Monday, May 7, 2012

寓工作於娛樂


我成日都話,自己係幸運嘅,因為興趣又係設計,工作又係設計,可以寓工作於娛樂

以前做野,尤其係出公司trip,我會緊張到飯都食唔落,瞓又瞓得唔好咁,直至有次跟一個大project,見到來自台灣嘅導演,平時無嚟正經笑嘻嘻,做野都係咁嘅態度,出嚟嘅效果又超班喎,之後同佢傾計,就學識一樣野。。。緊張係唔會有好野嘅,放鬆心情保持玩嘅“感覺”嚟做野,自然會出到水準。

而家每次出trip,我都係玩嘅,即使好似今日,原本應該五個人早上4:15去澳門做野,結果一人病左甩底,我由負責兩間舖嘅工作變四間,聽到時眉頭皺左幾野。。。

去到第一間先至6:00am,食個靚早餐先,哇,睇下,掂過”祿“䉀,盛惠$78,當然有人請啦:)


食早餐時跟同另一個同事左拆右拆,做好哂次序,分工合作,終於無驚無險提早完成,我都覺得不可思議

做完,會合哂四個人,其餘兩個都係老闆,其中一個最鍾意食,所以午餐由佢帶路,去左龍華茶樓食風味


時光倒流七十年,點心係一般嘅


但老闆嚟得,點會係為點心吖,佢為嘅係呢隻葱油走地雞,唔肥,好有雞味,好滑,的確係高分之作,雖然我鍾意個早餐多D


另外仲想一提,工作最後一站係澳門置地,即係法老王賭場,我行開去廁所幾分鐘,miss左一場戲,同事講番出嚟。。。賭場內傳出淒厲哭聲,一個內地約四十歲女人被一個男人挾隔肋底扶出嚟,企都企唔穩,半拖半行,佢喊到好大聲,講鄉下話唔識聽,企埋一邊邊喊邊嗌,同事問門口護衛,佢話佢輸左好多好多;但同事覺得個男人完全唔似老公或朋友,佢估係借數人挾佢去還錢,佢由三樓嗌住入lift,跟住竟然比其他兩位同事喺地下見到,話佢喊住比人挾左上的士。。。成件事係得我完全睇唔到,我只係行開5分鐘咋喎,不過我係唔會同情人爛賭嘅(包括去旅行都要入馬場果位blog友,呵呵呵)

15 意見:

l.minor said...

真係好,有d咁嘅工作真係引死人

largeheadboy said...

龍華茶樓無冷氣熱唔熱?

我唔得架,一多野做個人就好緊張
所以老細唔好畀野我做呀~

Karvitz said...

你最尾講o個場戲,我諗各大小賭場每日都有唔少,所以就算喊到拆天及日光日白俾人拉埋走都唔會有人理,呢件事真係悲哀的。

我諗你o個位去旅行都去馬場的朋友即等同你去日本睇櫻花一樣,都係開一開眼界咁簡單囉!無其他野既.....

新鮮人 said...

隻雞睇落好吸引下喎,
好似好好味呀!

naruto said...

l.minor:
係呀,番工要開心至得嘅

大頭:
我點會嗌熱架呢

好冗呀你

卡生:
我唔會落注1000円買邊朵櫻花開得大D

新鮮人:
係好得架

TY said...

隻雞真係好似好好味...好耐無去澳門...咁樣可以一去喎... 哈哈哈!

Karvitz said...

咁我都唔會落注1000円買邊朵櫻花開得大D.... 咁無聊。哈

卡臣 said...

唔好賭錢啊!

black lab said...

呢篇鮮有咁有啟發性喎!
雖然我唔係過份緊張嘅人,亦都唔賭錢,但係我都覺得呢篇一頭一尾都好有教育意義。尤其係最尾括號入面嘅更為精警!而留言之中「1000円買櫻花開大」更加一針見血!

naruto said...

TY:
帶埋臣臣去

Karvitz:
無點名話係你,唔好爭住認啦

卡臣:
我買六合彩咋,連櫻花開大細都無賭呀

black lab:
佢話大細無聊喎,可能拎地上花瓣玩番攤

TY said...

帶得臣臣去我就梗係帶啦...弊左唔得呢!

naruto said...

TY:
澳門唔得咩?唔比搭船?

Cat said...

去到龍華有無睇佢D相,個老闆好鐘意向人介紹佢D相同字畫。

naruto said...

Cat:
無喎,邊個係老闆都唔知喎

TY said...

據聞唔比帶上船/直升機! 入境可能都要隔離一排, 咁去黎做乜?!

Related Posts Plugin for WordPress, Blogger...