Tuesday, March 31, 2009

我的大食日誌

日期:星期日中午12:00
地點:佐敦Eaton Hotel
目的:食獲金


食buffet咁少客都係第一次見,都預咗唔方有驚喜,最驚喜係網上訂位有85折優惠!
一坐低即送上蟹鉗一個,原來主打係食蟹腳,咪攪我
題外話,對面位女士食嚟食去都剩係蟹腳,唔悶架咩?以形補型呀?

睇下我食咗乜先。。。


西冷牛扒
一舊雞
釀茄子
我至愛嘅腐皮壽司
白汁意粉
沙律
小籠包兩隻
酸辣湯
movenpick雪糕三球
朱古力噴泉綿花糖兩粒
串燒+咖喱+煙肉腸仔卷+無腥味魚手指(好味)

比起全盛時期真係差好遠呀!

Monday, March 30, 2009

發啦發啦



邁向十萬!yeah

Sunday, March 29, 2009

LOVE SONG-3 愛情樹

遊台灣北投時,睇MTV台聽到呢隻歌,即時愛上,喺誠品即買。。。
而家唱K間中都仲會楝佢,貪佢無乜人識,唔啱音都無人知!


張智成咁多隻碟,做得最靚都算係呢隻




聽歌。。。


張智成 - 愛情樹 (歌詞)

我不要妳在我身邊
卻看著藍天
不看我的臉

我但願妳快樂的飛
將來要相愛
都還有時間

風開始在吹 孤獨好直接
愛最苦的是不能相依偎
然而我會等著妳
回來的季節

我的愛情是一棵樹
永遠不會離開一步
風雪多殘酷 我想我挺得住

我的生命是一棵樹
只願成為妳的歸宿
我義無反顧
守護你是最大 的幸福
(我義無反顧
從日落到日出 oh…..)
最深的溫柔是成全
我張開雙臂
任憑妳來回

最痛的時候就思念
紮了根的心
不可能撤退

Saturday, March 28, 2009

我在數碼港的日子﹣last day

再見啦,唔好咁唔捨得我啦!

Friday, March 27, 2009

我在數碼港的日子﹣倒數第二天

Thursday, March 26, 2009

我在數碼港的日子﹣倒數第三天

Wednesday, March 25, 2009

給毛蟲的信



毛蟲先生你好,
今日屋企樓下,
見你在行人必經的通道上緩慢爬行,
如果唔移動你,實變柿餅。

有C拉見我用手執起你時,
發出與年齡不相乎的嬌嗔,
我無理會,因我知你將會是一隻非常漂亮的燈娥,
將你安置在樹上,望你長大成蛾。
到時飛嚟探我,
再會。

Tuesday, March 24, 2009

放工趕返屋企

趕返屋企睇。。。大冬瓜

我認為呢套劇今年最好睇,特技求屎其,班神仙妖怪又夠騎呢,可以列入TVB cult片經典,一邊蘇玉華廖啟智認真交戲,另一邊冬瓜仔冬瓜女認真嬉戲,蓋世堡做左十年傳真機先至等到做冬瓜女,演技技術性擊倒江若琳,可唔可以提名飛躍女藝人呢?譚玉瑛客串第一集,miss左,後悔至今!

最後,播上爛歌主題曲,李逸朗+黎諾懿主唱,醒神



未完,同場加映我對昨日篇BLOG嘅反思。。。

﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣
個個話我爛,咁個主題係講爛嘛!甚至有天真活潑BLOG友MSN留言話“真係想打 7 你",噢!我真係要檢討呀,即刻去佢個BLOG,學下咩野叫唔爛先。。。睇完明哂,以下張圖係我反思後的答案


佢應該幫到你

不用謝了


Monday, March 23, 2009

哇哇哇*爛爛爛

*一爛
大膽程度比用阿嬌做代言人大出99倍,放到咁大,好激,好想搭一次,車上會唔會畢打主題曲架?


唔知點解,總覺得未載客已超重

*二爛
尋日超得閒,上晝睇完"藍龍"同"乾物女",拒做"電車",化身"唱K小魚仙",同朋友兩個人唱tea K,三點唱到八點,破哂紀錄,五粒鐘$125,價爛聲更爛

*三爛
唱"日與夜",唱到"與你約錯終點"笑咗出嚟,因為....
.
.
.
.
.
.
.
.
.
約錯(鐘)點,咁咪無人打掃囉!

