Tuesday, May 31, 2011

W-kitchen 免費自助餐

參加新假期抽獎,贏左一位W-Kitchen週末自助餐一位,約埋朋友去,兩個去比一個錢,蝕比佢喇,呵呵~

我果朝作最好嘅準備,清哂D舊貨出嚟,以最佳狀態空肚去食呀;網上劣評如潮,但我食D野咁basic,應該無事嘅,即刻睇下係唔係。。。。


先食沙律,前面嘅凱撒沙律係我自己攪嘅,材料係靚嘅新鮮嘅,只不過中左個計,個沙律醬我做佢落左鯷魚撈埋,有D腥,見議落thousand island好過


跟住見佢有點心,我至愛自助餐有點心,仲要每籠得兩件,可以每樣食少少,即𡁻個乾蒸牛肉同排骨,排骨一般,但牛肉我比高分嘅,雖然朋友覺得佢D肉太靚,唔似平時食開嘅乾蒸牛肉


繼續點心,燒賣即使我撥走哂D唔知魚子定蟹子都有D腥,一般;燒肉同燒排骨OK合格


呢兩個沙律嚟架,左邊雞雜菜我like,右邊薏米賣相就怪D,但我好食呢類中藥材料,所以食哂嘴lamlam


中場休息,去幫趁W嘅分支。。。WC,騰出更多空間再食過


北京烤鴨,好瘦無肥羔,無咁juicy但都無咁“漏”


既然唔”漏“,就encore多一件啦,加碗豬骨蘿蔔湯先,好味,但朋友話似濃湯寶


再encore牛肉,隔離嘅魷魚係成餐至差嘅,腥之餘質地爽到奇奇怪怪


cake係得架,件件都好味,楊枝甘露甜左D,但都encore多一杯


竟然有棉花糖,好好味呀,涼粉好好味,啫喱都好好味,朱古力慕司都唔錯,荔枝布甸帶紫色咁驚嘅,但味道又唔錯喎


飲埋杯凍檸茶,收工

12點食到3點,好盡慶

事後檢討,網上D人彈嘅好多係海鮮類,我本來就唔食,影響不大,所以都食得幾開心,但有幾個扣分位。。。
壽司魚生選擇鬼咁多,但竟然無腐皮壽司
熱葷佔左一半係海鮮,使唔使咁多呀,唔怪得之比人投訴啦
連個炒西蘭花都加蟹肉,唉!D厨師唔用海鮮係咪唔識煮野架呢
麵包凍嘅,唔擺架多士爐比人架
無雪糕喎,自助餐無雪糕喎

最後呢,想話呢,我諗好多人想要蘋果多過SCMP囉,睇下,叠報紙無人掂過囉

Monday, May 30, 2011

心理遊戲

請先望住貓眼四秒。。。


分析
A/如果你睇唔到,你對眼要去驗驗

B/你嚇到嗌左出嚟,你心血少呀

C/無反應?鈍鈍地啦你

D/睇得好開心,恭喜,你係正常嘅,呵呵呵

Sunday, May 29, 2011

暴風女神依呀山

接前日果篇。。。女神登場

落左一場大雨,大部份遊客/泳客走左,本來諗住走架啦,但見到沙灘有野郁郁下喎


原來有兩個遊客影相呀,幾咁twins呀真係,佢地每影一張之前,都會嗌一聲“依呀山”,根住擺出一個誘人舖屎
阿sa:“依呀山”,yeah~


好,到影阿嬌,阿sa揸機啦


先來個海邊跑步,哇!好歡顏呀!


阿嬌:“依呀山”,踢~


阿嬌:“依呀山”,啊~


又換番阿嬌影阿sa,“依呀山,愛的抱抱“


再lai,“依呀山”


最後,故事發展,竟然。。。。。。“依呀山”“依呀山”“依呀山”“依呀山”


暈啦!

Saturday, May 28, 2011

興奮。。。唔該唔好停

收到通知中左“愛情潛水”戲飛,星期三晚9:50首映,油麻地百老滙,諗過唔去,一來唔知乜戲,二來又夜又遠呀

終於有去,好好睇,好好笑㖭,畫面又靚,推介,我比85分,好彩有去啫, 因為。。。。


套戲咁夜,先約朋友7:00pm佐敦食飯先,我又早到喎,咁見有間投注站,咪買番張六合彩囉,星期五朝上網對,見頭三個字中哂,有D暈㖭,最後,真係中左四個字喎,兩個星期第二次中四個字啦,我望住部腦呆左兩秒。。。


