Saturday, October 1, 2011

我對早餐A的要求

一講食早餐,第一選擇就係早餐A,即係煎雙蛋,多士,火腿通粉,餐飲


但當然,每間都有D唔同,以下係我對早餐A嘅要求。。。

A/煎雙蛋。。。我鍾意個底有少少燶,啜到蛋黃;但大部份茶餐廳都煎到油浸咁,燶都唔燶又有,連蛋白都仲稀嘅又有,隻黃係凍嘅直頭係難食啦,下哇~,有D仲慳皮到得單蛋㖭!

B/多士。。。我係頗堅持要多士唔係牛油方包架,就算要加$1-2我都加,因為我對整麵包嘅麵粉有要求,茶餐廳D包好多都有陣發酵味,帶酸,你地覺唔覺架?仲有,D牛油渣單面,唔夠油我都扣分架

C/腿通。。。最基本我係要火腿絲,一塊火腿嘅口感係差好遠架;有D加鮑魚絲仲衰,我係要走左佢嘅,好加唔加,破壞哂,咪整腥碗湯;個湯雞湯味最好,魚湯嘅唔使旨意再幫趁

D/餐飲。。。100次有99次都係嗌凍檸茶架啦,我要求唔算太高,最緊要唔苦;要彈嘅係有D餐廳超細杯,有D呢,D冰溶哂杯野都唔冰囉

E/清茶。。。越嚟越難見到,我講嘅係一杯清茶,好多都轉哂水,預左用途係洗义咁;甚至水都無杯,真係慳得就慳呀

最後,一個我覺得重要嘅位係,食早餐A,10間有9間都唔比刀架,要搵隻义當刀用,論盡左囉,我知洗少隻义吖嘛,環保呀呵!

總括食過咁多間,北角新釗記最啱我,係無清茶囉;但我而家好少去北角囉!

你地對早餐有乜要求呢?

19 意見:

TY said...

我都好鍾意食早/常餐架!!!!不過鍾意食炒蛋多D!

新釗記--中學時代之飯堂!

Artman said...

逢一至五的早餐: 麥包一舊就夠.

卡臣 said...

我要隻蛋靚

Alvin said...

北角好似得番電車路嗰間,以前細個有七姊妹道的。

naruto said...

TY:
炒蛋都好食,不過早餐炒蛋好多時得薄薄一塊,又覺得唔好食

artman:
咁星期二至六應該好暢順

卡臣:
使唔使個收銀靚?

Him:
我唔知㖭~

ayclui said...

煎蛋要反蛋燶邊最好, 多士方包無所謂, 但方包一定要柔軟, 多士要外脆內軟, 唔得乾到似餅乾, 腿通通常食淨D腿絲...餐飲九成半都係熱鴦少啡, 清茶一定要有(漱口用), 唔駛刀, 有义用就得~ :P

Unknown said...

A餐,腿通,炒蛋腸仔,多士烘底少油,檸茶走甜/鮮奶

唔洗用刀;平時唔點食早餐

Ebenezer said...

你鍾意嘅呢款早餐,除咗個包唔係餐包之外,係最classical嘅港式早餐,最地道嘅口味!

supageti said...

我啲要求多到寫唔完 ~~~~ 我唔會朝朝食同一款野同埋好少飲凍野 ~~~

largeheadboy said...

我今朝趕住十一點前落茶餐廳食早餐,點知去到睇餐牌發覺十一點後供應嘅常餐竟然同早餐一樣,價錢也是 $22~

Ellen老師 said...

好....聽朝去【豪華】食呢個餐!

maymay said...

我多數响屋企食,盡量要吃城市超級嘅麵包,
出街食就最緊要杯奶茶靚,早餐太興算唔錯。

naruto said...

ayclui:
清茶一定要有(漱口用)。。。個餐要唔要包牙膏呀

cant-say-no-say-yes:
早餐點都食少少好

ebenezer:
我是地道香港人~~~~

阿粉:
我睇到,你寫大X樂奶茶“啟發”我寫呢篇架

大頭:
個下巴跌到個胸啦,仲食

老師:
豪華喺邊樹架?

酸maymay:
城市超級嘅麵包。。。即係little mermaid呀?

best actor said...

有一晚我同舊同學聚會﹐遺棄了T一人在灣仔流浪。他去了灣仔新釗記吃了一個粟米斑塊飯﹐據聞難吃得要命﹐聽下都覺可憐。

香港的奶茶仍然是最正的。

naruto said...

best actor:
新釗記食早餐OK,其他一般貨色架咋

但難吃得要命就慘D

新鮮人 said...

如果要揀,
首先係環境,

寧靜
(至少不太嘈吵,四周唔好有阿媽打仔、八婆講是非)

衛生
地下唔係又濕又多垃圾,
餐枱、食具唔好濕淋淋。

至於食物,
唔好太難入口,
可以坐得舒服就夠了。

naruto said...

新鮮人:
你呢樣野同我一樣喎,環境重要過食物質素

除左阿媽打仔、八婆講是非。。。仲有係D伴計阿姐唔好大大聲傾計,仲嘈過D客

TY said...

如果無錯"豪華"係灣仔, 英皇側邊果條街.

naruto said...

TY:
老師過灣仔食早餐?

Related Posts Plugin for WordPress, Blogger...