*壓軸第四爛
朋友報讀master,我又讀,讀monster,仲要係cookies嗰隻


Sunday, March 22, 2009

一個人食飯

無無聊聊,走去金魚街睇金魚,見到呢間八方雲集,我勁鍾意食餃子窩貼,見有位,入去醫肚。。。



叫咗窩貼套餐,有湯揀,我要酸辣湯,稀左D囉!
窩貼幾好食,但一食十隻,好飽!

套餐只賣$26,汽水加五蚊,咁又一餐

Saturday, March 21, 2009

詛咒 + 宅男夜遊

公司好似給人詛咒咁,繼裁員,勁多騎呢投訴後,office病咗一半人,sung鼻咳嗽之聲此起彼落;

點知衰野繼續嚟,噚日接到消息,女同事嘅老公突然去世,同事會請假數天,仔細老婆嫩,唉!睇下可以點幫啦!

距離last day仲有八日,扣埋補假,last day係下星期日,想快D走。。。

﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣

約大忙人餓家琪食飯,地點係中環soho,我話未去過,嚇得佢吖!
日頭就去得多,夜晚真係第一次,好多人呀,好嘈呀;
好彩終於搵到餐廳落腳,隔離河馬咁大個口嘅大聲組合亦差唔多走,唔係我諗我聽唔到餓家琪講野囉!
佢先食大併盤,再𡁻cheese cake,啱架啦,之前瘦過火呀,但係。。。

你話嗰舊無味嘅三角形物體係香草角,其實係波菜嚟架,加左少少basil leaf碎,你咁都食唔出?唔係呀?

ps:想做就做,撐硬你!

Friday, March 20, 2009

推介﹣爆漫。

小畑老師又有新作啦,等到頸都長,小畑健可能你唔識,但係“死亡筆記"就無奶油唔識啦卦,今次仲係“死亡筆記"後再同大場鶇合作,無理由唔買,

今次古仔簡單D,講兩個十四歲天才少年立志成為漫畫家嘅故事,一個作故仔,一個畫公仔,咪即係講佢地自己,大量畫漫畫技巧,草稿都出齊,超正。


其實我初中時的確認真諗過將來做漫畫家,嗰陣返學放學都日畫夜畫,仲買埋畫漫畫用嘅鋼筆嚟畫;直到美術教師誘導下轉咗目標為做廣告,目標早達,做到而家。

而家畫功退哂步,剩係會畫呢類醜化人樣嘅物體,呢個係我細佬,由細畫到大,個個一見就認得,佢由開始憎,畫足廿幾年,而家已經慣哂,我去旅行行美術館簽名都會加埋呢個肖像,等佢個樣留低喺全世界,你話我幾錫個細佬呢!


Thursday, March 19, 2009

笑話四則

一。
公司有兩兄弟,大哥議而不決,比A同B佢決定,永遠到DEADLINE先揀個C或者A+,細佬好D,但甩甩漏漏;
各同事不滿,幫佢地起咗個朵。。。

外國有雷曼兄弟,我地有緩慢兄弟,應到爆

二。
上星期六舊同事結婚,席間我爛GAG連篇,同檯舊同事讚我一年無見,好似電腦software,upgrade了,由無聊version2.8升級至3.2A。
我覺得佢upgrade多過我囉!

三。
細佬話:下星期無線播新劇。。。秋官效應之一Q清袋,個朵咁勁,走佬呀

四。
食午飯時,電視播緊瞬間看地球,下同朋友講,今次旅行就去電視下個出現嘅地方,結果。。。中國香港,維多利亞港;係唔係咁邪呀?

Wednesday, March 18, 2009

LOVE SONG-2

有好多歌隔咗好耐再聽,會突然好有感覺打冷震,呢首早幾日聽到,諗起舊事。。。

華星摺埋前,剩番何韻詩,古天樂,梁漢文,歐倩兒同埋佢﹣梁浩賢,頭兩者即刻有唱片公司接收,梁漢文最後都泊到paco,歐倩兒轉去拍劇同安仔拍拖結婚,最黑仔係佢。。。


記得plug歌前一日,上佢公司接野做,個公關拎住盒帶埋嚟播,話係新人,問得唔得,我話幾得喎,但咩野樣先?


結果一碟玩完

得閒都會拎嚟哼吓。。。含蓄

含蓄 - 梁浩賢

悶出X + 開齋

悶出X。。。
肉體喺公司,靈魂卻出竅,頂唔浦,屋企揀咗呢堆心水歌返公司煲!廿四隻,平均每隻四分鐘,消磨兩粒鐘


全部都叫hit過,有無邊首唔識呀?

