Sunday, January 31, 2010

近期嘅工作關係,日日都對住呢兩個logo,好悶

謎面:佢地加埋,猜一個新地標


(咁淺,應該唔駛開估)

Saturday, January 30, 2010

我的灰膠鞋

原來咁多人抗拒crocs,鞋頭有洞果隻真係幾醜,但灰色密頭呢對其實幾易著,扮呆仔一流,雖然唔扮都呆

唔摷尤自可,一摷原來有三對灰膠鞋,證明我幾咁愛著灰色呢!


Friday, January 29, 2010

按腳。。。

明明係健康活動按按腳,點解食飯會變飲酒,仲越飲越多。。。

唉吔!


好味


呢個都好味,食pizza飲一流,飲左兩枝加一杯hoegaarden+一細杯紅酒。。。喂!到頂啦


我都係鍾意隨處掉花生榖多D


Thursday, January 28, 2010

影模

下晝偷左兩個鐘,出去試機。。。

地點係避風塘,模係一班貓,見人就走,又名躲貓貓;而家睇下第一批”口靚“模嘅表現先












Wednesday, January 27, 2010

太認真

有時都同自己講,玩啫?駛唔駛咁認真,但D對手真係強嘛,唔做功課,的dur勝算都無。。。講嘅係scrabble


大家樂見到呢版字,即刻化成3,4,8,2呀,影低番屋企填埋分數;呢排已經做到唔夠瞓架啦。。。

可能我真係癲嘅!

Tuesday, January 26, 2010

而家至睇阿凡達+出開街梗係試埋機啦

星期日都做到唔停手,為嘅就係因為卜左星期一去megabox睇阿凡達,咁遲至睇,一呢係等埋朋友,二呢,我其實麻麻地睇阿占士D戲,“跌落嚟”都無喺戲院睇,原因係覺得肥溫太肥,無興趣;之後明珠台做,睇左半套,真係唔啱我睇囉!



今次身邊個個朋友大讚,我又係覺得藍BB唔吸引囉,咁又話大突破,都係睇下啦。。。

睇左半個鐘。。。喂,我真頭暈喎;要除眼鏡抖抖

一個鐘。。。唔暈,但眼痕;同覺得悶;(啦啦啦,前三行有人瞓左)

個半鐘。。。我都想瞓,乜過得咁慢(喂,快D打場勁架啦,dump波鐘)

兩個鐘。。。好番D

兩個半鐘。。。死,急尿,又無帶麵包,食D索番D水都好吖

接近三粒鐘。。。完場,起身行唔到,連續兩腳都踩到人,暈喎

總結:造型醜樣,唔啱我睇

。。。。。。。。。。。。
好,試機,(全部原色)














detail好出,但色比起舊機實好多,灰位太多,太真啦;
睇嚟都要set過條curve

Monday, January 25, 2010

號外呀!號外呀!

新鮮

噚日講到行百老匯,為乜呢?就係為買相機,呢兩個星期一路都留意三部機。。。Panasonic GF1/Olympus EP2/Panasonic LX3

用開LX1,用左幾年,用得好開心,直頭我想影乜,佢就影到出嚟,人機合一,但始終舊左,夜晚相更加係John(弱項),心思思想轉過部。。。

Panasonic LX3﹣一定最易pick up,但已經出左年半

Olympus EP2﹣好靚仔,仲平D,差一些共諧連理

Panasonic GF1-一路係首選,但佢之前白色無貨,買兩枝鏡驚佢重,得枝20mm餅鏡驚唔夠用;但真係貪佢繼續係Panasonic,貪佢D色會鮮D,貪佢白色,貪佢靚仔,貪佢有閃光燈,貪佢有1.7光圈,前清後矇得心應手

最後卜鎚



試張先。。。



呢D小便宜因素都加促我卜鎚。。。

1/時代廣場用$10可以換City Super$50現金卷(換到三張),咁點解有四張呢?


仲有得玩現場遊戲攞戲飛。遊戲?我強項,當然無甩拖


見咁易,去埋”屈人寺“買鯊魚丸,又嚟過,所有再多一張City Super$50現金卷,又多兩張戲飛;咦!變左第二套,仲好!hehe


Sunday, January 24, 2010

結合*淘汰

結合,唔係講鐵甲萬能俠同朋友號,而係講行百老匯見到D電話鬼咁多功能,將電話/收音機/MP3/相機/遊戲機/電腦,甚至乎鏡都全部結合;諗起以前袋住walkman/discman,call機,電話,成袋野,而家真係輕便好多;但即係話好多野被淘汰,正如我做設計一樣。。。

初出道時做"口靚",上司剩係諗橋,我咪做稿囉,有植字員,執相嘅同事,出菲林打稿嘅同事;慢慢,自己升職,但繼續要做埋稿喎,到早十多年,植字員都消失,自己要打埋字,執埋相;而家,分色打稿全一腳踢;以前”跟“影相,而家D客問點解唔自己影埋。。。

咁多工種結合一齊,本來做緊植字,執相,出菲林嘅,而家做緊乜呢?我慶幸唔係被淘汰嘅一群。。。

未完...

