Friday, November 30, 2012

巴黎戀愛寫真

真係有D運仔架,想睇呢套就抽到呢套嘅優先場,正呀~  

原來我未正式睇過中山美穗嘅戲,好似只係睇過半集嘅沉”悶“的森林,情書都無睇過 

男主角呢,反而睇左好多套喎,我的帥管家,萤之光2,Paradise Kiss,天空の诊疗所,而家仲追緊hungry

 講套戲,中山美穗一出場,第一個感覺係。。。咁殘嘅?

佢出場頭40分鐘都係著住下面呢套衫,但呢套衫真係暴露左佢個腩好大,其實美指同導演係咪應該執執佢呢?

去巴黎拍,當然多靚景,攝影唔錯架,劇情仲專登安排迷路通樹行,影飽佢;

故事推進就好日本果隻feel,慢慢地滲下滲下,到最後感動你一野果種

但我永遠諗無聊野。。。男主角因為劇情幾日旅行都無換衫(底都無得換喎),仲要攬攬錫錫同出去見人,我覺得應該幾臭囉

拍得靚,睇完都想再去巴黎一次,呢套我比70分

Thursday, November 29, 2012

劣質

星期三晚,麥當勞內

呢位女子刨馬經,枱面無任何食物,可能係齋坐或者食完好耐啩

除左鞋,"long"對腳上櫈

大亭廣眾開礦,跟住。。。
 

 剪埋指甲㖭


麥記齋坐除鞋赤腳開礦剪指甲刨馬經。。。人嘅質素點解會低成咁架

又,對面位男士係佢邊位呢?咁惡哽

Wednesday, November 28, 2012

今晚睇戲

休息一天:)

Tuesday, November 27, 2012

跟進。。。意外現場

物理治療師需要清楚知道阿媽屋企環境,廁所及花灑間位置嘅資料,於是約十日前嘅黃昏我返老家影相; 

老家附近我記得有一個議員辦公室,民主黨嘅,決定嘗試睇下可唔可以改善意外位置,幫下街坊都好吖 

入到去,一個職員聽我講完個case,好誠意咁話一定要做野,因為佢都覺得果個位嘅樓梯的確有改善空間,兼因為真係有人送入院,就一定要做野喎,佢即時打比路政置同運輸署,佢話佢會跟進,會將進度通知我 

第二日,佢已經打嚟話議員會跟進,會聯絡路政置,運輸署同pccw一齊到現場一齊做野,但需要D時間

 第四日,佢打嚟話佢搭的士經過見到現場圍起左,知道路政署做緊野,但唔知進度~  

我第二日心急專登去睇,原來佢地換左兩塊新嘅石屎蓋,的確係粗質地D嘅,塊鐵呢,佢聽我講rotate左去另一面,即係相對無咁易踏到果面,唔使直跣落樓梯,但。。。。

佢地將兩塊鐵貼埋一齊,即係跣腳位大左囉;同議員職員講返,佢繼續跟緊。。。

 ﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣ 其實呢,真係已經好多謝佢架,我從未搵過議員幫手,都諗過佢地會完全唔理,雖然暫時效果未滿意,但佢都真係push到人即時做野,我知道唔易嘅,佢亦提議左加扶手同改動樓梯形狀大細; 

而我呢,就搵左上下兩個街口嘅樓梯設計比佢send比有關部門,點解呢兩個會整齊咁多呢? 

最新消息係約好三個部門時想叫埋我到現場,想我參與喎;我同左佢講:我一定到(但時間未定喎)

Monday, November 26, 2012

痛心回憶

上星期去左金鐘香港公園,亂行亂影,見有個高塔就行過去,行經太極園,點解會一個個頭像嘅?


睇埋細字,原來係當年一班醫護人員,為左沙士救人而犧牲自己性命嘅英雄

每個頭像下都會有段簡介,逐個逐個逐段逐段睇,睇到眼濕濕,只可以同佢地講聲多謝




從高塔望落去,都幾靚架~
 

位置圖,有心嘅去講聲多謝啦  

﹣﹣﹣﹣﹣﹣﹣﹣﹣﹣﹣﹣

刺又點止一根吖,好似逐年增加咁,㓤到變刺豬;

911,六四,南亞海嘯,日本地震兼海嘯兼漏核電;

同香港人更接近條剌刺得更深嘅仲有,嘉利大火,菲律賓人質,今年嘅南丫島撞船。。。
希望今年同未來幾年,平平安安平平安安平平安安~

Sunday, November 25, 2012

電車司機與阿姐的對話

電車到堅尼地城總站 

前面位阿姐(望落應該三十幾架咋)嘟咭,發出高音嘅嘟一聲(即係張咭無錢果隻聲),跟住落車

 司機嗌停阿姐,佢問(好慢):嘟唔到呀?