開齋。。。
上星期尾開始同朋友+舊客聯絡,講番自己工作環境,噚日接到舊客電話,有第一個job啦,雖然係細job,總算係好開始

Tuesday, March 17, 2009

鳴門教室﹣photoshop效果

收到姓卡謮者意見,佢覺得用slide形成睇相唔方便,另外,又收到姓黑讀者查詢photoshop效果﹣大頭釘同透明膠紙點整?
呢個係有求必應blog,即刻開課

step1/先準備大頭釘等嘅圖片,可以上網搵,或者買clipart圖庫


step2/揀定自己嘅相片


step3/開新檔,設定大小,我設咗A4size,copy張水松板做底,再copy一張相過去


step4/開新layer放在相片下,畫白框,扮白邊相


step5/往layer工具格左下角襟F,揀shadow,會有一個窗彈出,可調節陰影光暗及大細


step6/張兩層layers link埋一齊,跟住在EDIT揀tranform及rotate相片及白框


step7/開大頭釘圖庫,用鋼筆勾出整個path,跟住make selection 再copy往大圖


step8/duplicate多一粒大頭釘,在edit...>transform...>distort,將形狀變成斜陰影,再在image...>edit...>curve調到變灰色,再在layer格...>對下按mutiply,就會有此效果


step9/重覆以上動作


step10/好,到膠紙;我覺得最易handle係先影張膠紙相,跟住勾path再copy落大圖,在image...>edit...>curve將顏色調光,跟住在layer格...>對下按lighten,及在layer格...>對下右面較opacity控制透明度,重覆多幾次,又攪掂


最後加上文字,壁佈版完成





我做都要半粒鐘,我諗黑同學要交番一份功課比大家睇,唔好SIDE我心機

各位如果有唔明,就問我啦!有photoshop嘅就試下做啦,唔難架

卡讀者,而家個blog日日新鮮,即叫即製,滿意未?

Monday, March 16, 2009

why?又係南丫島

個個砌slide show,我又玩。。。
星期日同朋友又去南丫島,一個月第二次去,熟到可以做導遊,上次影咗好多滿意嘅相,今次相隔咁短時間,決定主攻花草

交出以下幾張作品
*呢牌D洋紫荊開得好靚,諗住可以影餐飽,原來南Y唔多洋紫荊,但都影到一張滿意作品(favorite.no1)
*原來蘆薈會開花,沿用上次低炒影法,都幾得,但比同行友人笑我影慣裙底(aloe-2.no9)
*見到大量昆蟲,就知春天來了,蝴蝶同蜜蜂都幾鍾意(bee-1.no8.butterfly-1.no6)
*新芽代表咗我嘅希望(hope.no2)



行完山,夜晚打羽毛波;打完,直頭行唔郁,多謝老狗車我番屋企;第二朝,起唔到身,頸痛腰痛腳痛盤骨痛,坐喺馬桶瞓番,今朝遲大到

老狗咁啱又去咗南丫島,過去睇睇

Saturday, March 14, 2009

旅行腳

四月,預計會鬼咁得閒,plan去旅行啦!身邊朋友中竟然無人走得開,又唔想一兜友自己去...

原來假期易有,旅行腳難求;

喂!有無人有假?地點不拘!

Friday, March 13, 2009

心地唔好

去灣仔會展SET場,中途遇見幾個阿婆攞住盒野‘揚嚟揚去“,咁我剩係避開話唔駛啦,一路行繼續有阿婆兜售,終於見到盒面有亞張天王,而阿婆講咗句:幫下D老人家啦,再睇埋佢條圍裙上嘅LOGO,先知,原來係伸手助人協會賣曲奇籌款,攞左三十五蚊買左盒。



同行同事問我點解頭幾個唔買,見到呢個先扭軚,我話。。。。

第一眼見個包裝,以為係嗰D國產天壇香煙,就諗班阿婆竟然公然賣私煙。。。咁樣諗班做義工嘅阿婆,真係feel guilty

但係個包裝唔靚,惹人誤會係事實呀

Thursday, March 12, 2009

懶*靜*期

10:30am
今朝嘅工作原來唔駛半粒鐘做完,做乜好呢,呀,飲水

12:15pm
而家坐喺公司,要做嘅做哂,唔想(駛)做嘅唔會做,水已經飲咗幾杯,又未放食飯,報紙又睇埋;
原來當心死,好多野都可以唔駛做,仲有咁多日,唔通織冷衫咩!

