Saturday, June 30, 2012

拉屎藏?

每次睇呢個廣告,唔知點解總諗起佢。。。


Friday, June 29, 2012

有無人幫趁過呢?

街邊檔有乜咁強呢?


唔通係。。。。。


﹣﹣﹣﹣﹣﹣﹣﹣﹣﹣﹣﹣﹣﹣﹣
張相影左成個月都有啦,寫就上星期已經寫好,但比其他blog打占,但早兩日,我見到呢一幕

老闆帶左手套攞食材,將D麵去煮;有客人遞錢比佢,佢話叫佢比隔離個姐姐,我心諗:都幾好喎,要攞食材唔攞錢,衛生喎

轉頭,個客走左,姐姐將收到嘅錢遞比佢,佢照攞,跟住將錢放喺佢隔離個錢"dou"度

跟住有人要麵,佢又繼續攞麵。。。。

點解我咁清楚,我排果個小巴對正呢間舖,無車呀,咪睇哂囉~

Thursday, June 28, 2012

金草莓電視廣告大獎

見無線攪電視廣告大獎,諗起政府呢一堆,邊個可以攞到金草莓大獎呢?

拒收訊息登記冊 - 葉童餐廳下午茶篇
九唔搭八嘅問答模式係政府常見架,係咪出自同一間廣告公司同一個導演架呢?咁廢嘅?
問你糖獎你答拒收訊息,如果現實有人咁對答,你都以為佢癲架啦


強制驗樓及驗窗計劃
人講驗樓佢就答驗身,同上面果個一橋兩賣


切勿僭建
人地話你屋企舒服,你就重申無僭建,而家睇真係爆笑


新界村屋僭建物申報計劃
又一笑爆咀廣告。。。阿女,影低佢申報就可以遲D先至拆,阿伯表情做到好開心,好似中獎咁;現實,有人會自動申報?媽义你就有


難忘時刻
都唔知點形容呢個廣告,成分鐘長,歌已經唔好聽,拍攝手法仲停留喺we are the world年代;
肉肉酸酸,求求其其,唔知拍呢條片又嘥左納稅人幾多錢呢?


你覺得邊條最屎,應該攞金草莓呢?

1/拒收訊息登記冊 - 葉童餐廳下午茶篇
2/強制驗樓及驗窗計劃
3/切勿僭建
4/新界村屋僭建物申報計劃
5/難忘時刻

Wednesday, June 27, 2012

九龍塘行去太子

星期日,由九龍塘開始

喺城市大學見到好多蛙蛙愛天下,手指頭咁大,係咪樹蛙嚟架呢?


行到石硤尾公園,見到風雨蘭,見到你即係有雨落啦


仲見到D得意野。。。螞蟻與蚜蟲


中途見到隻黑貓,有D似以前嘅達仔


哇,個球場唔好再靚D?原來舖假草架喎,臭


阿嬸掃地,真係危險動作,切勿模仿呀


行到去太子,行雀仔街,大咀巴同大家講byebye啦~

Tuesday, June 26, 2012

舊相﹣澳門遊

由細到大去過澳門不下數十次,細過果陣,跟阿爸阿媽過,佢地賭錢,我同家姐就打機,打足一day

大個啦,同班同學過去旅行兼影相

當年嘅我,風都吹得走


舊年,抽獎抽到免費澳門遊,抽到威尼C人酒店加船飛,開心

今年,竟然有續集喎

朋友參加攝影比賽贏左,得到免費入住銀河入面嘅大倉酒店住房連早餐午餐(無船飛喎),今個星期五去,一定要好天呀,有泳池架~

Monday, June 25, 2012

舊招牌

今年夏天嘅週末週日好似比人落降頭咁,差唔多無日係好天架

今日上晝天陰陰,但都出去博下啦,尾站去到石硤尾都係陰天,一散隊番屋企,就好天啦,原來比人落降頭果個係我至啱

南山邨見到D舊店舖,都真係碩果僅存囉,快快用相機紀錄低,相信遲多幾年,佢地會喺香港絕跡








呢個經典到不得了呀



一於繼續刮D舊屋邨影下舊招牌先

Sunday, June 24, 2012

七一回歸特備節目

好突破,又創新,今年除左聽到都厭嘅煙花之外。。。

仲有梁振英拆露台,同埋曾蔭權搬茅台;

邊個收視率高d呢?

