Sunday, October 31, 2010

推介*好味嘅柯華田軟雪糕

讀小學時就成日會飲柯華田,大左呢就無飲過;

OK便便店新推出嘅柯華田軟雪糕,食完飯隊番隻,好好味呀!柯華田味原來好夾軟雪糕架

每隻$3.5,試下啦

Saturday, October 30, 2010

驚險事

最近幾次去影相都遇到D驚險野。。。

驚險1/去獅子會影荷花,朋友突然大嗌,走呀,快D走呀。。。


原來我隔離突然飛左無一千都幾百隻蜜蜂出嚟,嚇到走入亭,好彩無追嚟;(張相click大睇,D白點係蜂嚟架)



驚險2/都係獅子會,上次長洲見到大過手掌蜘蛛嚇到嗌出聲,今次呢隻有過之而無不及,個網好完整,橫跨兩棵大樹,個網至少廿尺長,隻蛛有幾大,我走到有幾埋,自己睇


驚險3/影牛,點知有隻突然走埋嚟,嚇到我吖


驚險4/加埋早兩日橋咀島就要行石春路,差D仆


驚未?

Friday, October 29, 2010

壞消息

噚日同舊老闆食飯,聽到一個壞消息;

舊公司女同事一個月前發覺身體唔舒服,檢驗後發覺原來係癌,已擴散,直腸,淋巴,肝,骨

兩星期前,舊老闆陪佢睇中醫,佢仲可以慢慢行;早兩日,喺醫院,骨痛到坐都唔得。。。

醫生同佢講,化療可以幫佢延長多陣,都係得三個月

聽完唯一可做係搵我另外一個朋友,佢患過癌(四級),而家好番兼做左中醫,問佢有無乜野仲可以做,但得嚟答案唔係我想聽到嘅;

佢又講,好多人工作時死做爛做向上爬,做到阿哥阿姐級,先發覺原來你身體根本唔係咁諗,佢頂唔住。

今日,知朋友喺醫院話痛到頂唔住,終於決定排期做電療。。。

﹣﹣﹣﹣﹣﹣﹣﹣
下晝,解決左幾件工作煩瑣後,坐左喺西環海邊調整心情,諗番起當年喺公司,並肩作戰打左幾場硬仗,合作無間,又諗番起每年聚會你嘅開心樣,心真係啾住啾住咁痛。。。

吹住海風,睇住日落,真係好靚好靚

夕陽真係無限好

Thursday, October 28, 2010

橋咀島﹣相簿

1/背光


2/星星草


3/水影


4/大自然拼盤


5/絕世靚景


6/絕世靚景2


7/死魚


8/黃昏情侶

Wednesday, October 27, 2010

橋咀島遇險全紀錄

星期六,鮎魚走後第二日;起身,竟然大好天,決定去影相,去邊好呢?今次去橋咀島。。。

橋咀島最大賣點就係條小石路,水退時行得過,離遠睇,好似可以喺海面行咁


西貢碼頭出發,餐廳對出有街渡載你去,來回廿蚊位;行駛途中,見個師奶開遮,心諗:怕曬就唔好嚟呢D山荒野嶺嘅地方啦!
落船,行經沙灘,成班擔遮黨,有個仲吹到遮都反埋都仲要擔,咩野心理呢?


有個肥阿嬸見我影相,大嗌:你睇下,釣到咁大隻墨魚喎!
我走埋去,問:影張相得唔得;
佢:得,不過請我飲礶芬達吖

又好。。。
影影影,影完;去買芬達
佢又話:買兩礶吖!
心諗:死貪心

跟佢指示嘅屋仔買芬達,點知原來係無汽水賣架,番去同佢講,佢竟然話:你比廿蚊我出西貢買啦!

我心諗:是旦啦,比左廿蚊佢

佢又話:比隻墨魚你吖
我話唔要啦;但轉頭心諗:放生都好喎!問佢係咪真係比我先,佢又話:要比錢!

唉!啋你都儍,墨魚我救你唔到呀!劇肥野好貪心呀~


記得落船時,船家話:而家水退,可以行過去,建議行埋個山仔,來回粒半鐘左右,收到;(我好聽話架,照做~)
過淺石路啦,見到呢度出名嘅億年(唔係姓林架)化石,成個菠蘿包咁架,仲有珊瑚㖭!


跨過小山坡,見到小燈塔加夕陽(雖然四點幾,都OK喎),超靚景呀!



