Friday, April 30, 2010

阿叔整餅

鍾意食克戟,以前家姐間中會整嚟食,而家唯有自己嚟;睇食譜原來粉都四隻,去百佳買啦,突然見到原來有現成嘅,開水就得,都係十幾蚊,卜鎚!
開水攪攪下就得,真係好方便,記得以前有秘訣係加啤酒,加左1/3杯落D粉漿再攪勻;
另外仲有一招,說明書敎你用Pan煎,我用飯煲,一按掣,5分鐘,靚靚克戟就攪掂


加牛油練奶,食得,好味到你估唔到!


又寫blog又識整hotcake,唔該叫我才子吖!


Thursday, April 29, 2010

本週重點推介﹣快獸芝加哥公幹事件簿

上星期,家姐要去芝加哥開會。。。

我:喂!買手信呀

姊:喂!我地喺酒店開會,未必有私人時間架,同埋美國有乜買先

我:咁呀,去完比D美金嚟啦

姊:痴線

我:呀!帶唔帶相機?帶快獸去影相啦,當手信啦

姊,帶電話咋,不過影到相嘅

我:啦!要見到係chicago架。。。

好,一星期後,番嚟啦,睇下快獸D相,順便睇下我家姐影相嘅功力

呢張佢想表達快獸坐business class喎,車,好叻咩

佢下屬見佢影快獸。。。

下屬:乜你都做D咁嘅野?

姊:幫細佬咋,唔係我呀(幾咁驚影響佢專業嘅形像呀)

下屬:你細佬好細架?

姊:細我兩年

下屬:。。。。。。


酒店窗景,出面係芝加哥河喎,代表芝加哥架囉喎


都唔知佢想影乜


呢張係酒店大堂影出去,快獸say hi喎


say 完hi,快獸欣賞風景(咁都得?)

酒店附近嘅敎堂


呢張可以睇到佢影相有幾叻


回程影架喎,佢以為影左相呀陰公


ps:我都未去過芝加哥呀,呢舖快獸贏哂啦!

Wednesday, April 28, 2010

出貓。。。寫真

平時影埋影埋,夠出一篇貓寫真。。。先睇一號佳麗

一號佳麗﹣(港島南嘅碼頭邊,高竇貓嚟架)


二號佳麗﹣(灣仔峽公園,見人就走埋嚟,痴身呀)


三號佳麗﹣(西環街市,幫手看檔架)


四號佳麗﹣(西環我屋樓下檔茶餐廳,係茶餐廳隻招財貓)


五號佳麗﹣(上環爛瞓豬)


六號佳麗﹣(灣仔峽道野貓,上山時見到,有好心阿姐餵緊佢地,警戒心好強)


七號佳麗﹣(同六號同一竇,但瘦得好陰公)


八號佳麗﹣(大澳鄉下仔)


九號佳麗﹣(都係大澳鄉下仔,我好鍾意呢張囉)


今日問題:邊隻貓你最鍾意呢?

Tuesday, April 27, 2010

語病

個案一*老豆約食飯

老豆:阿仔,今晚出嚟食飯啦
我:邊度食?
老豆:八喜
我:八喜喺邊架?
老豆:灣仔
我:灣仔邊度呀?唔識喎
老豆:呢!灣仔果間日本野樓上
我:日本野?
老豆:果間日本名店呀
我:下?
老豆:佳寧娜行番入嚟
我:哦!板長(祥)壽司
老豆:係呀板長(獎)樓上呀(又識糾正我讀獎喎)
我:哇!日本名店呀

﹣﹣﹣﹣﹣﹣﹣﹣﹣﹣
個案二*細個去太白海鮮舫

同阿媽講起原來而家珍寶海鮮舫仲有茶飲,佢又講番D舊事

媽:以前成日去架
我:我記得喎
媽:你果陣呀,好靚仔架
我:。。。。心諗,(而家唔靚咩?,車)
媽:D鬼佬抱左你去龍椅度影相呀,你又怕生“保”,喊哂口咁;鬼佬影完又有日本遊客抱你影相呀,比人輪呀。。。
我:比人輪?唔係吖!

