Sunday, March 31, 2013

增髮的位置

增髮的位置。。。錯左位喎

Saturday, March 30, 2013

賽思婷

睇片啦,人又靚歌又正,今年金草莓大熱

Friday, March 29, 2013

撞衫

咦!佢地撞衫喎








Thursday, March 28, 2013

貓國旅行﹣美麗芳鄰

大家準備好出發未?貓國旅行又嚟啦~

 呢堆全部係我鄰居嚟架

 呢隻係貨倉貓,賣烏冬架
 

呢隻住後巷嘅,好似達仔架,但係女嚟喎;佢想帶你去睇樓呀。。。睇樓揀啱貓,唔使講緣份
 

呢隻係舖頭貓,通街走,好多街坊同佢玩架;我幫佢改左名,佢叫小貓女;佢話想飲香檳喎

 你就有香檳飲,豹媽就。。。點飲呀
 

豹媽係一個好model,佢有好多靚相架  

呢隻係雪球媽,我捉去絕育嘅,總算有D緣,成日會去探佢  

呢隻係佢個女,雪球,越大越多色,無細個咁白,靚樣但總似唔開心;但好難怪,佢當時差D可以入屋架
 

都係雪球,佢係達仔以外唯一喺我屋企過夜嘅貓,梗係落多兩錢力幫佢影靚相啦 

呢隻似精神失常嘅,又係住後巷嘅,果條街D貓個樣無隻善良架

 睇下,佢隔離果隻,又係惡樣  

呢隻見親我都係怒啤  

大家有無留意你地周圍有無貓呢?鄰居嚟架,多D包容啦:)

Wednesday, March 27, 2013

師奶錢唔易賺

今日去石塘咀搵野食,揀左餃子麵。。。

一個師奶坐低睇餐牌,跟住問:擔擔麵有無餃子架?
女侍應:擔擔麵無餃子,餃子擔擔麵先有餃子
一個師奶:無架?
女侍應:你叫餃子擔擔麵咪有囉,煎定灼呀?
一個師奶:咁煎啦 (餐牌其實好清楚啦,擔擔麵下面就係餃子擔擔麵啦,不過唔同價囉;
 ﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣

另一個師奶仲勁。。。 
佢坐低問:你地有下午茶架呵?
女侍應:有,餐蛋麵果D啦(又係餐牌寫哂架)
另一個師奶:冇餃子果D架?
女侍應走埋去指比你睇:餃子有,上湯餃子麵,送埋菊花茶
另一個師奶:乜野餃嚟架?
女侍應:菜肉餃,有白菜,韮菜,芹菜
另一個師奶:有麵架?我剩係想食餃喎
女侍應指住餐牌另一個位:咁叫剩餃啦
另一個師奶:呢個都係餐嚟架?
女侍應:呢個飲野加$5
另一個師奶:咁我都係要上湯餃子麵,試下佢
女侍應:菊花茶要凍定熱?
另一個師奶:有無豆漿架?
女侍應:無,只有菊花茶
另一個師奶:咁熱啦 

落左單,女侍應拎單入左廚房。。。
另一個師奶(大聲問):乜野湯底嚟架?
女侍應從廚房嗌出嚟:豬骨
另一個師奶:酸辣,都好
第二個女侍應本來食緊飯都搭咀:係豬骨呀,唔係酸辣呀
另一個師奶:豬骨咋?咁佢果碗(即係我)係乜嚟架?
女侍應:果碗係酸辣湯麵
另一個師奶:咁果碗呢?
女侍應:果碗係擔擔麵
另一個師奶:可唔可以加炸菜肉絲架?
女侍應:可以,加$5
另一個師奶:要加錢架?
女侍應:你加唔加? 另一個師奶:梗係唔加啦,加$5我不如叫果D 

碗麵上啦。。。
另一個師奶:有無醋呀?(成大枝喺枱囉,盲炳)
女侍應:枱面大果枝呀
另一個師奶:有無紅醋呀?(枱面枝係黑醋)
女侍應:無呀
另一個師奶:有無辣醬呀?(成樽係枱面囉,盲炳)
女侍應:枱面呀
另一個師奶筆“緊辣醬嘅時候:比多隻匙我吖,載住D辣醬
另一個師奶繼續:有無豆板醬呀?
女侍應:有,比隻碗載埋比你啦 

﹣﹣﹣﹣﹣﹣﹣﹣﹣﹣﹣﹣﹣﹣﹣﹣
攪咁耐,都只係收到$28咋,口水都蝕乾呀

Tuesday, March 26, 2013

個價真係棧咩?

