Tuesday, June 30, 2009

笑話

1/ 去7仔買野,前面個阿婆從手袋攞出一個吉salem light煙包,
跟住話:要一包
年青男青衣(trainee)從後取出一包Salem Light,
阿婆發惡:都唔同嘅,專登拎個煙包嚟架啦!
男青衣的女同事好直咁問:阿婆你要爛腳呀?
男青衣補多句:其實一樣架喎,得張相唔同;
阿婆:啊!一樣架,跟住比錢走人

咁如果下次張相係乳癌,咁女同事唔通話:阿婆你要乳癌呀?定係佢以為除左有人儲小丸子,仲有人儲煙盒D相呢?


2/呢牌搭多左電車,見到呢單料。。。

我拎好多野,企左喺車尾,見個C拉開住把遮就咁“中“上車,咁梗係上唔到啦!佢想關遮但又關唔到,擾攘左十秒,最後攞住把只係關左DD嘅遮上車,坐電車擔遮,我諗起小芙蓉;

我望住佢係咁笑,真失禮

3/巴士上,一個妙齡少女上樓上,一坐低即發揮香港女性特式,即打電話,仲要係大聲啦當然;
講左幾分鐘,聽到佢話:我而家喺巴士,去到水街。。。
吓?你喺邊呀?近樓梯?

見佢向前行,原來佢個電話friend喺同一架巴士到。

拍戲都無咁巧合啦

仲要原來巴士上兩個噪音機係識嘅!

4/最後一單關於我姑丈姑姐。。。
姑丈退休前係政府高官,姑姐係名校副校長,年頭都退埋休;最近佢地個賓賓走左,呢牌無賓賓用;
姑丈話:今日我負責洗地洗厠所,你就洗衫洗碗啦!

幾個鐘頭後,姑長問姑姐進度;
姑姐:洗左白色衫,曬好,準備洗顔色衫,跟住洗碗
姑丈:咁我幫你放D顔色衫入機,落埋梘粉啦
姑姐大叫:乜要落梘粉架咩?

呢個姑姐真係幾十年都無洗過衫呀!勁
﹣﹣﹣﹣﹣﹣﹣﹣﹣
第二日,表妹問姑丈:點解D衫有陣厠所味嘅?
姑丈醒起原來佢用“沙粉“洗地,洗極都好多泡,佢用條“地布“去抺D泡,但又將條地布掉入洗衣機同D衫一齊洗,所以D衫成噚厠所味!


快D請番個賓賓啦!呢家人好危險呀!

Monday, June 29, 2009

西環snapshots。。。

星期日晚上,第一晚過新居瞓,因為今朝一早要趕JOB;

開左窗瞓,今早突然聽到電車開行嘅聲;記得小時候都係住西環同一條街,早上都係聽到電車聲,好有親切感!


工作比預期順利,十二點已攪掂第一part,見好天,落街影下相;


見碼頭有兩父女釣魚,釣到哨牙妹,埋去影,點知地下有青苔,跌低;
起身行無兩步,一個浪冚過嚟,濕左半邊身;


第一次西環攝影之旅只得十分鐘,提早結束!

Saturday, June 27, 2009

日與夜

新居騎樓景觀

投訴

一個月前打電話約定netvigator星期四11:00am-2:00pm將寬頻搬往新居,到1:20pm都無影,打電話去問,對答如下:

我:我約左今日搬寬頻,但未到,想check下幾時到

C小姐:睇紀錄無你呢個order喎!有無人re-confirm你呀!

我:吓!我點知confirm完仲要re-confirm架

C小姐:咁邊個同事同你做架?

我:我點會記得你地邊個同事聽電話呀?


C小姐:我地每個一聽電話都會講自己個名嘅!

我:你自己會唔買野記住個sales名呀?點會專登記住你個名吖。。。咁你而家幾時裝番呀?

C小姐:無哂時間喎,要下星期

我發火:你同事要我今日搬個電腦過嚟,仲提我帶埋架寬頻盒,點都係你公司問題吖,你今日嚟唔到,聽日都好嚟啦,仲要下星期!

C小姐:做到我幫你做格,無位嘛,咁點啫?

我發火:唔該駁去投訴部

C小姐:我係做埋投訴架

我發火:我唔要同你講,你轉比其他同事

C小姐:咁你要打過啦!我地無飛線架

我發火:你叫咩野名?

C小姐:我叫CXXXXX Chan

﹣﹣﹣﹣﹣﹣﹣﹣﹣﹣﹣﹣﹣﹣﹣﹣

我再打,第二個同事即時做到星期六安裝。

之後再打,投訴呢位姓陳嘅八婆,接電話嘅同事話會跟同比個回覆我,都唔記望佢地會認真處理投訴,但都等緊佢比個咩野回覆我!

嬲爆!

