Thursday, March 8, 2012

東京.伊豆.輕井澤の旅﹣day3 (下)

繼續伊豆行程。。。

落車行去第五及第六淹,唔使行上行落,瀑布規模亦較細,好快行完兼影完,睇番傳單,原來封左果三個,一係有舞娘,一係最高,唔係就最濶,我有中計嘅感覺,頭頂有舊黑雲


快獸都話個瀑布係佢見過嘅最細架,睇華富邨果個好過喎


點都要有D美好回憶嘅,買串野食下先;似係味噌同日本年糕,不過好過無啦,肚餓呀~


七淹黑仔事件簿係未完架,見到圖左汽水機罐幪面超人,即買諗住儲個罐,結果。。。騙案呀,我頭頂舊雲再大舊左啦


巴士上討論下之後行程。。。剩餘時間去城畸又好似唔夠,朋友建議去下田,因為JR上面貼哂海報有個靚海景;但係個靚海景點去其實係唔知架,但橫掂都係亂撞,就隨意D咁去啦
巴士總站又番嚟河津站,睇左時間表,見有15分鐘剩,出去影多幾野櫻花


到下田啦
又因為朝早喺伊東站check左最後一班踊子號係6:15pm,所以下田頂多玩到4:15pm左右,睇唔到日落(最後原來又係意外囉,請睇最下面)


下田係板本龍馬發蹟嘅地方,到處都見到佢嘅影踪,但係呢;都唔似福山雅治或內野聖陽嘅原來


問車站遊客詢問處,佢話海邊只需行20分鐘;係就係海邊,但唔係我地想去果個位,呢樹係漁船碼頭喎


繼續向前行,沿路繼續有梅又有櫻,但目標係個海景,急步行
經過麵包舖,醒起,其實未食飯架,但時間唔夠,買左一大袋麵包邊行邊食,影相係大過天架
經過呢間居酒屋,覺得靚影相之際,見到有貓貓喺門口,影左幾張都唔啋我,呢幾日同貓無緣,見到佢地唔係我拖住喼攞唔到機就係佢地好似見鬼咁走哂


嚟到呢個位,係個魚市場,呢舊石前後兩個樣,好特別,而遠望海景,的確見到我地想去果個位,但至少行多半粒鐘,計過唔夠時間,番車站,點知,迷路,雖然只係迷左好短時間,但僅僅上到車,唯有繼續食麵包(就嚟變麵包超人)
但總括嚟講,我係鍾意下田架,有機會要再嚟


上面講過,仲有一個意外,番到伊東站,double confirm架踊子號幾點有車,發現最遲果班唔係6:15,而係三點幾,因為睇錯左週日果張時間表,而今日係星期一。。。冷靜,睇真D先
有車去東京嘅,張pass係包嘅,但要搭幾耐呢?去問票務姐姐,佢話兩個半鐘;噢!今日玩乜呀?
但事後諗,都係要玩盡架啦,點會三點幾走
睇時間,仲有個幾鐘,一係去食飯,一係去番今朝個公園,但要快,因為天黑了

結果,影左全程最愛嘅一輯相,個天個色真係未見過架,靚到不得了


咁,攞行李,經過mos burger買左個包,洋蔥圈,又經過菓子舖見有草餅買(仲要關門前特價),上車慢慢食啦
個包真係好食個香港架


番到上野酒店,即刻做緊急嘅野。。。义電,電話相機都差唔多無哂電,驚义唔切
落街諗住買枝茶,見到呢張海報。。。280円有燒牛肉飯?
雖然食左包,都要隊一碗;好味呀,整日趕趕趕,到呢一刻,個人先定番落嚟,好滿足咁番酒店;咦仲有樣野未做喎


我地未傾聽日去邊(死未,隨意成咁)

聽日預告:凍到飛起,舊黑雲再大D

18 意見:

卡臣 said...

凍到飛起張相好掂呀!

naruto said...

卡臣:呢一刻見到雪仲識玩,之後。。。

largeheadboy said...

伊豆係春天去嘅好地方
等我發下夢先~

black lab said...

咁混亂嘅?想去嘅地方又去唔到,去到又睇唔到想睇嘅嘢,連三餐溫飽都冇......好似好慘。
第時準備得仔細D啦,睇地圖、睇時刻表要睇得小心D。

Karvitz said...

我都係呢句「咁混亂嘅?」

我想問下在混亂中有無怨念出現過?

naruto said...

大頭:
番工呀,飛咩夢呀

black lab:
諗住自由free,隨心D,點知矇加黑仔。。。

karvitz:
始終對住D景都係靚嘅,無得食好多時都係因為想影多D相,無怨念喎

但係咪有人咒我?

supageti said...

果啲係焼き団子(燒糰子) ~~

naruto said...

阿粉:
我以為叫火燒後欄㖭

TY said...

我覺得日本D瀑布好多時都把鬼.. 好似輕井澤果個白系の淹... 我去到就覺得有D搵苯!!!

我覺得大叔係去到日本凍到傻左, 所以時刻表睇錯!

Ebenezer said...

個Burger好Juicy呀,一睇就知正!

naruto said...

TY:我的確係冬天做野就跌哂watt嘅

ebenezer:係呀,好好味架

black lab said...

re Naruto: free, 係要 base on 準備充足而得出嚟效果。
另外,想講一樣唔多重要嘅嘢:你打嘅「义」字,係「義」字嘅簡寫。「叉電」,呢個先係正寫。(唔好意思,呢d係我嘅職業病)

又,想回應 / 問一下 TY 君:
白系の滝看似好搵笨,但係,知唔知點解佢出名?

black lab said...

re Naruto: free, 係要 base on 準備充足而得出嚟效果。
另外,想講一樣唔多重要嘅嘢:你打嘅「义」字,係「義」字嘅簡寫。「叉電」,呢個先係正寫。(唔好意思,呢d係我嘅職業病)

又,想回應 / 問一下 TY 君:
白系の滝看似好搵笨,但係,知唔知點解佢出名?

Ellen老師 said...

呢個幪面超人都買過想儲個罐,結果係百佳見到有得賣,仲任選款式!

攞你命三千 said...

間中去阿信屋掃場都會見到蝗蟲超人汽水~

maymay said...

個瀑布係細D,不過快獸都好開心喎~^_^

naruto said...

black lab:白系の滝看似好搵笨,但係,知唔知點解佢出名?。。。。出名在搵笨?:)

老師:嘔血

三千:繼續嘔血

maymay:佢係演技派

TY said...

to Black lab

因為會有熊出沒?! (我好記得有呢個牌,哈)
真係唔知點解咁出名喎...求解!!

Related Posts Plugin for WordPress, Blogger...