2:15pm
聽日有展覽,但係我已講明唔會落場,但今日SET場始終要跟,新設計,我都想睇吓出咗嚟靚唔靚

我諗未來兩星期大部份日子都係咁過,日頭寫blog都得啦!

Wednesday, March 11, 2009

番嚟啦

今朝起身,感覺鬆哂,照鏡都覺得好樣番D,XX又暢順,太陽又浦頭,心情即刻番哂嚟!

講下呢幾日嘅雜事。。。

*公司裁員,有我份,個個即走,得我一個要做到四月一日,咁諷刺,唉!

*當個心走/死咗,坐喺公司原來變得好辛苦,好多野唔會再做,得閒咗好多,迫自己飲多杯水,飲多杯水,跟住去多次厠所,再去多次厠所

*發生呢件事,令我知道其實老爸好錫我,呢樣係最大收獲

*身邊有人提醒咗我幾年前講過事業上嘅目標,團火番番嚟,我會繼續

*身邊好在仲有好多朋友,多咗好多飯局,又陪我唱K,仲連唱兩DAY,以為可減壓,點知效果一般,事後先發覺。。。車,都唔係有壓力,減乜鬼壓啫

*又有朋友捉我睇泰國鬼片,呢個真係弱項,好少好少睇鬼片,成套戲ME起對眼嚟睇,臨瞓都驚瞓唔著,但個腦其實連隻鬼乜樣都唔知;不過嗰晚幾開心,thanks!

*見到個blog咁多人寫咗D撐我嘅留言,見過嘅,未見過嘅,又電話又msn又e-mail,我真心講多謝,我會記住

Friday, March 6, 2009

唔想做*唔識寫*暫停幾日

Thursday, March 5, 2009

尋根之旅

之前提過我細個係住喺華富邨,老媽提供資料,今日嘅目的地係華美樓。。。


經老街坊帶路,兩分鐘就去到樓下,哇!呢度好地靈人傑呀;
正猶疑好唔好上樓,有人開閘,即上。。。
對華富屋企記憶近乎零,只記得自己踎喺鐵閘睇出面D細路喺走廊玩嘅畫面,而右邊好光,係得咁多;
上到單位1033,終於知道記憶無錯,原來單位係最邊一個,因走廊極黑,所以右邊嘅光源就有好大對比;
今日嚟到,入面班住客卦住打牌,影哂相佢地都唔知

最後貼幾張出土文物,攝於華富邨

呢個細路細細個就鍾意睇香港電視,大咗一定係TVB啲fans


而呢個見到盆栽同缸魚就開心成咁,大咗屋企實種滿野兼養魚啦


Wednesday, March 4, 2009

試食

之前講過讀書時期經常會幫某品牌試味,開估,係公仔麵



印象最深係試杯麵,送嚟嘅時候仲未有包裝,而合味道當時已經佔領市場,我當時覺麵質太諗,味道我填咗滿意,杯型太肥等,可能叫做比到意見啩,之後幾年陸續都有份試食,而每逢有新product,我會收到一箱,嗰陣時細細個,好開心架啦!

Tuesday, March 3, 2009

shopping魔的告解 下集大結局

上期講到去旅行見野就買,但係買咗又"pat"埋一邊。。。
先講泰國,泰國係最易失手的地方,D野平又實用,好似呢杯蠟蠋,買咗幾年都未開封


相架一買四個,襯哂色,至少買咗五年;睇番都覺得靚,如果搬得成屋會拎出嚟用


呢個仲衰,買咗八年,兩包testtube花樽


好,到台灣,四年前喺九份貪得意,浮水玻璃魚,一買五條


台灣行美術館,見佢話會喺六個鐘頭開花,又落搭


嚟到日本啦!本身係保齡迷,見保齡樽就買,但又唔用喎,價錢都未除


睇到呢道都應該開始比人鬧。。。呢件我極鍾意,仲買個大嘅,成50"高,真係唔捨得開;箱根美術館買,大概係六年前


自己去旅行買都算,約九年前見朋友去法國,託佢買之後唔用先抵死,pizza盒鐘,當年好新奇架


呢個係垃圾桶,個設計好正,又唔捨得用


呢盒係乳貼,寫錯咗係乳牛貼紙,可以貼雪櫃,房門,旅行喼,但隔咗九年,仲貼唔貼到呢?


最後,床底爆棚,放喺枱底,呢兩箱野全部係買咗唔等駛嘅物品,擺足十年,有增無減


放心,無第三集,阿門

Related Posts Plugin for WordPress, Blogger...