頭尾用左一個鐘多D來回呢個山坡,番去淺石路時,竟然。。。。SHIT,有一半路無左呀


船家話最後一班船係5:00pm,仲有35分鐘,除鞋行啦;哇!D細石好“銀”,似行石春路,有D呢又有蠔縠,好明顯有幾野𠝹到啦
我平衡力一向都差,最尾果段水脹得快,過埋小腿,D浪冚過嚟仲會濺濕褲,又要顧住唔跌,因為一跌,相機會玩完,但有幾野真係差D仆;結果行左漫長嘅廿幾分鐘
到西貢落船時,聽到船家同搭客講:而家條路冚左少少,好靚架。。。心諗:又話5:00pm最後,仲接客,真係呃鬼食豆腐


番到屋企,發覺腳底花哂,指公損埋,好彩唔係太深!

又諗:唔行過去,又唔會影到個絕世靚景,早去到又無夕陽啫;如果再去要帶拖鞋穩陣!

預告:相簿聽日出

Tuesday, October 26, 2010

街貓の微表情

夜晚餵完阿妹阿仔,喺橫街見到佢。。。

靜靜攝埋去影相,見佢伸懶腰,即刻連橫快拍,由第一張懶慵慵,第二張驚青,第三張攪笑,到第四張失落,張張精彩呀


喜怒哀樂一秒鐘做哂,叻過好多無線姐仔呀!


話時話,第二張有D似日本D裂口女

Monday, October 25, 2010

廣告時間2

行經7仔,除左見到上次介紹過嘅旅風卷之外,香蕉朱古力心太軟都推出左啦;



見到一個雪櫃有兩個自己嘅設計,都幾開心架;

我自己仲未食,有興趣嘅就買個嚟試下啦

呢排忙嘅job,年尾前會陸續出哂嚟,緊張呀~

Sunday, October 24, 2010

手信與中獎

打開信箱,有包裹呀有包裹,地址化哂,差D唔使我用PS blur佢,好彩背後仲有一個無化嘅地址,唔係就實收唔到囉~

原來係blog友咖啡仔從隔肋底(canada)寄嚟日本手信一份,啱哂我口味,正呀),信入面仲話出年嚟香港請我食小便飯,真係知我口味喎!

多謝,vince


-------------
blog友敖嘉茄”ogake“(呢排敖嘉年上位呀,轉過個譯音),日本番來幾個月,大家都忙爆,終於搵晚佢放學,急急送上手信一份,我又比上次win番嚟嘅狗糧佢。。。。

手信係雞蛋糕同電話繩,話似我喎,超~

多謝,ogake

﹣﹣﹣﹣﹣﹣﹣﹣﹣﹣﹣﹣

兩個月前,有朋友電話同我講(收得唔清),pilot圓C忽有影相遊戲呀(下,圓屎忽?),點影呀?
原來係原子筆,影到的士車頂pilot嘅廣告牌upload番上網站就有獎,easy 執,早兩日開郵箱見到獎品,又幾滑喎;喺citysuper見到賣$12一枝架原來~


有人恨贏呢個YSL manifesto袋,但永遠都係咁,唔恨果個就贏到,呵呵呵!

Saturday, October 23, 2010

雜談

近兩個禮拜工作爆哂,成年未試過,日日都做到點幾,有兩日更加係除左瞓同食,就大部份時間坐喺度做做做,有一日夜晚臨瞓至發覺原來果日無沖涼洗頭;但最困身果一份job第一回合已完,可以好好地過一個weekend。。。。

星期五(即係今日),阿仔阿妹主人又遠行,都算識揀日子,我啱啱有得抖氣,個風又吹唔正;睇下阿仔幾精靈,阿妹嘅坐姿幾咁淑女



工作忙啫,其實大部份都係坐喺電腦旁,而D file極大,save呀upload呀可能需時半個鐘,點放鬆自己呢?問人借左隻wii game嚟玩下;
當年廣州返工跟同事打golf覺得no feel,但教練教嘅用呢度又真係得喎,上左癮,每日都玩一陣;保齡呢,因為打開直線球,打真嘅時候全中其實有難度,所以訓練到補波9成一定中,呢個game,有得剩玩補波,啱哂,差兩條爆機,睇住嚟,爆硬!



最後,雖然每集睇得DD,義海豪情。。。好睇

Friday, October 22, 2010

觀塘海濱公園 ﹣ 相集

景靚,點影都靚啦!