唔該,唔好停

ps:懷住興奮心情寫呢篇,興到有些糞,就此擱筆

p完再ps:暴風女神比六合彩打低左,聽日至出街

Friday, May 27, 2011

暴風女神。。。汀九麗都灣

上星期六,唔信天文台話會落雨,走左去汀九麗都灣,影下汀九橋


都幾靚喎,仲有沙排場㖭,不過D水唔合格,所以唔比游水,但現場好多人落水喎
嚟到梗係影橋啦,沙灘隔離有個公園,正正係汀九橋底,等我用影裙底嘅手法影下橋底先


影左一陣,落大雨,企喺更衣室門口一粒鐘避雨,激死
做乜好呢?呀,DOWN 下影相apps先

停雨,一堆貓走哂出嚟,但一見人,全部閃呀,精叻,但我有長鏡,仲叻


試下用iphone影相先
左:救生亭/中:網中橋/右:樹gap中的救生亭


跟住,玩下九格相先


開始發癲啦,擰呀擰呀


試下第一格同第三格,第二格要同第四格一樣先


再”腎“D,上面四格駁番下面四格


影下香港腳


試下駁哂九格,唔多成功,但好玩


原來九格都唔同效果係最好架


成舊雨雲又飄過嚟,速逃


暴風女神?女神呢?聽日矚目登場

點去汀九麗都灣:荃灣港鐵站對面往屯門方向搭53巴士

Thursday, May 26, 2011

西醫王子

醫生有分專科,有心臟專科啦,有耳鼻喉專科啦,有皮膚痔瘡專科啦;呢科喺香港唔少得,做到呢科嘅專家,發大達呀





















西醫王子,專醫公主病

Wednesday, May 25, 2011

貓媽與新貓媽

4月15日,如常去探貓媽,餵佢嘅時候,突然走出一隻大貓乸搶食,貓媽望住佢讓比佢食,食完佢就走左,跟住幾次都無再見到佢



5月18日,發現唔見貓媽嘅第一日,佢竟然又出現
(熟貓嘅人請睇下佢個肚,係有左定係生完呀?)


仲表現到好熟地頭,食完走去曬太陽㖭


5月19日,貓媽繼續失踪,佢呢,就繼續風騷,好大食又同其他貓表現熟稔;


5月20日,嘗試下晝1:00pm去,諗貓媽可能黃昏出去搵食,但都係唔見佢唔到

我諗,貓媽究竟係比野狗食左吖?比呢隻貓乸迫走左定係比貓義工捉左呢?

5月23日,黃昏去到,又係見到黑貓,新媽貓,兩隻B;有D失望,餵佢地食野之餘,好多蚊,噴左蚊怕水都中招。。。

黑貓同新貓媽食完行開,仲friend到“戀”我腳㖭,肯跟我啦喎!


諗住再添D比佢地嘅時候,貓媽突然戲劇性現身,狂𡁻貓糧,我當然大量提供啦

仲用iphone影相,貓媽,你番嚟我安樂哂:)


番嚟睇相嘅時候,有驚人發現。。。。

未完,下週再續

Tuesday, May 24, 2011

我與貓媽的故事

今日,講下故仔。。。


舊年,偶然發現西環有個隱蔽地方住左四隻貓,一隻貓爸,貓媽, 一隻B仔,同一隻閹左嘅黑貓,佢地一家四口本來好開心。。。

因為我放左佢地D相上facebook,比我姐夫個妹(佢係一個貓痴)見到,佢同佢班貓義工朋友(仲要多過一班喎)就發哂狂咁話要救番阿B仔。。。

我唔太認同佢地嘅愛貓方式,唔肯幫手,但都提供左地址比佢地。。。

終於,佢地捉左老豆同仔,話會嘗試搵人收養,阿媽呢,佢地捉唔到;黑貓呢,因為已經大隻兼閹左,無人會收養架咯喎,所以捉到都放番,唔會嘗試搵人要。。。

當時其實好嬲,覺得佢地班友剩係要細貓唔理大貓又拆散人地家庭;

一個月後,我問佢地貓父子近况,答案竟然係。。。

老豆由暫寄養家庭跳左落街,跟住流落公園;阿仔比人收養左,但原來佢有先天癲癇,但收養佢嘅人不離不棄,繼續照顧。。。


而貓義工同寄養家庭因為佢無裝貓窗紗事件炒大獲;

我呢,放唔低老豆,去左公園四次但都搵唔番佢,心入邊條刺越插越深,因為唔放佢D相上facebook就唔會攪到人地頭家散哂。。。

個心放唔低,覺得欠左佢;春天嚟到,我決定番去探貓媽,見佢同黑仔好健康,都安樂D,但係,點解會多左兩隻貓B嘅,話係B,都應該有三四個月大(遲D再放佢地D相)

從果處做野嘅人得知,其實佢地日日有人餵,我都放心D,但我仍然每星期探佢地一至兩次,每次都帶定貓糧或礶頭餵飽佢地,佢地又真係好肚餓架喎

每次去到,當然會同佢地影相啦,貓媽呢,由最初對我非常避忌,到而家肯比我離佢一尺影下相,但仲未比我摸佢;貓獨照佢最多,因為我偏心,最花心機同佢影


上星期三去到,見唔到貓媽,佢地間中會行開行埋,當時無為意;但星期四星期五繼續去,都唔見。。。









貓媽失左踪


未完
(睇過我舊果篇記得佢地住喺邊嘅讀者,請唔好寫出佢地住嘅地方,我真係怕左D虐貓人同埋貓義工,謝~)

Monday, May 23, 2011

繼續discovery青勞﹣ 吔媽嗲

獅子會見到呢對狗男女,日光日白打野戰,一路行一路吔媽嗲,擺哂舖屎任影唔嬲,世風日下呀真係

行上

行落




行上葉面曬太陽


莖上表演高難度動作


又上番葉面;最愛呢張,風景一流呀;但係你地做完未呢?
Related Posts Plugin for WordPress, Blogger...