次次經過都塞滿強國遊客,印象中呢間野唔算平架喎,買到籃都拎埋出街pack箱拉車仔,買乜呢?

Monday, March 25, 2013

葉上的咸故

今日呢篇真係三級,要家長陪同,呢篇唔打格真係出唔到街呀。。。 

摩星嶺地上見到嘅,點解葉上會有咸故架呢?

Sunday, March 24, 2013

免氏兄弟

免氏兄弟嘅大哥。。。免費 

”買一送一“頂龍叫做半價,“免費”就係欺詐
 

免氏兄弟嘅細哥。。。免傭

我諗租房無工人你用咁解啩

Friday, March 22, 2013

撞車

今日陪阿媽物理治療,離䦕老家後。。。

在高街等遇馬路,突然bomb一聲。。。

一望,畫面係一個女人半空至跌落地一刻,加上好多細件飛散出嚟,女人落地位距離撞倒佢嘅客貨車足有十尺以上。。。

嚇到我大嗌。。。shit

女人(年約五十幾)爬返起身,司機同我問佢有無事邊度傷幫佢報警之際,佢堅持唔使報警兼無傷喎,但佢條牛我褲都磨穿,司機幫佢執起散哂嘅電話,眼鏡同雜物之餘,加左句:拎住個電話睇都唔睇就標出嚟。。。之後都係堅持報警,但女人已經拎野走人。。。司機最後比左張咭片佢

好難相信會無事囉。。。

"拎"住個電話?。。。掛住講,追劇,定打機呢?我真係好怕d師奶喺同一時間分心咁做幾樣野

西環小店﹣鐵坂

今日陪阿媽覆診,今次係睇皮膚,先知原來今日係阿爸阿媽結婚49週年喎,問佢地今晚想食乜?佢地竟然揀左我樓下嘅“鐵坂  

上星期第一次嚟食,兩老食得好好開心,估唔到重要日子都要揀嚟呢度,上次最正係油甘魚頭,今次呢?。。。 老豆話D海膽超正喎
 

阿媽最愛三文魚,又係超新鮮,連我呢個狗鼻都聞唔到少少腥味  

餃子雜菜窩係我嗌嘅,點解我嗌果D賣相差咁遠嘅,餃子炸嘅。。。但幾好味喎又  

雜菜窩唔錯喎~好明顯見到兩父子口味南轅北轍 

湯麵阿媽嗌嘅,最後咪又係屈我食左大半碗;點解碗麵咁齋?因為。。。  

燒牛肉係另上架  

老豆要搵野送酒,叫多碟天婦羅,炸蝦係我推介  

老豆好似唔知飽咁,再叫多碟鵝肝多士,平時我實阻止食呢D肥兼殘忍野,但今日忍口,費事破壞氣氛;佢食完話太“漏”,呵呵~  

鐵坂地址:西環堅尼地城厚和街47號地下C舖 

西環變得太快,為左支持小店,嚟緊會介紹多D舖頭仔,希望佢地做得住,唔想西環都變埋周大屋

Thursday, March 21, 2013

等運到。。。

雖然農曆新年後係淡季,工作量唔算多,但我都係無心工作;

咁D時間做乜呢?