Saturday, January 23, 2010

見到PACO

幾日前嘅事啦。。。

時間:星期日早晨

地點:香港西區某茶餐廳

人物:PACO,收銀員,我

打波前無野落肚點有力,咪去茶餐廳買個腿蛋治外賣囉,呆等期間,見到PACO自己一枝公食早餐,跟住就開始亂諗野。。。

*啊!噚晚勁歌已經唔關佢事,所以晨咁早喺度食早餐

*乜真係著黑皮褸,同上鏡一樣,究竟佢有幾多件黑皮褸?

*走埋去問佢簽唔簽我都好喎

*有個死仔send SMS嚟話佢甩底打唔到波(係呀,呢句唔關paco事)

*佢食完去比錢時,收銀會唔會講:多謝PACO呢?(我真係等到佢比錢架,但收銀無講,好失望)

最後睇住佢往中環方向走左啦

Friday, January 22, 2010

火併放題(兩小時限定)

朋友生日,揀左漢口道”麻布茶房“食放題

(圖中嘅三文魚當然唔係我食架啦,話沙B我就吼)


兩個人食左乜,哂冷,自已睇。。。


大部份炸物都太油,又唔包雪糕同飲品,服務仲唔得㖭!呢餐我都係一般啫。。。唔知駛唔駛蝕呢?

Thursday, January 21, 2010

我知.我無聊

Wednesday, January 20, 2010

係時候浸水仙啦

有無試過自己開水仙頭呀?其實好簡單又好玩,睇住佢大,估佢會唔會初一開花,都係一種樂趣嚟架

越平越易開,因為入面花菖少D,無咁易割傷佢,呢個叫靚野,$18一個,入面脹卜卜,斷估都有六七枝菖

先去外面枯衣,塘泥全部掉走,開前用手襟,搵出較“林”地方,代表無菖,可以一刀割入去;呢個實在難開,到處都係菖,由頂割落底至剩2cm,盡量割深D

之後浸水廿四小時,浸走D潺,就可將底部鋪上棉花,放進水仙盆,幾日後,見葉開始飈高加矮仔粉,放在太陽照射到嘅地方就完成啦!



我想挑戰蟹爪囉!

Tuesday, January 19, 2010

怪談

呢幾日出街都遇到D怪位。。。

1/去Amaroni's,waitress嗌佢男同事係咁嗌嘅:BB,31號枱要水呀!/BB,執左D枱先啦,究竟個waiter個名真係叫BB吖?定係原來係情侶做埋同一間餐廳呢?諗起都sweetsweet呀!

2/去沙田行街,入左一間服裝店,個sales嗌:welcome to哨牙?以為聽錯啫,佢又嗌第二次;下?哨牙?我都好哨啦喎,唔駛welcome我啦。。。間舖係zara呀,D咩野發音嚟架?

3/同朋友去圓方睇福爾摩斯,張櫈會跟住部戲嘅槍聲,爆炸同打架而震動;完場問朋友感覺,佢答:好好瞓

4/旺角搭紅van返西環,一個年青少婦拎住一架摺左嘅大型BB車,加一個約兩歲小女孩上車,

跟住問:細路幾多歲先要比錢呀?(哇,幾驚佢比司機鬧呀?)

司機答:我地唔係巴士呀?你坐幾多個位就比幾多個位嘅錢啦

到總站落車,司機竟然同我講:先生,你幫下呢位小姐搬架車落去啦,佢得一個人(咁我當然即幫啦)

怪。。。係個女人好地道,無理由會唔知細路坐位都要比錢
更怪。。。我搭咁耐紅van第一次遇到咁好聲氣,禮貌嘅司機囉!

Monday, January 18, 2010

由九龍塘食到九龍城

去又一城,見到Amaroni's little italy有下午茶餐,$53有交易,即試。。。

哇!裝修幾靚呀,又好坐喎,正


嗌左沙律加湯餐,湯就真係好味,但沙律D菜苦喎,朋友個沙律雞卷嘅評語係難食


隔左一個鐘,已經又肚餓,要上foodcourt食雞肶

跟住行九龍城,試呢間。。。叫左牛肉餅,担担麵,小籠包


牛肉餅超肥,小籠包都係豬肉好食D,牛肉唔夾,担担麵麵質竟然似日式拉麵,朋友食到黑面,問我點解唔影相,我話值得影咩?