Friday, June 26, 2009

傢俬來了,搬屋還會遠嗎?

訂左嘅傢俬陸續送嚟!因為層樓over budget,所以傢俬都要慳住買,最後分別去左最正路嗰三間傢俬中心攪掂。。。

買得最多始終係“姨媽傢俬“,個款後生D,無咁娘;

呢堆野咁就皮幾野(唔計梳化),肉痛呀!


衣櫃係最後卜鎚嘅一件,一裝好間房即刻細哂!


其他“姨媽傢俬“因為慳錢會自己裝,但書枱已有小意外,不過救到!


張飯枱來自“食蕉中心“,優點係細(無相)

梳他同床,床褥係“實吠“,張梳化算係最早揀定嘅一件


仲欠燈,電視,新電腦,工作椅,但已過兩皮,暈!

已經住得,下星期約搬屋公司

Wednesday, June 24, 2009

好爛口

家姐推介:



真係好輪粗口,搵啱代言人!

Monday, June 22, 2009

今次到我條X

噚日又係打波日,日頭比心機清左Djob,但下晝開始頭痛,但食左晚飯又無事喎!
但打完波,條頸開始“且“住“且“住,起身變左類似瞓“矮“頸,而家打字都唔拎得條頸。。。

經驗話我知係D火上左頸,咁好火梗係易發脾氣啦!

一陣要落去隊杯廿四味啦!

唔病得架,聽日同星期四要等及砌傢俬,星期三同五就係工作嘅deadline,點都要撐!

Saturday, June 20, 2009

我諗。。。我要靜心

近日神不守舍。。。

今日本來諗住屋企做野兼執野,突接通知去“鄧“腳,第一舖已經小相公,跟住仲有三舖叫錯死"胡",最後只係輸少少,執身彩!



早幾日,上左巴士應要在西隧口轉車,諗野竟然無落車,又side一粒鐘

做稿,有個日期要改,個客寫27/6,我竟然打左27月6日,不可原諒,好醜!

隔個星期卜羽毛球場,今朝竟然無左件事,夜晚至發覺,番到屋企,本來個場當然無,最後take左另一個場,總叫補到"獲"

下星期勁忙,幾個job加搬寬頻+等傢俬,一定要醒醒定定!

Friday, June 19, 2009

雜崩冷

*我做乜都要有schedule,一break個schedule就會精神緊張,呢個禮拜因為D傢俬/工作問題,day day發脾氣;我同自己講,聽日一定唔可以再發

*天氣已踏入全年最舒服嘅溫度,但因忙於搬屋,今年只係喺兩個月前曬過一次,而家仍然白雪雪,激氣!

*呢個係新居最初構思,但跟住一路變,白嘅少左,反而越嚟越黑


*又想變咁樣,但白傢俬難打理,唯有攞個中間位


*今日去宜家訂埋最後幾件傢俬,總算大部份攪掂,只欠燈,電視同工作間張椅,仲有一啲DIY嘅物體!

*傢俬送貨約好,搬寬頻約好,全部下星期;固網亦約好,要七月頭,搬屋公司報左價,攪掂,食burger king自己慶祝下先;應該六月尾正式郁身!

Thursday, June 18, 2009

噪(闇)男

加左門部係因為講粗口鬧佢,一入嚟就開始non-stop咁呱呱叫,講幾句就嚟一野大大聲笑,連佢D朋友都SHU佢,但佢依然發癲;
以為佢講咩咁好笑,聽到其中一段:有個大陸人買電視機要電視框,原來要discount,哈哈哈。。。
嘩!時光倒流呀?


近年想食餐安靜少少嘅飯真係可遇不可求,點解香港變左咁嘈嘅?
我又發現,通常嘈嘅人外型都係呢類質素,我覺得佢地已經放棄,所以攪成咁,橫掂都已經係咁,就更加唔駛理其他人啦!
但有兩個朋友分別覺得,就係佢地已經咁,所以先要draw attention,唔係咁,你都唔望佢啦!

真係咁?

Wednesday, June 17, 2009

金雀餐廳﹣Lam Lam脷

好耐無去銅鑼灣金雀,我鍾情呢一類港式西餐,即係豉油牛扒;

佢個餐好多野食,頭盤廿年不變,都係DXXX石班,但佢舊魚我係食到架;不過今次差左D,有少少魚腥味!

羅宋湯+牛油多士係指定動作,牛扒夠諗,仲有雪糕,好滿足。


但後面張枱有條X男好嘈,我地會探討呢個問題,聽日新聞透視見。。。

未完

Tuesday, June 16, 2009

期間限定﹣我的冼樸頭

咁都做得出,死未?


送多隻冼樸手


期間限定,直到套戲落畫。


Monday, June 15, 2009

星空奇遇雲露娜


"星空奇遇記"算係今年最好睇嘅一套,特技正,武器同曲線轉移都同以前一樣,有D low tech....