﹣﹣﹣﹣﹣﹣﹣﹣﹣﹣﹣
個案三*都係細個去太白海鮮舫

我:細個生得好樣,比D鬼佬抱左去“龍”椅影相
A先生:做乜要去”輪“椅影相呀?
我:。。。。。。

Monday, April 26, 2010

舊相﹣維也納


*叨下光先;恭喜哂,出爐影帝
*98年舊相
*維也納
*有得去呢個trip,開心到震
*壓力都大到震
*一落機即開工
*晚晚瞓得三粒鐘
*好凍,D雪深到大脾
*成世人最凍就係雪山果日
*做得辛苦,但呢個trip真係好難忘
*日頭太緊張,但夜晚有你帶路餐餐食好野,正
*個牛尾湯,好濃,飲完個胃暖哂
*唔知係凍定係太緊張,瘦左好多,唔見左個腩
*之後個腩未走過
*多謝塞錢入我袋,多謝信任,多謝!

Sunday, April 25, 2010

原來波係咁踢嘅。。。(三級架)

Saturday, April 24, 2010

偶發性週期便秘遲缓症

今日寫乜好呢,便秘喎。。。

搵到D舊相想寫,但要寫好D,未寫完,唔出得

不如報導下我個blog最新資料頂下啦

Follower去到35,但其實讀者好似執哂位,舊果D好多唔見哂lu


噚日觀賞人數又癲,去到382,寫包咋喎,做乜呢?寫食真係多人睇D嘅?


番舊屋摷下床底,仲有一大堆貨賣,儲埋一箱雜誌有/碟/相,寫邊樣先好呢?

Friday, April 23, 2010

小玩意﹣橡筋

以前細個邊有遊戲機玩吖,得閒咪玩手指,執條橡筋都玩一餐,後生過我果班又識唔識玩呢?

今次勁呀,有片。。。


1-6,知唔知我砌嘅係乜野?

Thursday, April 22, 2010

號外呀﹣﹣﹣發哥南丫島植樹

今日睇蘋果。。。如果真係種哂櫻花就好啦,但香港天氣得咩?




周潤發一向重視環保和綠化環境,昨日大清早他專程返南丫島植樹,發哥說:「我哋南丫島村民最近同政府傾緊,睇吓可唔可以起一個公園係由榕樹灣伸展到索罟灣,咁喺公園兩旁就種啲樹嚟綠化環境,今日我哋就試種咗風鈴樹同櫻花,睇吓出年邊隻花開得靚啲,咁以後咪清一色種晒呢種樹,咁呢個公園就會好靚。」
若政府支持興建計劃,發哥相信可以吸引更多遊客,他說:「如果到時二、三百棵櫻花樹或風鈴樹盛開,咁到時個公園會好靚,市民唔使專登飛去日本睇花,嚟南丫島已經有得睇,有咗呢個特色,以後香港又可以多一個旅遊景點,有需要嘅話,我仲可以捐樹出嚟。」

包~包~包~包~

包~添記

呢間專登去架,睇完肥丁推介,我又最愛食法包,一於試下;間舖真係好唔就腳,幾難搵,又真係好細間,得三個位,行慢D都無位坐,其實個包本身好普通,但係即刻焗熱,熱同脆嘅法包真係加好多分,饀用左燻蹄係最特別嘅賣點,我比佢80呀!

睇食評,梗係過隔離啦,可以見到原來已經加左價


包~包~永樂園

呢間喺中環咁出名,嚟過啦啩,包用疑似嘉頓麵包,賣點係個沙律醬,落左芥辣;我比70分!



包~包~包~Threesixty
圓坊嘅foodcourt,麵粉其實佢最靚,但樣樣踭D踭D,個醬蓋過條腸,酸瓜太多水攪到個包入面糊左,我都係比50分咋!


包~包~包~包~丹麥

行街經過,見佢堆左幾個人,間舖又舊到要保育咁,前面兩個女警著住軍裝都幫趁,我又肚餓,即買;但普通過普通喎,條腸仲要係凍肉舖都買到嘅包裝雞肉腸,得40分咋!



我會繼續去搵靚包包架!

Wednesday, April 21, 2010

去圖書館做乜?

大大話話都好多年無去過圖書館,更加未去過中央圖書館

接左個job,要搵D中世紀料,決定去中央圖書館摷摷,諗住扮下文化人。。。

結果,老毛病發作,一入去,聞到陣書除,眼皮就開始重,好眼瞓,行到十分鐘,就急尿,結果,屙完就走人,前後都係三個字,乜都搵唔到。

Tuesday, April 20, 2010

密密廢

爸媽朋友送嚟一盒日本朱古力,細佬搶住要,我見到第一個反應係。。。

食一條香蕉朱古力,出番一條香蕉型嘅朱古力,食兩條香蕉朱古力,出兩條香蕉型嘅朱古力。。。


散光眼我就有,散光足咩嚟架呢?


