Thursday, October 27, 2011

車禍現場。。。

一早要開工,8:45AM搭巴士,行左兩個街口,仲見到電車站好多人爭住上車,有個師奶又上又唔上又想搭巴士標過馬路,個心仲諗緊咁樣真係遲早車親呀。。。


再行半個街口,巴士準備埋站,我見有架電車停響度,無人架喎,有個男人面向天半個身瞓左入車底,我仲估佢整車呀,巴士慢慢行正佢面前,見佢暈左,個頭流左兩行血,塊面污糟哂,隔離個女司機個樣好焦急咁,我先知佢撞車呀

奇怪係,電車上無哂人,但無人幫手或圍觀;而佢瞓果個位,即係比車轆過呀?好驚呀;隔左一陣,警察就到啦

而巴士亦離站啦,啱啱上車嘅兩個男人見到撞車,走左去樓上車尾,跟住打比人,對答如下。。。

男:巴士站撞車喎,你見唔見到呀?邊個嚟架?下?阿德嚟架,死囉,梗係追車啦,佢有無事呀?。。。慘囉慘囉(但佢地無諗住落車幫手喎)

收線後佢打番公司。。。

男:喂,門口撞車呀,阿德比電車撞呀,你出去睇下啦;佢今日梗係番唔到啦,仲番到工咩?(公司只係關心有無人番工咋,人情冷暖)

可能嚇一嚇,今日心不在焉,佢個流血樣直頭印左喺腦入面,清楚到畫番出嚟都得,好彩。。。

歸家後上網search呢單新聞,話佢奇跡受輕傷,都安樂D

9 意見:

ayclui said...

好彩執番條命, 希望佢以後會小心過馬路.
我心血少唔敢望呢D o野o架~

naruto said...

ayclui:
今日報紙話佢頭部只係擦傷。。。流兩行血都係擦傷架咋?

返工趕巴士D人真係亂嚟架

l.minor said...

好彩無事

Ebenezer said...

呢個故事教訓大家:上電車要小心!

TY said...

我都好驚D人突然彈出馬路..真係會刹唔切車架麻!!

naruto said...

l.minor:
係,好彩好彩

Ebenezer:
果個唔係電車站嚟架

TY:
行人。。。突然標出馬路
司機。。。突然飛快駛過嚟

加埋就係死得人多囉

卡臣 said...

路上零意外,香港人人愛

Leo said...

唉~

naruto said...

卡臣:
而家香港人D水準,好難零意外囉

Leo:
你唉我又唉~唉

Related Posts Plugin for WordPress, Blogger...