冼樸造型超正,我都想剪個冼樸頭;

睇戲時突然諗返起一段遺忘的記憶,我細個喺阿婆屋企睇電視版"星空奇遇記",我以為冼樸係叫"史樸",笑得好開心,算唔算係三歲定八十呢?
另外,好驚喜係見到winona ryder,已經做冼樸阿媽;同行朋友唔信係佢,比D証據大家

Saturday, June 13, 2009

新居裝修進度

斷斷續續油左七日,終於完工,比想像用多左時間,主要係因為想其中一幅牆同其他唔同色,我揀左一隻中灰,其他白色,但原來灰色同白色嘅交接位想油得靚係好難架!

總算油完,開始買傢俬,約搬寬頻;傢俬大致揀完,未confirm嘅係衣櫃;
原來想喺香港買衣櫃得幾個選擇,IKEA﹣尺寸唔啱;實惠﹣個款麻麻;直銷 ﹣個款麻麻之餘質地差;海馬 ﹣D貨同直銷實惠一樣樣,B&Q ﹣都係一般囉;跟住只有訂做啦!大家有無好提議?

Friday, June 12, 2009

人寫我又寫 ﹣ 我的體育生涯

artman寫佢嘅體育生涯,呢牌無創意嘅我照跟,由小學寫起

放小息一窩蜂走落操場霸場/枱,我就霸臘波機;
真係拿手架,最叻用龍門開波直接入球,水準應該可以參加東亞運動會


逢暑假會跟做水球教練嘅表舅夫學游水,好快就學哂動作又游大人池,但點都學唔識換氣,但吸一口氣夠游半個塘,激死表舅夫,同我阿媽投訴足咁多年。直至到讀設計同同學游水,覺得瘀諗番表舅夫教嘅方法,即時攪掂

中一入左射箭班,算係當時最有成績嘅運動,開頭學都係因為佢型;最後讀書成績退步,被迫停學

從此除左體育堂再無掂運動

讀設計時代,開始玩保齡,智富,美孚,太古城,南華會都係常去嘅聖地,約十多年前成日冒認朋友代佢打南華會嘅比賽,因為係四個入面最渣嘅一個,但係分數最平均,但都要迫打到160-180,因唔想比其他隊踢出局,真係要四人平均180以上(但我嗰陣仲係用house ball)

直至到長註廣州工作,先買私家波打發時間

十幾年前,公司文化係網球,個個禮拜打,打到終於搵教練,我一開始已被安排打雙打,同女同事拍檔打足兩年;
缺點係唔識打單打,早幾年同佢拍檔打咗一場,默契依然!

打網球嘅腳漸漸走哂去打golf,而我亦去左廣州工作,又學人打,打左一輪driving range,落場真係不知所謂,放棄

近兩年轉打羽毛球,進步甚慢(關年紀事),但keep住郁吓都係好事

Thursday, June 11, 2009

是日追加﹣烏雲蓋頂

今日六點幾,天水圍上空出現一團前所未見嘅黑雲,方向由內地急速飄過嚟,直頭似一個屎塔蓋般蓋住整個天空,好迷呀!

索女你去邊啫

多謝友人Rsend咗呢封令人開心一日嘅e-mail,有好野梗要同大家share la

*索女你去邊呀?
*我去選港姐(設計對白)



好期待今年港姐呀!

Wednesday, June 10, 2009

細佬與隱型眼鏡

我屋企一家五口,除左阿媽,全部四眼;
但從來無人帶隱型眼鏡喎,我自己就覺得個眼鏡已經係個樣嘅一部份,家姐就覺得要撐大隻眼塞D野入眼好核突;
細佬最近被迫佩左隱型眼鏡,原因係佢打籃球定足球嗰邊話戴眼鏡無得落場,所以上兩個星期佢喺佢老婆同家姐陪同下去左眼鏡公司;
驗眼員教左好耐,佢話要用手將眼皮拉開,眼珠四邊都要見眼白,跟住放眼鏡落去;
但佢對眼細過呂方,點撐都做唔到,結果驗眼員叫佢番屋企練習。

佢喺屋企試左好多日都唔成功,佢老婆笑到碌地,仲個個禮拜向我地��報,全家人都好開心呀!

呢個禮拜佢有比賽,戴唔到就無得落場啦!點知真係比佢成功左,可以落場啦!

Tuesday, June 9, 2009

我要脫苦海

星期日晚如常去打隔個星期嘅羽毛球聚會,咪又係咁打,無特別賣命,怪就怪無熱身;
點知今朝直頭連起身都有困難,條腰硬哂駄,慢慢試下動作,彎腰做唔到,連坐低脴塔都要扶實,令我諗起將來老左係唔係都會咁!

藥櫃有兩片N年前唔知邊度贈送嘅脫苦海,貼左好過無啦!
希望聽日鬆番,仲要去新屋油油呀!