一星期陪阿媽行公園加物理治療無左兩個下晝;

陪下達仔玩

打以舖candy crush

最上癮嘅係每日都玩抽獎遊戲同玩比賽 

因為贏嘅感覺太爽啦:D

抽獎呢,就唔算好佔時間,FB見到襟個button就攪掂

比賽呢,就要上心好多啦

呢個星期我同自己講,每日只可以玩一個,因為真係用好多時間架,電視都睇少左好多呀 

比賽分好多種,有純攝影比賽,另外有D係交張相配合佢地嘅主題,有D就相加作文,仲有就係純作文,純設計都有;

有D用FB upload相,有D用email,寄信又有,instagram以前唔用,有比賽喎即學即用啦咋咋林

結果一個三月份,去到20號,唔計抽獎都玩左廿個(原來真係咁多架喎,仲有幾個未參加架),全部未公佈結果。。。 廿個,希望點都中一兩個啦:) 不過我都覺期望越大通常都失望居多。。。

你話我係咪等運到呢?

Wednesday, March 20, 2013

乜咁多廟嘅?

接噚日。。。 

去觀音像嘅路口有“實Q”守住唔比入,佢建議我地向右行會影到觀音喎(但佢講野唔清果隻嚟架,跟住仲行埋一邊隨街屙尿㖭呀,但隔離有個臨時廁喎) 

行向右見到呢個牌。。。咦,觀音古廟要再向前行喎原來;有個阿叔突然開聲話:去三宮廟吖,好靚架;

見大把時間,信你
 

經條唔起眼嘅路仔入,呢個景又真係幾靚喎  

最特別嘅係條河入面有錦鯉,樹上有紙寫住係放生嘅,唔好捉佢地喎;

幾條都肥得得,因為條河好多細魚仔呀;我都係第一次天然環境有錦鯉咋~  

沿路無野影,只有螞蟻  

到左廟啦,無乜特別咋喎對我嚟講,呢樹可望到觀音像  

沿路出返去再向前行,好快就到。。。觀音廟,原來此觀音不同彼觀音,而聽嚟拜神嘅的士司機講,呢座廟都係新起嘅,十分鐘腳程三座廟,其中兩座都係觀音廟,做乜呢?  

廟前影下蜜蜂,駕輕就熟啦而家:)
影下木瓜樹剪影,同埋無梳頭嘅癲佬:D  

最後呢張,兩個小生命選擇最後嚟見一見觀音,RIP

Tuesday, March 19, 2013

洞梓“睇”觀音像

星期六,無節目,諗住去汀角行轉影張海天一色相,小巴中途見到觀音像,臨時轉軚”近“距離影觀音啦

1/原來都起得幾近村屋架喎,住响度日日望出窗對住佢,好似有人監視咁呀  

2/附近好多荒廢土地同地盆,係咪第日會高樓包圍觀音架呢?  

3/觀音:喂,隻狗屙完屎要執返呀
 

4/仲未開放,呢度就係最近觀音嘅入口啦  

5/只可以遠眺咋,佢腳下有幾間廟宇喎;點解個觀音要dup低頭架呢? 

6/呢張叫做觀音頭上放紙鳶
 

7/呢個地方係我推介,呢兩日會介紹。。。  

8/見到有路牌指示去觀音廟,點知。。。欲知後事如何,請看下回分解  

點去洞梓。。。大埔墟鐵路站搭20B綠色小巴直達洞梓

Monday, March 18, 2013

2011年的舊相

2011年7月30日的舊相

知唔知係乜嚟架呢?


聽日嘅主題就係佢

Sunday, March 17, 2013

開心舞

阿媽每日勤力拉筋做運動,見到成績啦:)



而家先知原來“好勝”唔認輸係遺傳自阿媽

Saturday, March 16, 2013

郵輪碼頭

郵輪碼頭原來已經接近完工,想近距離睇下外貌,建議搭北角往觀塘嘅小輪,$5一程 開船啦,離遠睇下左邊全貌

近D
 

再近D,隻蛋係乜嚟架呢?雷達?  

睇下正面  

睇埋右邊  

越來越啦,bye bye  

香港個海真係越來越藍喎,沿途風景唔錯,$5抵到爛啦 

Friday, March 15, 2013

扮中產

今晚扮中產,趕唔切寫blog


Related Posts Plugin for WordPress, Blogger...