雅芳庭個妹


呢個先係最廢;我其實懷疑IFC個logo都係陳生嘅設計,如果係,就真係好環保

Monday, April 19, 2010

舊相


*99年舊相一張
*仲係用菲林相機
*箱根
*做野做到超大壓力,加埋東京兩個朋友玩6日,我唔肯走,自己玩夠8日
*果兩日只係食多次咖喱飯,拉麵,牛丼,mos burger,全部係頭6日已經食過
*勁靚溫泉酒店+兩日機動遊戲+shopping,超開心之旅
*入壽司舖,腥到想嘔,頂唔到,要一個人出番去等朋友食完出嚟(呢樣而家進步好多)
*玩當時世界第三高跳樓機,一玩愛上
*睇番相,行新宿都著人字拖,勁



好想好想去旅行。。。

Sunday, April 18, 2010

十隻手指享受它

pizza當年嚟香港時,正係我嘅發育期,我一食就超愛上,可以放學一丁友去食,食一個細薄超級至尊pizza(其實唔細架),一碟香蒜肉絲意,一碗忌廉磨菇湯+蒜蓉包,百事可樂,真係離哂譜。。。

Pizza Hut當年另一賣點,自助沙律鬥攞得多,有D人真係癲架,用生菜圍邊圍到成尺高,有D又跌到通地係;而家好似無左沙律bar啦。。。

年紀越大,身邊嘅朋友就開始唔食pizza hut,有嫌肥有嫌熱氣;今日專登去搵番呢隻回憶味道


星期六lunch時段,仲要係旺角,竟然得幾枱客,侍應生連部長連收銀得四個,仲要係十十地果隻,比個套餐menu嚟,但寫住星期一至五供應,問番佢,佢好似未瞓醒咁,最後原來星期六都供應喎,睇怕都係無生意啦

叫番以前嘅至愛,個pizza細就細D,但百事仲任飲,都係$4x一個餐,pizza hut真係要諗諗計,搵soler唔係好掂呀!用番當年嘅史撈近“十隻手指享受它”,可能仲得呀!

Saturday, April 17, 2010

*玉葉

行過中環,如果得閒,個肚又有位嘅話,我鍾意去玉葉隊碗綠豆沙,行到慶,食碗凍嘅,真係好味到不得了架!



有乜特別?大量臭草,用冰糖,雖然杰但味道好清架!

Friday, April 16, 2010

大家樂vs大快活

兩間快餐店,個樣差唔多,個名差唔多,食物都差唔多,地點呢,通常有A附近就會有間B

我理想嘅早餐係太陽蛋+腸仔+多士+腿通(火腿要切絲)+一杯靚嘅凍檸茶;呢個combo新釗記做得最好,但我呢頭又無新釗記,附近茶餐廳唔係火腿唔切絲,麵包唔轉得多士,就係腿通無啦啦阿茂整餅加左飽魚絲;結果早餐我反而揀大家樂或大快活。。。


大快活呢,太陽蛋就真係一流,但個腿通難食到唔知點形容,話佢腥咩,又唔似魚湯,陣味係噏味;但食辣肉醬麵又無左陣味架喎!仲有就係飲凍綠茶唔駛加錢,總算攞番D分;另外,晚餐嘅咖喱腩同焗豬都好味過大家樂,打邊爐就唔得,主要又係魚湯,攪到間舖好腥


大家樂呢,早餐樣樣都係一般咋,勝在平均啦,但係入左會,食夠5餐有coupon,都係吸引點嚟嘅;晚飯呢,個打邊爐就係真好啱我啦,有剩牛,又有牛加豬,正呀!燒臘亦都好味過大快活


仲有一個奇怪現象係大家樂出現多D嘅,就係早餐時段已經變左師奶雜散地,佢地凑完個仔,孫,老公返公返學後就會聚埋一齊

睇下睇下,左面一堆


右面又一堆


後面又一堆


佢地好勤力,坐足幾個鐘,日日如事,邊有咁多野傾架呢?

仲有呀,佢地醒呀,嗌個早餐加通粉攞多杯水,兩個人分,嘆冷氣講是非坐足幾個鐘再攞滾水沖奶比B女;學柴九話齋,原來佢地唔係一味慳,今日又賺左$12.3


越講越興奮,離哂題;其實想問大家呢兩間去邊間多D?(唔好答我翠華美心太興呀下)

Thursday, April 15, 2010

好Q悶﹣東張西望

唔係講笑,東張西望而家真係悶到嘔屎,可唔可以叫無線摺左佢呀

頭三個字講娛樂已經唔係做得好,後三個字講社會新聞直頭同星期X檔案一樣咁悶;

主持自從由全男班變全女班後,成班女好似讀稿咁,嘉欣同倩揚都仲叫賣下靚樣吖,呢件又娘又醜,鼻哥窿向天,調去“快樂長門人”吖,唔該!


