Wednesday, August 31, 2011

成班都係禍港嘅黑人”曾“

曾偉雄。。。見佢出嚟講野嘅態度,真係想佢快D落台


曾蔭權。。。以前個樣無咁衰格,而家似係一個對市民不滿野又做唔到又專制剩係識鬧人嘅癲佬


曾鈺成。。。蛇頭鼠眼陰陰笑,樣衰


曾德成。。。一門雙杰,申辧亞運單野睇到佢有幾低能,為自己多過為香港,衰格


曾俊華。。。$6000單野攪到亂糟糟,簡單複雜化,無啦啦四月後申請又多$200,有咁複雜攪咁複雜,跟住又要大賣廣告教你點攞錢,銀行又要搵人戙喺度敎人填表,嘥人力物力,嘥立稅人錢,衰低能


曾憲梓。。。雖然唔係政府人,心目中覺得佢係第一代出嚟亂咁吠嘅癲狗,個樣仲要入型入格,似隻沙皮


曾又唔係大姓,身邊無乜人姓曾,點解會咁多“累”埋一堆,真係咁橋定有心安排?

投票:你最憎邊個?

我先投:曾德成

Tuesday, August 30, 2011

日落景點新發現。。。一號銀海防波堤

星期日,去奥海城辧個小事,跟住搵地方影下相


向海方向行,一號銀海出面原來有個防波堤,仲可以偷偷上去影下相㖭


唔上堤壩,又可以好似我咁坐喺個海濱公園等日落,好得閒,玩下相機,轉色轉色再轉色


影左一盆黃昏拼盆


同一味菜,玩藍色,變左另一個拼盆


最後,再送上大自然拼盆,烏烏同蠅蠅又攪野啦~


呢樹近市區易嚟,坐得舒舒服服等日落,推介呀~

點去一號銀海防波堤:搭港鐵去奧海城站,行去一號銀海,向住海方向行就見到



Monday, August 29, 2011

大叔?

睇東張西望,娛樂頭條果類節目,訪問成龍,陳伯祥,苗僑偉,劉德華,梁朝偉,黎耀祥呀咁,D記者係點稱呼佢地架呢?

成龍係大哥

陳伯祥係叻哥

苗僑偉係三哥

劉德華仲係。。。華仔

梁朝偉仲係。。。偉仔

黎耀祥仲係。。。祥仔

我無理由係”大叔“囉,下哇!

以後叫我“明仔”唔該

Sunday, August 28, 2011

繼續imac,ipod,ipad之後

ijesus都得;其實好多人爛過我囉

Saturday, August 27, 2011

陸叔講衰野

來自今日晴報。。。


Friday, August 26, 2011

蝴蝶天堂﹣鳳園。。。相簿

鳳園除左蝴蝶,仲影到乜呢?

1/怪雲


2/紅蜻蜓


3/夢幻小菊花


4/玩躲躲貓嘅烏蠅


5/荷花


6/兩隻紅蜻蜓


7/手牽手嘅小公主


8/風車


9/怪蟲


鍾意邊張?

Thursday, August 25, 2011

蝴蝶天堂﹣鳳園

上星期六,揀左去大埔鳳園,影下蝴蝶


大埔火車站搭20A特別班綠色van總站落車,記住係特別班,因為20A係去唔到鳳園架;一去到,已經見到隔離係個大地盆起緊樓,建造定破壞呢?蝴蝶真係多得你唔少囉;每星期去郊外都見到呢個景象,究竟香港仲有無大自然呢?


講番正題,$20入場費,香港大部份嘅蝴蝶都可以喺呢度搵到架,超值啦!
地方分兩期,唔算大,當日人亦唔算太多,約廿人,無師奶團無推BB車團,真係靜哂,兼大家都好有默契為影蝴蝶而嚟,講野好細聲,好靜!