1.攝影情侶 ﹣ 原來觀塘日落咁靚,加埋對情侶做下前景,good


2.塔樓地標 ﹣ 呢個塔樓令到個環境modern左好多,有D似置身日本六本木feel呀


3.網中樹 ﹣ 始終呢樹最大賣點係日落,隔住個網影樹嘅剪影


3.樹。剪影 ﹣ 一橋兩賣,用左右樹影平衡畫面,襯托醉人黃昏


4.城市剪影 ﹣ 影左6,7張,一味un D,un D,再un D,結果顏色越嚟越濃


5.綠襯啡 ﹣ 平時襯衫就做得多,影相都OK喎


6.垃圾 ﹣ 垃圾都可以係主角,勁呀!


7.無題 ﹣ 見架巴士行過,即襟,又OK喎


﹣﹣﹣﹣﹣﹣﹣
投票啦!唔係投相,係去國際小姐網站投miss macau mandy ye一票,多謝幫忙,thanks

Thursday, October 21, 2010

新hea點﹣觀塘海濱公園

行完APM,四點幾,無野做,行去海傍hea下兼影下相,發現一個靚公園。。。觀塘海濱公園

啱啱開始黃昏,泛金嘅海濱靚絕呀!咁靚嘅景,遊人會做乜呢?有人影下相。。。


有人打車輪。日光日白都咁,搵次夜晚嚟𥄫下野先!


有細路玩小型攀石,仲有一家大細一齊玩搖搖板。(而家D搖搖板進化成咁嘅樣喎)


仲有個地標﹣塔樓,夜晚會隨住音樂轉色,好型仔


廣場仲會噴霧水,D細佬玩到癲哂兼濕身


後記:返屋企上網摷資料,原來呢處係龍友影黃昏嘅推介景點;而我矇查查摸到嚟,D相都幾得。。。

預告:D靚相留番聽日至出

精選香港遊推介:
隱灘﹣烏溪沙海星灣
塔門。。。尋找香港絕世美景
飛機維修區
白泥﹣滿腳泥濘的攝影旅程
白泥相簿﹣滿腳泥濘的攝影旅程
鹽田梓半day遊
鹽田梓-番外篇
暴風女神。。。汀九麗都灣
香港十大靚景。。。河背浮島
河背。水塘美景靈氣遊
橋咀島遇險全紀錄
橋咀島﹣相簿
米埔*遊
米埔*遊。。。相簿
流水響。。。乾塘
獅子會自然教育中心
獅子會自然教育中心-相簿(愛藏版)
寧靜漁村﹣三門仔/陰陽路﹣馬屎洲
牛の近距離接觸
大埔汀角遊
大埔汀角遊下集のF檔案
東平洲生態一日遊
東平洲相簿
香港仔水塘
道風山遊記
馬坑公園。廢談
我在堆填區的日子

Wednesday, October 20, 2010

十月功課﹣請勿㩦犬入內

九月交左份A-Z,十月玩乜呢?。。。。請勿㩦犬入內

康文署管轄嘅公園,好多都唔比狗入,入口會有個icon,通常都係一隻狗加圓圈加一斜,但大家有無注意到原來隻隻狗係唔同樣架呢?



有大狗狼狗金毛約瑟爹利八歌有人拖有狗帶紅底白白底紅彩色黑白卡通嘅應有盡有,而家哂冷比你睇。。。。


最得意我揀左呢三張。。。

1.攝於大圍顯徑,卡娃兒到吖,設計果個應該係愛狗之人



2.攝於北角海旁,呢條banner,出齊四種狗,大中細齊哂,無得博幪話:”個圖唔比大狗入咋嘛,我以為細狗得喎“


3.攝於西九空地,本來無特別,比人痴左隻得得B,成件事即刻正左好多


十一月功課進度甚慢,危呀~

Tuesday, October 19, 2010

白鷺*起飛

唔知係咪香港保育做多左,成日都會見到白鷺

天水圍見到,米埔見到,西貢都見到,但揸住枝20mm鏡,嘥氣啦,點影吖!(我已決定買番枝長鏡,有乜好介紹?)



去數碼港,見有時間剩,去海邊行下,見到兩隻白鷺,靜靜地行近其中一隻,行到好近,見佢一飛即用連環快拍影低,番嚟再用photoshop駁番埋

呢張,我鍾意呀!



有時,影到張靚相,真係可以開心一日架!
Related Posts Plugin for WordPress, Blogger...