 司機:你張咭無錢呀

 阿姐(好慢):咁即係嘟唔到呀?

 司機:係呀~~~~~~

 ﹣﹣﹣﹣﹣﹣﹣﹣﹣﹣

真聰明~

Saturday, November 24, 2012

民主黨。。。勝

睇下,呢個冬季民建聯又出蛇宴啦。。。 哇哇哇,民主黨竟然出到吳忽忽旅行團喎

Friday, November 23, 2012

講下阿媽。。。

阿媽由10月30日出事到而家已經廿多日

頭五日喺瑪麗,之後一路都入住麥理浩,雖然腳唔掂得地,但都開始左做復康療程

約十日前,拆左石羔,見佢腳眼左右兩邊各有一條六七寸長刀痕,都真係好長嘅傷口呀  
呢個星期,除左每日煮個晏晝麵/湯比佢食之外(點都好食過醫院嘅),仲要開始處理出院後家居嘅安排真係又多又碎,同老豆傾就越傾越亂,真係心都煩哂

今日下晝,終於同物理治療師傾掂浴室扶手,浴室椅(方便沖涼),租借輪椅(聽日有結果),未來幾個月往返醫院與屋企嘅復康小巴(填左form,等消息)等

準備阿媽星期尾或下星期出院;咁就進入下一個階段啦
﹣﹣﹣﹣﹣﹣﹣﹣﹣﹣﹣﹣

其實我都算幾幸運,之前忙到瞓都唔夠,呢個月相對較清閒,可以用多D時間探多阿媽幾次


預告:見到同房D婆婆,幾個都係喺街跌親,點都要做D野;第一次接觸區議員,搵佢幫手睇睇“案發現場”有無可以改善嘅地方,結果係點呢?

Thursday, November 22, 2012

教壞細路

書未讀完,未有耐去社會做事,未識搵錢,就諗定退休?

諗呢個廣告果個同呢間野個負責人真係腦殘,教壞細路


Wednesday, November 21, 2012

今日去攞獎

曾經寫過,攝影比賽中左個大獎呀,早前收到領獎信

今日去左攞獎啦,獎品係。。。登登發櫈。。。百老滙禮卷$2000

朋友:呢個其實唔算係攝影比賽喎
我:收聲,死開

點解豐澤變百老滙呢?佢話豐澤無貨喎;其實仲好啦,我like百老滙多D,自從謝X琪做過豐澤代言人,都無幫趁過啦)



好緊張呀,知道要影張攞獎握手相,噚日去左剪頭髮呀,好野好鬼認真架真係~ 

睇下張得獎相(唔好hur我,我都無諗過會贏) 

總共三個大獎,其餘兩個獎同一人得到,見網上面係咁話佢做馬,假相呀咁,好彩無人鬧我啫,呵呵~  
﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣

提外話,上圖右下角果個“單身基督徒蛋糕制作班”係咩野嚟架呢?

Tuesday, November 20, 2012

元氣卷

開估啦。。。 呢舊係乜壽司呢?  

答案係元氣卷;識我嘅都知啦,我都唔食三文魚嘅,咁塊魚去左邊呢?  

呢件就係雙層魚肉元氣卷啦~

Monday, November 19, 2012

週末隨手拍

天氣轉涼天陰陰,去邊好呢?揀左去金鐘,今日先睇睇隨手亂影嘅一堆相。。。 

硬野。。。唔好諗衰野,我只係想講近年都無收過硬野利是啫
ps:大家認唔認到呢張係乜野poster呢?  