鐵馬尋橋都好Q悶,唔識打果班就響度打,識打嘅就唔打

搜下留情都好Q悶,陳慧珊甩色甩到

Janet Bin唔該快D嚟

Wednesday, April 14, 2010

床底寶箱之史前 海報

我又執下牀底,又有好野介紹啦。。。

話說do姐係我兒時偶像之一,呢張係明周嘅中間大頁poster;都幾靚架!



而家睇番,最精彩係背面篇專訪,可惜只有半篇;入面講到整容,同甘生買樓,同陳秀珠同居,同當時正飾演鍾無艷(即係邊年呢?),
有興趣click大嚟睇啦。。。



另外,bonus係司琪姐賣厠紙,個”史撈近“會唔會係:屙完屎,用熊貓衛生紙呢?“

Tuesday, April 13, 2010

怨氣

有一晚,搭小巴由旺角返西環,背後有一個婆婆同公公,車程廿分鐘,阿婆闇闇噚噚講足咁耐,怨氣甚重,原來佢之前要住醫院,差D死喎;睇下佢講乜...

婆:有個女人呀,65歲咋,咁就死左,捱足成世,剩係星加玻都有一億身家,咁後生就死,幾唔抵呀!
公:好多人都唔抵架啦,張國榮仲後生啦
婆:佢鬼上身呀
公:咁梅艷芳呢?
婆:唔好話我黑心,佢有得醫又唔去醫,話要生仔喎:
公:狄娜呢?有去醫啦
婆:佢醫得遲呀
公:呢個又醫得遲,咁尹志強發現得早啦啩?
婆:佢食煙,抵佢死架!
公:你又知佢食煙?
婆:鼻咽癌呀!梗係食煙啦!
公:鼻嗯癌唔一定食煙架
.........
婆:搬左之後好唔方便,以前樓下有百佳,大家樂,大快活,而家無哂啦
公:點會無呀?呢度行過去咪大家樂囉。。。。。。你搬左一個街口咋喎!

...........
唉!見阿婆落車行得好好吖,做人咁大怨氣做乜?

﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣
後記:好怕人怨氣大,好似人人都錯,得佢啱咁,又或者覺得個世界欠左佢,事事攞嚟同人比較,眉頭長皺可以夾死烏蠅;

朋友唔開心,我會發揮小宇宙去化解佢嘅負能量,但係都遇過有人嘅負能量竟然可以冚過我嘅小宇宙,攪到自己都煩埋;

我唯一可以做嘅。。。避之則吉呀!

Monday, April 12, 2010

翡翠拉麵小籠包

極之鍾意食小籠包,除左皮薄有肉汁外,最重要最重要係無加D古靈精怪野,如蟹粉;


約朋友weekday2:00pm先去ifc食,貪佢少人;食埋酸辣湯同上海咸肉炒菜飯,睇相都知幾好味啦

Sunday, April 11, 2010

舊嘅唔去

屋企騎樓超大風,呢幾日更加大到好似打風,我諗我可以喺騎樓放紙鳶;放喺出面嘅掃把當然吹冧啦。。。。

咁我又啱啱瞓醒,未帶眼鏡,出騎樓一腳就踏爛左佢,唉!真係舊嘅唔去


新嘅唔嚟啦呢次

Saturday, April 10, 2010

阿叔靚湯

一丁友,煲湯當埋晚飯,乾手淨腳

雪耳粟米豬𦟌湯


蕃茄一個
粟米一條
雪耳一大盞(先用開水浸發一小時)
冬菇兩隻(先用開水浸發一小時)
豬𦟌一大舊 (先出水)
白菜仔小量

水滾將全部料(白菜除外)掉哂落去煲兩粒鐘,白菜煲半個鐘就夠,加鹽,攪掂

大量纖維加水份,又有膠質,食完output都壯觀D

Friday, April 9, 2010

又玩完

自從無玩scrabble後,12/3開始玩social city,由完全唔識玩到而家玩到level 28,差唔多玩完;

要起嘅都起哂,賭場/警局/消防局/電台/報館/泳池,同我最愛嘅保齡球場都齊全,都係時候嚟個了結lu...

最好玩係可以將D屋搬嚟搬去,我覺得呢Naruto City好靚啊!



轉玩scramble,接招!
Related Posts Plugin for WordPress, Blogger...