佢話:你可以寫。。。。十大難食唔會番食食館

Sunday, January 17, 2010

大大大手信

除意粉外,位位初次見面;你地去旅行,竟然買咁多野比我,番屋企拆開,真係嚇一驚呀,仲驚過林峰擺獎呀!我受之有愧呀!

意粉:你個福袋入面多成咁,真係唔出街都唔會餓死,但包米點煮架?唔駛洗米架?我下次去北京喎!係唔係要捧隻填鴨番嚟呢?


Ellen老師:你袋仲誇,暖包夠哂貼心,多謝!嗚門公仔正,鼻屎太大,塞唔落,豬頭蕃薯已食,正呀!


大頭:無可否認,呢份係買中左架,多謝,我隻大馬有伴啦!旋



MayMay:你又唔係去旅行,都有手信嘅?多謝著泳衣出席呀!


ps:個人蔘雞湯太補,喉嚨即kwok

Saturday, January 16, 2010

鼻屎

行裕華見到,即買。。。

好有功效架﹣健脾、化痰又止嘔,所以咪睇小一粒鼻屎呀!

無理由無食過掛?都有拎嚟扮鼻屎掛?不過我記得我細個真係塞落個鼻度噴番出嚟,結果比阿爺鬧





阿爺好錫我架,我好掛住阿爺。。。

Friday, January 15, 2010

EQ低到連客都鬧

踏入2010,工作量突然大增,以我咁快手快腳,本來同時間應付幾個job都無問題,但今次衰左。。。

惹我發火嘅係我嘅一個舊同事,以前佢係一個兼職嘅記者妹,做事sa li lung chung,跟住去忽周兼報紙寫飲食專欄越做越上位,跟住自己出嚟攪公關公司,以為而家做野OK 啦掛。。。

噚晚我去唱K,10:00pm電話打嚟,正唱得興起架嘛;話佢個客改idea,話要即做,星期一要印起,呢樣果樣講一大堆嘅同時,我話:你將D資料send mail比我啦,而家我出左去,我番去會跟。。。

番到屋企,小小野拆開5次mail send嚟,擺明亂send廿四;

其中一個寫。。。(-- Best Regards)係呀!外星密碼呀,得兩劃咋!


另一個。。。(請DOWNLOAD 左D 相先,我個FTP爆啦)喂!無link無sing,仲有down嚟做乜job先得架?最急果個?我幫你跟緊6個job喎?

到今日佢打嚟問我down左未?我話上面D相我早兩日down過啦喎,你有新野咩?佢話:咩呀,噚晚半夜果D喎,aiya,我都唔記得啦!

我開始惡話:你無比新link我喎,我down邊個file呀?做邊份job架?

佢:我都唔知啦,你去XXX folder個file down啦!

我EQ斷線:點down呀?你又唔比link,我入唔到你其他位摷你D野架?又唔知down嚟做邊份job,我點跟呀?又要急。。。

佢細細聲話:我organize好再send mail比你啦

拎10分鐘寫哂出嚟,今晚仲要開工呀!無得瞓呀!

Thursday, January 14, 2010

預訂

原來”情人“都有得“預訂”,可以訂多過一個架,睇下。。。LOVER"S",眾數嚟架!

邊個要?果D嗌dry嗌寂寞嘅,快D去DYMOCKS啦,


Wednesday, January 13, 2010

北京。。。

去北京前,先去我喜愛飯堂之一“北京酒樓”熱身先

地址喺佐敦,門口唔顯眼,一出地鐵見到呢個招牌就係啦!


沿住樓梯上二樓就係,但係艷桃花都寫住喺二樓喎!咁七不思議嘅?(圖中有人行上艷桃花,唔知係唔係返工呢?)


走廊呢個牌,應該都幾十年無郁過,好想買左佢放喺屋企飯廳


睇下D器皿。。。件件似古董,最久違嘅係袋膠入住濕毛巾


上篇比人話我無聊,今篇繼續,所以呢篇重點唔係講食物質數架,係講毛巾筷子套;食物,睇相算啦!

Tuesday, January 12, 2010

舊旅行相

好耐無去旅行,睇下舊相,呃自己去緊旅行

搵到D當年畢業後同成班同學去桂林嘅相,我因為哂多左幾份,決定做D好野送比佢地。。。

就係做剪貼啦,呢張其他人見到好開心,當事人就爆粗(題外話:相中人娶左泰國太太,而家長居泰國,佢就好啦,日日暖笠笠)


有男版梗有女版,最右邊嘅移民後失踪,見字請call我;多倫多果位,如果街頭見到有女子對眼有條黑線,叫佢call我


呢兩個比我硬砌生豬肉屈佢地有野,暗地影荷包相


呢三個痴痴呆呆,坐埋同一隻船


最後呢個,其實無去到,但都化身尼C湖水怪


Related Posts Plugin for WordPress, Blogger...