Saturday, June 23, 2012

鳴門廚房﹣黑松露炒蛋大肉腸湯麵

咦!窮家仔竟然食黑松露?

因為最近有個客係賣黑松露嘅,為求我有靈感,比左一樽黑松露醬我呀

而包腸仔呢,另外個客要重新幫佢做包裝,比左幾包我參考呀

個麵真金的銀買架,阿信屋買,十幾蚊兩人份



蛋炒好後落一茶匙,再炒幾野,腸仔就咁煎,麵就幾分鐘攪掂


幾咁高尚,扮一晚大爺先

Friday, June 22, 2012

發音要準確


發音唔準,好易變。。。淥柒賓,噢,呢杯野真猥瑣架呢

Thursday, June 21, 2012

女神的煩惱

愛神也有苦惱,咁香港電影金像獎嘅女神會有乜野煩惱呢?


我:日日頭岳岳,仲要遞高手,唔通係肩頸痛?
女神:唔係


我:日日都有靚女同你鬥過,覺得好大壓力?
女神:出兩分力都贏啦,下哇


我:咁係乜呀?咦,做乜你腳貼左膠布呀?
女神:我生雞眼呀


Wednesday, June 20, 2012

樓上舖

呢期幫某金舖跟櫥窗嘅工作,朝朝晨咁早出動,有工開當然係好事,但睇到D野喎

報紙都講啦,銅鑼灣麵包舖都趕走埋,又係變埋金舖;

而家每朝我到達開工目的地我都check得好清楚,因為同一條街幾間都係佢地舖,真係有師傅去錯舖架,街頭又係佢,街尾又係佢,一條彌敦道十幾廿間,行錯有乜奇

早幾年,講樓上舖,好似只會係cafe,salon,賣下衫等等,而家,睇下圖。。。



連莎莎都上埋樓,隔離果棟,樓上係滙豐嘅理財中心

你想喺二樓開間salon,cafe?

點同佢地爭?

我有個建議比政府呀,公廁而家咪一棟棟嘅,地面做埋舖啦,庫房搵多好多架,最多整架lift比人上樓解決囉。。。

樓下買賣黃金,樓上製造黃金。。。好一條屎橋喔~

Tuesday, June 19, 2012

六月功課。。。鷺,一直都在? (下)

繼續倒數,今日講1﹣7位

7/鷺台


6/捕鷺


5/鷺行家


4/鷺宿者之家


3/鷺髮沖冠


2/鷺師動眾


1/投奔鷺海

Monday, June 18, 2012

六月功課。。。鷺,一直都在?(上)

好耐無交功課啦,呢份功課咪就係做左前後多過一年囉,今日寫時先發覺,原來影左好多好多,最後cut剩16張,咁就分兩日出啦

先講主題,小時候,搭天星過海見到好多白色嘅雀,印象佢地係海鷗嚟架;但長大後呢,尤其呢幾年,海邊見親都係小白鷺,好似一隻海鷗都見唔到喎,問過人,佢地都覺得以前有海鷗架,亦有人答話一向都有小白鷺,你地比唔比到答案我呢?

今次主題就係。。。鷺

滿意相片1-16,由第16位數起

16/粉紅鼻鷺鷺


15/鷺鷺遊船河


14/鷺鷺日光浴


13/灰鷺鷺


12/鷺鷺散步


11/鷺鷺等船?


10/鷺鷺等車?


