜家諗番，可能其實佢係答“好”囉

又，再玄D嘅一個緣；呢本係我09年嘅隨身記事簿，點解會買呢本野，係因為我有個舊同事兼好友叫“noro”，呢隻貓又叫noro，所以諗住送比佢，結果約到4月都見唔到佢，於是自己用左；睇下封面隻貓，仲唔係黑仔，緣份早種呀；

既然養得佢，聽過幾個朋友意見，唔好黑仔黑仔咁叫喎，改個名啦，英文就叫noro啦：）

中文又如何呢？

家姐話唔想黑黑聲就叫相反喎：”白白“
又因為佢已經識聽黑仔呢個名，想改個差唔多嘅，朋友建議：”小黑“
佢成隻豹咁，我又想改做：“豹仔”
佢曬到咁黑，不如叫：“古仔”啦
又因為佢成日屙，佢一屙完我嗌佢：“屎男“，佢識望住我喎
嚟我屋企頭幾日成日放屁，我又嗌佢：“屁男”
如果用英文noro諧音，咁可以叫：”裸露“喎
餵貓阿姐幫街貓改名係攞隻貓D特徵，例如隻貓捲埋條尾就叫捲尾，條尾郁就叫郁尾。。。咁黑仔條腸塞係咪應該叫：“塞腸”呢？
而餵貓阿姐以前一向嗌佢：“烏卒卒”

你地話呢？比D意見啦：）

黑仔近況﹣3-以後跟我啦

2011-10-24T00:01:00.006+08:00

接上集，第二朝起身，除左因為個貓廁係一個無蓋櫃桶，佢屙完挖砂撥左D出嚟外，一切安然無恙；不過真係屙好多，臭囉～

又驚佢抓我張梳化，我同佢講，你抓就抓塊貓板，唔好抓我張梳化呀，佢又好似識聽咁喎，佢而家成日都抓塊貓板

我雖然喺屋企做野，但有時都會出去開通頂或者出去玩，咁啱有一日真係要離開24小時，放多左糧同水，比佢自己喺廳活動，第二日番嚟都無事，好乖仔

本來真係無諗住養佢，因為佢同其他貓好friend，但佢又乖又聰明識聽人講野，兼非常痴我，真係唔忍心放番佢出去，驚佢亂食野實短幾年命；
佢鍾意睇電視，當然同我一樣睇無線啦，睇亞線我一早掉番佢出去啦；睇電視時佢鍾意挨住我，隻手仔仲要搭埋上嚟㖭

就算唔挨住，條尾都要搭住我隻手囉

雖然一個人住，但都同屋企人商量交帶一聲。。。黑仔，我決定收養你，以後跟我啦：）

全家福祿壽...住劏房

2011-10-23T00:01:00.004+08:00

先講電視果套，荃家福祿壽探案。。。垃圾，真係好垃圾；由扮鬼扮馬喺台慶表演爆左出嚟，到有自己嘅節目，繼續大受歡迎，拍第二輯，拍電影，去埋紅館，一路都過關，今次電視劇，真係慘不忍睹喎，硬滑稽成咁，點笑得出呀，相信呢套電視劇可為福祿壽嘅人氣劃上句號啦：（

再睇下以下呢個全家福祿壽，上星期一場接一場大雨，行經垃圾站兼地鐵地盆門口，見到福祿壽迫喺一個膠盒度，福祿壽都要住劏房，你話係咪慘先，仲要浸哂水㖭，相信果日嘅雨量有四寸呀；堂堂福祿壽比人攪成咁，我拎番佢出嚟排排企面對住條街，而家好威武

黑仔近況﹣2-寄人籬下

2011-10-22T00:01:00.009+08:00

10月10日，問義工阿姐借左個貓籠，抱左黑仔入去再去睇醫生；醫生話佢條腸又塞過，不過未去到上次嚴重，要留院觀察兼同佢通便；同時向我建議養佢兩星期，等佢食足藥，食高纖貓糧，同杜絕佢食沙草等雜食。。。

OKOK，第二日，接佢出院，再借個大籠困佢喺我屋企過夜，識喺有貓砂的盒大便，但。。。。好好好臭，果然係宿便

第二日，關哂窗，試下放佢出嚟行下；咦，無發癲識返貓砂盒大便乖乖坐喺梳化喎，好乖；放塊貓抓板喺地下，佢又識抓板唔抓梳化喎。。。

夜晚再困佢入籠，第三日買左張地毯鋪梳化，佢即刻上去坐，好似覇定位咁喎；但同時間，可能食左藥，佢一日屙好多兼繼續勁臭，唉～仲有時因C太稀，個patpat吊住D，我要幫佢“敏”呀陰公，陰公果個係我：（

第三晚佢唔肯入番籠，比個測驗佢，關哂所有門，比個廳佢活動，睇佢有無作反，我就關門瞓，第二朝個廳會變成點呢？

比你地估。。未完

500両金嘅小熊維尼

2011-10-21T00:01:00.000+08:00

連續三日金舖開工，今日第一日，攰到呢！

見到呢隻放喺K11嘅展品，人咁高架，好可愛呀，但真金嚟架，好貴呀，500両金架，樓都買到層啦，會唔會真係有人買呢？

買左可以擺喺邊呢？睡房？

naruto

犯駁

賀年廣告

暖流版

初二

初一

新年啦

團年

兔年最後一擊

剪髮前的準備。

收爐 狂擦一餐

輕鬆小品

X記糖水舖

soyjoy

廢人廢語

決定去旅行

麥當勞之所見所聞

咁多人，可以影乜呀？

郊野公園之淪陷

四台（唔）頒音樂大獎

休息

本週廢相

噚日答案

回收舊雜誌

茶果嶺尋寶﹣下

茶果嶺尋寶﹣上

2012第一個黃昏

1月1日

新年快樂

2011第369篇

哇！好勁呀

本週廢相

2011鳴門大事回顧

麥當勞聽到的笑話

香港有座比薩斜塔

身在何方？

聖誕咭

東涌的藝術

肥係罪嚟架

又見貓B

茶果嶺﹣亂行

今日影嘅相

香港有個復活節島

去石澳，遊人會做乜呢？

香港有個海角七號

舊記憶

68%

個腦記乜架呢？

加菲的淪落

月蝕

貓B（家姐）舊相

今日廢廢地之硬漢子

香港有個六本木山

貓B近況

為junk food增值

心甜推介

廢人廢語

我要吃貓壽司

避風塘的貓頭鷹

12月banner製作特輯

都幾廢話架喎

香港有條英倫大橋

銅鑼灣廣告

$6000

達仔明天做手術

泥涌﹣斷橋石灘

放下心頭大石

泥涌放鳶人。欠公德的人

好友共聚﹣鳥羽名古屋料理

飛女豹貓

廣告時間﹣沖繩島生姜黑蜜

180日

小便宜﹣11月號

四隻B四個故事

河馬精彩表演賀台慶

萬凰之王

大帽山攪野公園

工作後的一人盛宴

新興食家

今日。。。

收爐狂擦一餐