影左一個圈,見有條路去沙螺村,要上山,諗住去啦,行左15分鐘就溶哂,左腳膝頭哥無力,體力急跌walt,唯有落山坐低抖抖


雖然狀態麻麻,但都影左堆靚靚蝴蝶相


其實有好多品種,有D仲超靚,題佢地齋飛唔停,我影唔到:(


呢種只出現一次,把握時機。。。襟襟襟


喺第二期果邊見到一大竇,狂影啦


越影越埋,後期直頭唔用長鏡,隊到同佢相差幾寸佢都唔走


橙色呢種好靚呀~


呢張第二最愛


呢張影番黃昏,最愛


希望咁靚嘅香港大自然可以保存啦


除左影蝶,鳳園仲影左好多相,聽日繼續。。。

點去鳳園:大埔墟港鐵站出,轉20A特別班綠van搭至總站

Wednesday, August 24, 2011

小便宜

隔離台講開話要精打細算,今日多份報紙頭條又講通賬急升,唯有慳得就慳喎;我就話平都唔夠呀,我要嘅係免費

前排超忙,抽獎玩少左,中獎自然少左,無計,但都仲有少少收獲嘅。。。

中左盒奶皇月餅,有8件,好肥仔(未到中秋已食完)


雪糕兩桶;以為係兩杯㖭!


去到又一城個妹妹售貨員問我使唔使乾冰,我話而家食,佢O咀;跟住拎出嚟到我O咀話,咁要乾冰吖唔該;原來458ml架,都幾大桶架,仲要2桶,當飯食~


無抽獎都有玩下D FB apps,有贈品


襟個like就有,LIKE呀~


COMPASS CARD話我支持佢iphone推廣,寄嚟$50百佳coupon:)


繼續中到雜誌寵物相嘅禮物,又係洗面膏,hehe


無獎中,迫個客送我有份做廣告D product比我,得到一包秋田米(咁細包嘅),都夠兩餐


仲有包糖,呢隻糖要介紹下,防中暑架,我去影相都帶住佢,屈臣氏有售


呢個月係得咁多啦,我要勤力D,繼續我嘅免費之路

Tuesday, August 23, 2011

貓之近況

好耐無講佢地,今日講下近況。。。

豹媽。。。越嚟越痴人,食完飯就走埋嚟玩,性格其實好可愛;
呢張相我好like呀~


佢亦都係好好嘅模特兒,坐定定比你影


黑仔。。。一路都無講一件事,佢隻耳仔係有D病嘅;先講外觀,佢右耳耳珠位置雖然有毛遮住,但明顯崩左一忽;
有位阿叔話:佢曾經比狗咬,咬甩隻耳,而家生番咋!(下,生番隻耳)
我諗比狗咬過可能係真,咬甩隻耳就誇D;而家傷口雖然好番,但耳腔間中會滲血,我其實已經幫佢用綿花沾消毒藥水幫佢抺,又比貓消炎藥佢食,又滴埋藥,但都唔斷尾;有時都會諗,隻貓乖到你隊埋棉花/噴咀入耳都係咁易掙扎比我完成佢,佢真係好乖仔
但近日佢食少左,對住我發出一D唔高興嘅貓叫聲,攪到我有D擔心,又唔知你想講乜


上星期五,探佢地嘅時候見到solar細佬兩公婆放狗(2隻),本來佢地都乖,但主人一行開,佢地就追貓,我即搵番佢主人,好彩叫得番佢地落嚟,但D貓就雞飛狗走啦,黑仔嚇到跳上樹,樣都呆埋呀,陰公




貓媽。。。壞消息,佢三個月前生果竇貓,頭兩個月仲間中聽到貓B叫聲,但一路都無行出嚟,但前排暴雨加打風之後,就連聲都無埋,佢地住喺山,我諗可能真係比水沖走都唔定。。。

但上星期開始,發現貓媽個肚又大左,使唔使咁密呀?即係未”介“奶就已經有左,乜真係咁好生養架;餵貓阿姐聽到話不如帶佢去終止懷孕,話生出嚟都係死喎,我拒絕囉,命嚟架,生出嚟大唔大到睇佢命數,我唔會連呢個機會都唔比佢地囉;
而家佢好信我啦,比我摸㖭,今日仲攤開肚皮比我摸,好似驚我唔知佢大肚咁,好攪笑~


除左黑仔,佢地隻隻都肥左毛色又靚左呀;貓媽直頭大左一個碼


------------
後記:今日去完探佢地,行番屋企,喺後街突然出現一隻貓,見佢食緊飯,走埋去影佢,眼大大但個樣好瘦呀

Related Posts Plugin for WordPress, Blogger...