9/鷺鷺撲


8/鷺鷺飛越大西洋



預告:聽日最後七強

Sunday, June 17, 2012

另類劏房

呢期朝朝早起,其中一日就去左銅鑼灣啦,見有時間,晨下運,見到個蜂巢


都驚侷九蜂,慢慢行埋D


未試過咁近距離睇蜂巢,睇下,真係由等邊六角型組成架,好神奇呀


入面真係一間間劏房架,仲要無獨立廁所㖭,咁咪要去公廁?

Saturday, June 16, 2012

驗證碼的考驗

想點呢?越嚟越難喎,想留個言啫,使唔使過五關斬六仗呀?



咁都仲肯留言,真係非常有心囉

Friday, June 15, 2012

再見

今晚去紅磡送別好友,無見妳應該近兩年,今晚再見,見妳個名前面多左個姓氏

聽朋友講,兩年前識左而家老公,即拍拖兼去澳洲旅行,最後階段喺醫院決定結婚,所以無通知朋友。。。

現場播住你嘅相片,見到你地去旅行嘅相,已經好瘦,唔通知我地相信都係唔想我地擔心,又或者陪至愛過寶貴嘅日子

但呢D片真係催淚彈,唯有頂得就頂,因為有“高人”講過,盡量保持平靜心情,怕死者會唔安樂,唔捨得投胎

最後見完一面,其實有D似陌生人

好啦。。。。。。。安心上路

我會記住妳嘅開朗,硬淨,樂觀。。。再見

Thursday, June 14, 2012

乜嚟架呢?

去龍鼓灘上山時離遠見到,以為係隻雀蛋跌左落地,zoom埋去影相先知。。。

原來係哥爾夫球


繼續行,斜坡又出現一粒,今次唔係白色,有pattern,你估下係乜?係唔係雀蛋呢?


聽日開估

Wednesday, June 13, 2012

廢話

話說今日收到電話,話早兩日落舖頭set display其中一件擺設有少少問題,我落去re-執,已經一額汗。。。

之後某個電話令我條神經線“叮”左一聲,我要鬧人。。。

話說上晝,我個客(記者妹,呢個角色之前出過,就入怪客名單架啦佢)而家威啦,將D聯絡工作交比手下(M)做,而今朝同佢兩位聯絡時,結果係份job嘅料未齊,佢地要追客攞,唔齊料我無得做,佢地話會盡快

咁,下晝,記者妹打嚟問其他野,跟住加左句:你做緊(M)D野啦呵?

我:未喎,佢mail左新料過嚟啦?

記者妹:未

真係dead air左十秒

我(大聲):咁點做呀?

記者妹(滋油淡定):等我再催催先

﹣﹣﹣﹣﹣﹣﹣﹣﹣﹣﹣﹣﹣

之後我就開始病病地啦,係咪真係有比人激到病架?

所以,又要早抖啦,聽朝又係開早呀~~

Tuesday, June 12, 2012

香港有個黑沙灣。。。龍鼓灘

屯門港鐵站搭K52巴士,總站就係龍鼓灘


龍鼓灘擁有大天空,無際大海景,仲有特別嘅係,沙灘D沙黑色架喎,非常柔軟;但黑沙同隔離係發電廠有無關架呢?


早排有人摸蜆沉死,現場睇,風大浪大,捲你出去,真係唔出奇;正因為風大浪大,好多人玩呢種結合滑浪與降傘嘅運動,好型呀~


但有人失手喎,個傘上樹喎,好瘀呀


仲有個海豚瞭望台,行左上山,無海豚:(
但可以見到成個灘加發電廠全景


影左堆鍾意嘅相。。。

發電廠


一枝煙


兩枝煙


四枝煙


大浪


孤獨





分隔


紅眼


其實海面對正西,可惜出唔到咸蛋黃,見佢大風又大浪,於是玩下拍快相,噚日條片好多人唔明,因為雲行得慢;睇呢條相信大家會清楚D
Related Posts Plugin for WordPress, Blogger...