Sunday, September 23, 2012

困擾左成個月,終於鬆一口氣

一個月前,突然收到法庭傳票,話我在“天水圍”非法經營公司喎。。。 原因係我自三月起無交商業登記費; 我好疑惑,因為每年都係佢寄嚟我就交,今年無收到喎,無收到我真係無意識到期交喎 同埋佢寫明係“天水圍”舊址喎。。。。。。???? 我記性真係超差,搬左嚟西環三年,完全唔記得當時有無通知商業登記署改地址,但我記得兩年前我去過商業登記署架喎 而我西環地址亦收過商業登記署嘅信架喎,但去到商業登記署check record話我無改地址,但又解釋唔到點解其他信又識寄嚟西環喎,最神奇嘅係佢話我舊年有交喎,但我又搵唔到舊年張商業登記喎;我搬左嚟三年,如果無改地址,點解舊年我識交呢?到而家都諗唔明 好彩嘅係,遇到嘅稅局職員都好好人,最後稅務主任教我寫左封求情信希望唔使上庭。。。 等左三星期,收到佢地通知,撤消起訴,總算鬆一口氣 好憎自己記性咁差,應記唔記,D師奶廢噏就記得,無交商業登記就完全無件事。。。

15 意見:

ayclui said...

大叔, 放鬆D 啦, 無交費都唔係好大件事啫...你張果張BR CERT 夾住喺自己張稅單度就唔怕啦...

best actor said...

吉人天相囉。

black lab said...

既然可以記得咁多師奶廢噏嘢,即係唔係記性差啦。
我自己就會將交費、deadline 之類嘅重要日子 mark 喺記事簿,而本簿係長期打開嘅。至於每日嘅 things-to-do,就會用 magnet 貼喺大門背面 (度門係金屬),出街前實望見。

naruto said...

ayclui:
要上庭仲要去到荃灣夠死啦

best actor:
係呀係呀,安樂哂

naruto said...

black lab:
我都有簿抄低架啦,但無寫交商業登記囉

largeheadboy said...

其實公務員全部都好好人架~ :p

30 Something said...

咦, 大叔, 你無用smartphone? 可以較alarm提醒自己喎

Unknown said...

我又係嗰啲收唔到通知就永遠都唔會記得要交錢嘅人...

卡臣 said...

好運啊~~~

naruto said...

大頭:
全部?唔信

30something:
根本係無意識提自己要交商業登記囉

quincy:
:)

卡臣:
都算係嘅

maymay said...

最多咪罰款啫,唔駛驚喎~~

l.minor said...

最緊要無事就好啦~

naruto said...

maymay:
點知會點喎,梗係多一事不如少一事啦

l.minor:
堅係

Cat said...

咁你係咪即係交返錢架啦??
哈哈,咪淨係顧住寫信,錢就未交喎。

chiseenjai said...

唔洗擔心!好少事!小本經營,罰錢了事!

Related Posts Plugin for WordPress, Blogger...