Monday, June 8, 2009

輪到我啦。。。大戶屋

之前見咁多人推介,星期六晚銅鑼灣睇完燈,決定食佢一野。。。

點左薯仔沙律/漢堡扒/炸雞飯+喬麥麵

薯仔沙律。。。滿分,薯仔混左蘿蔔絲增加口感,點睛地方係加左好細條嘅生洋蔥,再加埋黑醋沙律汁,正

漢堡扒。。。好得,凍蘿蔔蓉配多肉汁嘅扒,減咗肥膩,但用凍嘅蘿蔔蓉令塊扒變凍速度加快,要扣D分啦!配菜全部好味到震

炸雞飯。。。雞好味但,略肥膩大量幼絲椰菜又係減炸物嘅油膩,椰菜超新鮮又帶甜,連飯都好食過人

喬麥麵。。。麵質唔錯,但個湯汁用左柴魚,唔啱我胃口



我會再嚟架!

某人話佢幫趁時有大聲港女,今次都有喎!唔通佢地無走過?

另外,請睇箭咀呢家人。。。


話說我搭lift時,去到二樓魚一丁,有人出lift,關門時,呢個女人喺魚一丁閃出嚟好似想入,我同佢議上架喎;
同門關緊,見佢好cool咁行入嚟,幫佢㩒返開架lift啦,原來一家三口,但佢無講唔該甚至乎唔講野亦無任何表示,我以為係遊客唔識聽啦!
到大戶屋啦,我地出佢又出,跟住坐左喺附近,佢開speaker講電話,仲係問D銀行野,係講廣東話架;

原來只係上幾代嘅港女,佢老公成餐飯都無出過聲,呢家咩野人嚟架?

Sunday, June 7, 2009

星期五零碎事件簿

星期五下晝,去左灣仔做野,見有時間剩,入去藝術中心行過圈,見到呢幅牆,覺得好靚,影低同大家分享!


喺B仔戲院嗰層,得閑去睇下啦!


跟住約左朋友唱K,原來1:30pm已經無Lunch食,變左Tea K,即刻點飲歌先!


Saturday, June 6, 2009

報章頭條

今朝起身,諗緊今日報紙會用六四做頭條吖定會用堅叔做頭條。。。

結果,蘋果第一版用六四,第二版爆左阿梁洛施,咁呢單野咁震撼,實賣到紙都仲算無可厚非;

但太陽同東方就真係離Q哂大譜,少女露胸/F2仔索K暈Q左都做頭條,簡直侮辱150000港人,侮辱堅叔呀!



呢舖真係比人話係左報都無野講啦!

Friday, June 5, 2009

新居*graffiti

睇下我幾錫細佬,連間房都要畫佢個嘜頭喺度呀!

Thursday, June 4, 2009

旅行*快樂回憶

天水圍舊居掛住呢幅相做裝飾,全部係前幾年旅行嘅快樂回憶。。。


左至右,上至下
東京廸士尼/曼谷的士塞車途中/布吉椰樹/箱根湯本駅/盧芝湖天鵝船/箱根彫刻之森x1/箱根彫刻之森x2
東京酒店外/京都﹣廟/京都﹣鴿/京都﹣紅葉/八景島水母/布吉海灘/箱根彫刻之森x3
Karbi酒店門外/大阪/箱根彫刻之森x4/京都﹣禁煙/箱根彫刻之森x5/布吉沙灘椅/箱根彫刻之森x6

搬新屋,呢張相都會轉,改做一張大相過掛喺sofa後,又或者保留呢張但哂D新相代替佢掛喺走廊!
相就離唔開過去兩年旅行嘅相;
呢兩年去過立山/倫敦/巴黎/曼谷/高雄/墾丁/東京/長野,好多相,哂邊張好呢?

Wednesday, June 3, 2009

新居樓下有好野食

油完油雖然只係六點,但係又攰又餓;

西環有好多餐廳食肆,揀間近近地,事旦入左食餐飽;

呢間食泰菜嘅,叫泰尚,環境唔錯,食物直頭一流,一個禮拜食左兩次,老豆阿媽食海鮮科都話得,會自己再嚟咁話


我諗有朋友嚟西理探我嘅話,我都會帶佢嚟呢度擦餐飽

Tuesday, June 2, 2009

第一次睇演唱會

佢都係其中一個我齊碟嘅歌手,對佢唔算特別瘋狂,但兩個第一次都係比左佢

第一次睇嘅演唱會同第一次睇嘅紅館演唱會都係佢。。。葉蒨文


睇得最多演唱會嘅歌手係林憶蓮

百發百中開親都睇(其實得兩次),係梁詠琪,仲要坐第一行

你地第一次睇嘅演唱會係邊個?
Related Posts Plugin for WordPress, Blogger...