爛熔熔。。。
馬會咁有錢,呢個佢資助嘅中心招牌執執佢啦,爛熔熔,好肉酸呢  

溫室。。。冬天一年凍過一年,原來香港公園入面有個溫室,大家得閒可以入去行下,成身暖哂
喺入面做實Q真係筍工呀~  

瀑布亭。。。呢個亭非常受遊客歡迎,但有無人會跣腳跌落水呢?我等左咁耐都無囉~  

驚驚。。。好紙紮公仔feel;好絕呀,搵佢嚟叫大家唔比食煙,好有效  

還魂草。。。武俠小說咩而家  

觀音座蓮。。。咸濕小說咩而家

呢張相係話比大家知我又去“靚唔靚仔呢?”食壽司啦  

圖中呢舊係乜壽司呢?聽日揭曉~

Sunday, November 18, 2012

畢業啦

苦讀咁多年,終於都畢業啦~  

發夢無咁早啦,我講嘅係呢班大學生呀(硬係要有公仔架喎~)  

“筆”葉就有我份

Saturday, November 17, 2012

買菜的疑惑

媽媽暫時仲係住喺大口環,平日下晝果餐如果我去到我會煮埋帶去。。。 阿媽較喜歡食湯米/麵,其中一朝,我經過樓下附近一檔新開擺喺橫街嘅菜檔,我見D白菜好靚,標價$8斤。。。 買菜師奶:早晨呀,睇下要乜菜啦,樣樣都好靚呀;我地D菜全部都無防腐劑架。。。

我呆左一呆,話:我要一斤


﹣﹣﹣﹣﹣﹣﹣﹣﹣﹣﹣﹣﹣
事很諗,佢想講無農藥吖?定真係無防腐劑但有農藥呢?

又係一個謎呀~


Friday, November 16, 2012

生日飯@帝景酒店

今年生日飯揀奇呢間,點解? 因為雜誌抽獎抽到買一送一,hehe  
早到左,喺佢大堂坐陣,點知,成個大堂塞滿內地遊客,大聲亂撞乜都齊;

最好笑係見其中一個黃色熱褲黑絲襪阿姐,大堂電梯分左右兩邊,各三架,佢喺左邊lift上,兩分鐘後右邊落返嚟,行過對面左邊lift再上,玩乜呢?定係twins嚟架呢?

好驚餐廳係咪都係咁,好彩完全兩班客喎,雖然地方唔大,但大致上叫寧靜嘅 

講得好聽我會話攞野食方便,左面右面,前面條走廊,餐廳門口都擺左食物,唔好聽係地方細到食物要分到唔同角落

 今次我會順序逐張相講食左乜,即係呢篇會好長啦~ 

一出閘即嚟件腐皮壽司,腐皮壽司對我嚟講係十大美食之一,咁點解要一件咁少?因為見佢掐完件魚就真接掂塊腐皮,驚腥呀,好彩無事,好味~  

到沙律,本來好好味,但我又衰多手落左D凱撒沙律醬,個醬陰濕加左鯷魚碎,終於要逐粒碎魚挑返出嚟

前要嘅係豬扒,後面係芝士西蘭花,酸辣雞球,西蘭花炒蝦仁。。。西蘭花同椰菜花好味
 
有沙冰飲,嚟杯芒果先
 
 朱古力慕C。。。呢個好得


炒飯炒麵薑汁芥蘭,茄汁燴雜菜,encore雙菜花。。。炒飯炒麵超難食
 

現場有即煮意粉,朋友叫左呢碟返嚟share,都頗大碟,我食左1/3  

再嚟兩件腐皮壽司,唔該  

每位客人有一件鵝肝,呢世仔第二次食,肥騰騰,呢D貴野都係唔啱我架啦,相信以後都唔會再食,都係腐皮啱我D
 

鵝肝效應,即刻飽左,食返沙律清清佢,再加兩件牛頰肉;芝士最好味

成口肥油,嚟多杯士多啤沙冰  

”蝦近帶時“雪糕,食兩球。。。士多啤芝士餅+朱古力

已經好飽,嚟多杯細細杯嘅唔知乜野

再嚟多一件馬豆糕加三件唔知乜野

飽到上心口,本來想食多球雪糕都無哂位啦,唯有以一杯走甜嘅冰紅茶作結

食物質素唔差架,但環境麻麻兼唔就腳囉~

﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣

後記: 每次見到呢隻屎瀑布朱古力瀑布都好興奮,今次無食,但因為食得太飽,返屋企自製左一個

 

Related Posts Plugin for WordPress, Blogger...